Bukas Na daw sa Saindo Ngonyan an Pinto Pasiring sa Pagpapayunir?
1 An satong 1999 teksto kan taon nagpapagirumdom sa sato na kita yaon pa sa laog kan “aldaw nin kaligtasan” ni Jehova. (2 Cor. 6:2) Alagad an saiyang aldaw nin kaligtasan madali nang matapos. Dangan mapoon an saiyang “aldaw nin paghokom.” (2 Ped. 2:9) Mantang padagos na itinatao ni Jehova sa katawohan an oportunidad para sa kaligtasan, kanigoan kanakapupukaw sa boot na maheling an padagos sa pagdakol na kabilangan nin naghihimate!
2 An banwaan ni Jehova naghingoang atubangon an angat na mapaabotan an mga naghihimate bago magin huri nang marhay. Para sa dakol na parahayag kan Kahadean, ini nangahulogan nin paglaog sa paglilingkod bilang payunir. Bukas na daw sa saindo ngonyan an pinto pasiring sa pagpapayunir? Taano ta naghahapot kita?
3 Ipinahayag an Pag-apresyar: Siring kan ipinaisi sa Enero 1999 An Satong Ministeryo sa Kahadean, an kahagadan na oras kapwa sa mga regular asin auxiliary payunir ibinaba na. Tangani na maabot an bagong kahagadan, kaipuhan na magdusay an mga regular payunir nin 70 oras sa ministeryo kada bulan para sa total na 840 oras kada taon nin paglilingkod. An mga auxiliary payunir magamit nin 50 oras sa paglilingkod kada bulan. Uya an nagkapira sa dakol na kapahayagan nin pag-apresyar na naresibi bilang resulta kan mga pagliliwat na ini:
“Kanigoan kaogmang balaog hale sa satong langitnon na Ama!”
“Mayong mga tataramon na makapahahayag kan mga emosyon nin kagayagayahan, pagkamoot, asin pagpasalamat sa probisyon na ini!”
“Gigibohon kaiyan na mas pasil nanggad na aboton an samong mga iskedyul!”
“Ipinamimibi niamo na logod dakol pa ngonyan an lumaog sa bilog na panahon na ministeryo asin magkamit kan mga bendisyon na minagikan sa paglilingkod ki Jehova sa dakulang paagi.”
4 Mantang nagdadangadang kita sa kulminasyon kan aldaw nin kaligtasan nin Dios, risang-risa na minamawot ni Jehova na an saiyang banwaan magtao nin pangultimo, makosog na kurahaw nin pag-omaw. An kadakulaan asin kosog kan mensaheng ini nadudugangan (1) paagi sa dagos-dagos na pagdakol kan kabilangan kan mga parabalangibog kan Kahadean asin (2) paagi sa paghihingoa kan balang saro na dugangan an kaya niang gibohon sa paghuhulit kan Kahadean. Si Jehova, “an nagpapatubo kaiyan,” pinangyari an kapangganahan sa duwang paaging iyan paagi sa pagbendisyon sa gikan sa boot na aktitud kan gabos na nag-ako nin kaligtasan.—1 Cor. 3:6, 7; Sal. 110:3.
5 Dai Paglipasan an Katuyohan Kaiyan: May labot sa aldaw nin kaligtasan ni Jehova na sinadol nin Pablo an mga kapwa Kristiano: “Sa paggibo sa kaibanan nia [ni Jehova], nakikimaherak man kami sa saindo na dai nindo akoon an dai na kutana maninigong kabootan nin Dios asin lipasan an katuyohan kaiyan.” Dai niato ‘malilipasan an katuyohan kaiyan’ kun ibinibilang niato ini na “an espesyalmenteng panahon nin pag-ako” na maghingoang makatabang para sa kaligtasan nin iba sa gabos na oportunidad. (2 Cor. 6:1, 2) Ngonyan, an mga tataramon ni Pablo igwa nin orog na pagkaapurado. An mga Kristiano na nagpapaheling nin odok sa pusong pagkamoot ki Jehova ibinibilang na pribilehio an lubos na pakikikabtang sagkod sa mapupuede sa ministeryo na iinasignar nia sa sainda. Kaya na daw nindo ngonyan na makikabtang nin mas lubos sa ministeryo bilang regular payunir?
6 Iyan Sarong Rasonableng Pasohan: Sa Pilipinas, pasohan niato na magkaigwa nin 20,000 na regular payunir pag-abot nin Setyembre 1. Naniniwala kita na ini sarong rasonable asin maaabot na pasohan. Taano ta kompiado kitang marhay? Kan Abril 1997 nagkaigwa kita nin 22,410 na tugang na lalaki asin babae na nag-auxiliary payunir, asin kan Abril 1998 19,593 an naggibo kaiyan. An mayoriya nagreport nin 60 oras—kulang sana nin 10 oras sa bagong kahagadan sa regular payunir! Dawa kun 4,000 sana kan mga nag-auxiliary payunir an mapalista bilang regular payunir bago matapos an taon na ini nin paglilingkod, mapoponan niato an Setyembre na may 20,000 o labi pa na bilog na panahon na payunir!
7 Kaipuhan an Iskedyul: An 70 oras daw na paglilingkod sa langtad kada bulan garo baga medyo dai pa nindo kayang aboton? Tibaad makatabang an pag-isip nin 17 oras kada semana. Ginagamit an sampol nin mga iskedyul na nasa sunod na pahina, probaran na gumibo nin iskedyul para sa regular payunir na magigin angay sa saindong personal na mga kamugtakan. Sa paggibo kaiyan, makipag-olay sa eksperyensiadong mga payunir tangani na makua an saindang opinyon sa kun paano ninda binabalanse an paglilingkod bilang payunir sa personal asin pampamilyang mga paninimbagan. Hapoton an saindong paraataman sa sirkito kun paano an mga payunir sa sirkito nag-iiskedyul kan saindang aktibidad sa paglilingkod kada semana. Dangan asahan nindo na bebendisyonan ni Jehova an saindong mga plano na magpayunir.—Tal. 16:3.
8 Gibohon Iyan na Proyekto nin Pamilya: Inestudyaran na daw nindo na gibohon na proyekto nin pamilya an pagpapayunir? Puede kamong tumukaw bilang pamilya asin pag-olayan kun paano—paagi sa maingat na pagplano asin marahay na kooperasyon—an saro o duwang miembro kan pamilya makakapagpayunir. Siempre, paagi sa onestong pag-ebalwar kan saindang mga kamugtakan manonompongan nin nagkapira na dai mapupuede an pagregular payunir ngonyan mismo. Kun siring, ibugtak an pagpapayunir bilang pasohan sa ngapit. Alagad ponan nang planohon na magtalaan nin depinidong petsa na makapoon sa pagpapayunir. Tibaad puede kamong mag-auxiliary payunir nin nagkapirang beses durante kan taon tanganing luway-luway na maabot an paglilingkod bilang regular payunir.
9 An labing 16,000 na regular payunir na nasa lista ngonyan sa Pilipinas magkalaenlaen an mga kamugtakan. Bakong gabos marahayon an salud, asin an mayoriya may mga obligasyon sa pamilya asin pinansial. Labing 3,600 na payunir an labi nang 50 an edad, asin mga 2,800 sa sainda an labi nang 65 an edad. Mga 1,000 an 20 anyos o mas hoben pa. Mga un-kuarto kan gabos na payunir mga tugang na lalaki, na an dakol may mga paninimbagan sa pamilya asin sa kongregasyon. Ini gabos “tinutubos an panahon” para sa pagpapayunir, na sa dakol na kamugtakan nangahulogan nin pamumuhay na mas simple alagad ta orog na nakakokontento.—Col. 4:5.
10 Kaipuhan daw Nindong Magin Simple? An pagpasimple sa saindong buhay iyo an puedeng magin liabe na nagbubukas sa saindo kan pinto pasiring sa pagpapayunir. An buhay daw nindo garo sarong dakulang harong na may dai kinakaipuhan na mga kuarto asin kasangkapan, na nagkakaipo nin dakol na panahon, kuarta, asin trabaho tangani na maasikaso iyan? Kun iyo, an pag-adaptar sa mas simpleng mga kamugtakan puedeng tumogot sa pagpapayunir. Puede daw nindong inaan an panahon na ginagamit nindo sa sekular na trabaho? Puede daw nindong tuboson an panahon hale sa dai kaipuhan na aktibidad o orog na magin timbang sa panahon na ginagamit sa pag-aling-aling?
11 An Biblia, sa 1 Timoteo 6:8, sinasadol kita: “Igwa na nin kakanon asin gubing, maninigoan na kita sa mga bagay na ini.” An pagigin kontento sa kadikit importante sa paggibo kan satong pinakamakakaya sa paglilingkod ki Jehova asin mas pinapapasil an pag-enot sa espirituwal na intereses. (Mat. 6:22, 33) Sa pahina 104 kan 1998 Yearbook sa report manongod sa Hapon, nagkapirang suhestion an itinatao sa kun taano ta marahayon an espiritu nin pagpapayunir sa nasyon na iyan. Konsideraron an saro: “Sa pankagabsan totoo na an mga harong nin mga Hapon talagang simple, sa siring nagkakaipo nin kadikit sanang panahon para sa mantension, asin sa kadaklan na kabtang, an buhay napagkatodan nang pinagdadanay na simple.” Bako daw na iyan an kahulogan kan 1 Timoteo 6:8?
12 Sa bilog na kinaban, an mga lingkod nin Dios naghuhulit kan maogmang bareta na paorog nang paorog an kaigotan bago matapos an aldaw nin kaligtasan ni Jehova. Kaomaw-omaw na kan nakaaging taon an promedyong haros 700,000 nakikabtang sa sarong klase nin paglilingkod bilang payunir kada bulan. Puede daw nindong liwaton an saindong buhay tanganing umiba sa sainda? Inaagda niamo kamo na maingat asin mapagngayongayong siyasaton an saindong mga kamugtakan mantang sinisimbag nindo an hapot na: “Bukas na daw sa saindo ngonyan an pinto pasiring sa pagpapayunir?”
[Blurb sa pahina 3]
PASOHAN: 20,000 NA REGULAR PAYUNIR!
[Kahon sa pahina 3]
Sampol nin mga Iskedyul Para sa Regular Payunir
Kaipuhan: 17 oras kada semana
Sarong Aldaw sa Laog nin Semana Asin Sabado Patin Domingo
Aldaw Oras
Biernes 8
Sabado 6
Simba 3
Total na Oras: 17
Duwang Aldaw sa Laog nin Semana Asin Sabado
Aldaw Oras
Martes 7
Huebes 7
Sabado 3
Total na Oras: 17
Tolong Aldaw sa Laog nin Semana Asin Domingo
Aldaw Oras
Lunes 5
Mierkoles 5
Biernes 5
Domingo 2
Total na Oras: 17
Duwang Banggi Asin Sabado Patin Domingo
Aldaw Oras
Lunes 3
Mierkoles 3
Sabado 8
Domingo 3
Total na Oras: 17
Gumibo nin Sadiri Nindong Iskedyul Bilang Regular Payunir
Aldaw Oras
Lunes
Martes
Mierkoles
Huebes
Biernes
Sabado
Domingo
Total na Oras: 17