Pagpauswag kan Satong Kakayahan sa Ministeryo—Pagdemonstrar nin Pag-adal sa Bibliya Gamit an Librong Itinotokdo kan Bibliya

Kun Taano ta Mahalaga: Puwedeng dai maintindihan nin dakul kun ano an buot tang sabihon pag sinasabi ta na nag-aalok kita nin libreng pag-adal sa Bibliya. Puwede nindang isipon na maiba sinda sa sarong group study o kaya makua nin sarong kurso na an pag-adal paagi sa surat. Imbes na basta mag-alok nin pag-adal, taano ta dai iyan idemonstrar? Sa laog nin pira sanang minuto, dawa sa may pinto sana, puwede mong ipahiling kun gurano kapasil asin kapaki-pakinabang an mag-adal nin Bibliya.

Kun Paano Gigibuhon:

Pagkatapos magpamidbid, haputon an kagharong kun iniisip niya kun ano an mangyayari sa maabot.
Sabihon sa saiya na arog man kaiyan an iniisip nin dakul na tawo, dangan ipahiling an lista kan mga tema sa librong Itinotokdo kan Bibliya. Sabihon na an mga tema sa libro madaling masabutan saka nagpapahiling kun ano an itinutukdo kan Bibliya manungod sa mangyayari sa maabot asin iba pa, dangan haputon kun sa anong tema siya interesado.
Tawan siya nin kopya kan libro asin ipahiling an temang pinili niya. Ipaliwanag na an mga hapot sa kapinunan kan kapitulo masisimbag sa sunod na mga parapo.
Kun gusto kan kagharong, ipabasa sa saiya an inot na parapo. Dangan basahon an hapot sa parapong iyan, asin pag-ulayan an simbag. Basahon asin pag-ulayan an sitadong mga teksto sa parapo na minasuportar sa simbag. Ipahiling sa saiya kun paano mo minarkahan sa saimong libro an simbag.
Pag-ulayan an sunod na parapo, pero sa pagkakataon na ini sabihon sa kagharong na purbaran niyang simbagon an hapot sa sadiri niyang tataramon.
Pasalamatan siya, asin sabihon na mabalik ka para ipadagos an pag-uulay.
Kun angay, ipahiling an video sa jw.org/bcl na Paano Ginigibo an Pag-adal sa Bibliya?

Purbaran Ini Ngunyan na Bulan:

Ipamibi ki Jehova na lugod bendisyunan an saimong mga paghihinguwa na makapuon nin pag-adal sa Bibliya.—Fil. 2:13.
Hinguwahon na ikademonstrar kun paano ginigibo an pag-adal sa Bibliya gamit an librong Itinotokdo kan Bibliya o kaya ipahiling an video na Paano Ginigibo an Pag-adal sa Bibliya? kisiyera sarong beses mantang nasa ministeryo.