An mga Bendisyon kan Ministeryo Bilang Payunir
1, 2. Anong mga bendisyon an konektadong marhay sa ministeryo bilang payunir, asin taano?
1 “Aram ko na mayo nang ibang gibohon na makapagtatao sa sako nin satispaksion na minagikan sa paghiras kan katotoohan sa iba,” an sabi nin sarong payunir. An saro pa nagsabi: “Sa katapusan kan kada aldaw, masiram an torog ko, asin pano nin kagayagayahan an puso ko.” An mga payunir na ini nagtataram para sa mga tugang na lalaki asin babae sa gabos na lugar na nakaeksperyensia kan mga bendisyon kan ministeryo bilang payunir.—Tal. 10:22.
2 An pagtabang sa iba na magkaigwa kan nagliligtas-buhay na kaaraman sa Tataramon nin Dios nagtatao nin tunay na satispaksion. (Gibo 20:35; 1 Tes. 2:19, 20) “Nakaoogma asin nakapakokosog sa pagtubod na maheling kun gurano kamapuersa an Tataramon nin Dios sa pagmotibar sa mga tawo na gumibo nin mga pagbabago sa saindang buhay,” an surat nin sarong haloy nang payunir. Iyo, paagi sa pagpresentar na tumabang sa mga tawo asin mamayo nin mga pag-adal sa Biblia, may nakatagama sa mga payunir na mga bendisyon na siring kaini.
3, 4. Paano an pagpapayunir nagtotokdo sa saro na magsarig ki Jehova, asin paano ini nakakatabang sa saro na tumalubo sa espirituwal?
3 Pagsarig ki Jehova: An aroaldaw na pagsarig sa espiritu nin Dios mantang ginigibo ninda an saindang ministeryo nakakatabang sa mga payunir na kultibaron “an bunga kan espiritu” asin nagseserbing proteksion para sa sainda. (Gal. 5:16, 22, 23) Dugang pa, mantang daing ontok na ginagamit ninda an Tataramon nin Dios, an mga payunir parateng eksperto sa paggamit kan Kasuratan tangani na surogon an katotoohan saka pakosogon an iba. (2 Tim. 2:15) An sarong tugang na lalaki na nagpayunir sa laog nin dakol na dekada nagkomento: “An pagpapayunir nakatabang sa sako na magkaigwa nin hararom na kaaraman sa Biblia, kaaraman na nagamit ko sa pagtabang sa dakol na tawo na mamidbid si Jehova asin maaraman an saiyang mga katuyohan.” Kapakipakinabang nanggad!
4 An mga regular payunir dapat man na magsarig ki Jehova sa dakol na iba pang paagi. Napakokosog an pagtubod ninda mantang naheheling ninda kun paano nia binebendisyonan an saindang mga paghihingoa na magkaigwa kan saindang materyal na mga pangangaipo. An sarong 72 anyos na 55 taon nang regular payunir nagsabi: “Nungka akong sinudya ni Jehova.” Apuera kaini, paagi sa pagpapadanay na simple an saindang buhay, napoprotehiran nin mga payunir an saindang sadiri sa dakol na kahaditan sa buhay. Nakakaakit daw ini para sa saindo?—Mat. 6:22; Heb. 13:5, 6.
5. Paano an pagpapayunir nakakatabang sa saro na rumani ki Jehova?
5 Pagrani sa Dios: An satong relasyon ki Jehova sarong mahal na marhay na rogaring. (Sal. 63:3) Kun kita lubos na nakikikabtang sa ministeryo huli sa pagkamoot ki Jehova, an relasyon na iyan orog na nagrarani. (Sant. 4:8) An sarong labi nang 18 taon na payunir nagsabi: “An paglilingkod bilang payunir nagtotogot sa sato na ‘namitan asin helingon na si Jehova marahay,’ na aroaldaw na nagpapatalubo nin mas makosog pang relasyon sa satong Kaglalang.”—Sal. 34:8.
6. Dapat na magkaigwa nin ano an mga payunir, asin sairisay apuera sa mga payunir an nakikinabang?
6 Dugang pa sa pagkaigwa kan kinakaipuhan na mga kamugtakan, an mga payunir dapat na magkaigwa nin makosog na pagtubod, tunay na pagkamoot sa Dios asin kataed, asin pagigin andam na magsakripisyo. (Mat. 16:24; 17:20; 22:37-39) Minsan siring, arog kan pinatototoohan kan maogmang lalauogon nin mga payunir sa gabos na lugar, an mga bendisyon kan ministeryo bilang payunir nakalalabing marhay. (Mal. 3:10) An mga bendisyon na ini bakong limitado sa mga payunir sana, kundi an saindang mga pamilya asin an kongregasyon nakikinabang man nin dakula sa marahay na aktitud na ipinaheheling kan mga payunir.—Fil. 4:23.