An mga Payunir Nagtatabang sa Iba
1 Si Jesus nagsabi: “Totoong gayo na kadakol kan anihon, alagad ta kakadikit kan paraani. Kun siring makimaherak kamo sa Kagurangnan kan anihon na magsobol nin mga paraani sa saiyang anihon.” Mantang kakadikit kan mga paraani kan enot na siglo asin dakol sindang teritoryo na kokobrehan, puede kutanang pagbotan sinda ni Jesus na paabotan kan maogmang bareta an pinakadakol na mapupuede paagi sa pagsugo sa sainda nin manarosaro. Imbes, saiyang “isinugo sinda nin manduwaduwa.” (Luc. 10:1, 2) Taano ta manduwaduwa?
2 An mga disipulong idto bagohan asin mayong eksperyensia. Paagi sa paghuhulit na magkaibanan puede sindang makanood asin makaparigon sa lambang saro. Siring kan pagkasabi ni Salomon, “mas marahay an duwa sa saro.” (Ecl. 4:9, 10) Dawa pakabubuan kan banal na espiritu kan Pentecostes 33 C.E., si Pablo, Bernabe, asin iba pa inibanan sa ministeryo an mga kapagtubod. (Gibo 15:35) Siertong dakulang pribilehio idto para sa nagkapira na personal na sanayon nin siring na may kakayahan na mga lalaki!
3 Sarong Marahay na Programa nin Pagsasanay: Siring kan katimbang kaiyan kan enot na siglo, an Kristianong kongregasyon sa presenteng panahon sarong organisasyon na naghuhulit. Sinasanay man kita kaiyan. Bilang mga indibiduwal, an satong odok sa pusong pagmawot maninigo na iatubang an maogmang bareta sa pinakaepektibong paagi na mapupuede. May makukuang tabang tanganing mapaoswag nin dakol pang parahayag an saindang pagigin epektibo.
4 Sa Pankahadean na Paadalan sa Pagmiministro na ginibo dai pa sana nahahaloy, ipinaisi kan Sosyedad an sarong programa para sa mga payunir na tabangan an iba sa ministeryo sa langtad. Kaipuhan daw ini? Iyo. Labing sarong milyon na parahayag an nabautismohan kan nakaaging tolong taon, asin dakol sa mga ini an nangangaipo nin pagsasanay tangani na magin mas epektibo sa paghuhulit. Siisay an puedeng gamiton tangani na mapanigoan an pangangaipong iyan?
5 Makatatabang an bilog na panahon na mga payunir. An organisasyon ni Jehova nagtatao sa sainda nin dakol na hatol asin pagsasanay. An mga payunir nag-aako nin instruksion na iinadaptar sa saindang mga pangangaipo durante kan duwang semanang Paadalan sa Paglilingkod Bilang Payunir. Nakikinabang man sinda sa mga pakikipagmiting kan mga paraataman sa sirkito asin distrito, saka sa paggiya kan kamagurangan. Maski ngani bakong gabos na payunir kapareho kaeksperyensiado ni Pablo asin Bernabe, sinda nag-ako nin mahalagang marhay na pagsasanay, na ikinaoogma nindang ihiras.
6 Sairisay an Makikinabang? Idto sana daw na bagong mga parahayag o bago pa sanang mga bautisado an puedeng makikabtang sa programang ini? Dai nanggad! May mga aki asin may edad na dakol nang taon na nakaaram kan katotoohan alagad pahahalagahan an tabang sa nagkapirang kabtang kan ministeryo. An nagkapira ekselente sa pagpasakamot nin literatura alagad nadedepisilan sa mga pagdalaw liwat o sa pagpoon nin mga pag-adal sa Biblia. An iba tibaad pasil na makapoon nin mga pag-adal sa Biblia alagad ta nagsasabi na an saindang mga estudyante dai nag-ooswag. Ano an nakapopogol sa sainda? Puedeng hagadon sa eksperyensiadong mga payunir na tumabang sa mga kabtang na ini. May mga payunir na epektibo sa pagkultibar nin interes, pagpoon nin mga pag-adal sa Biblia, asin paggiya sa bagong mga estudyante pasiring sa organisasyon. Makatatabang an saindang eksperyensia sa bagong programang ini.
7 Nanonompongan daw nindo na an saindong iskedyul dai nagtotogot sa saindo na suportaran an regular na mga pagtiripon kan kongregasyon bago lumuwas sa paglilingkod sa langtad dawa gusto nindo? An sarong payunir puede kamong ibanan sa paghuhulit sa mga panahon na mayo nin ibang parahayag.
8 Kaipuhan an Marahay na Pakikikooperar: Duwang beses sa sangtaon, magibo nin areglo an kamagurangan para sa mga parahayag na nagmamawot nin personal na tabang na makikabtang sa programang An mga Payunir Nagtatabang sa Iba. Kun oyon kamong mag-ako nin siring na tabang, makipag-olay sa parahayag na payunir na iinasignar na tumabang sa saindo, gumibo nin praktikal na iskedyul para sa paglilingkod, asin sunodon iyan. Otobon an kada pag-oolay na magtagbuan. Mantang magkaibanan kamong naghuhulit, obserbaran an epektibong mga paagi nin pag-atubang kan maogmang bareta. Analisaron kun taano ta epektibo an nagkapirang pagdolok. Estudyaran an mga suhestion na puedeng itao kan parahayag na payunir para sa pagpaoswag kan saindong pag-atubang. Mantang iinaaplikar nindo an mga nanonodan, an saindong pag-oswag sa ministeryo maririsa, kapwa nindo asin kan iba. (Helingon an 1 Timoteo 4:15.) Magkaibanan na maghulit sa pinakaparate na mapupuede, na nakikikabtang sa gabos na kabtang kan ministeryo, kabale an impormal na pagpapatotoo alagad nagkokonsentrar sa ano man na partikular na kabtang na dian kaipuhan nindo nin personal na tabang.
9 Interesado an paraataman sa paglilingkod sa magigin pag-oswag. Sa panapanahon, hahapoton nia an konduktor sa Pag-adal sa Libro kan Kongregasyon tangani na aramon kun paano kamo nakikinabang sa programa. Tatabangan man kamo kan paraataman sa sirkito pagdalaw nia sa kongregasyon.
10 Boot ni Jehova na an saiyang banwaan sanayon asin magin ‘andam para sa lambang marahay na gibo.’ (2 Tim. 3:17) Mansayon an areglong An mga Payunir Nagtatabang sa Iba bilang sarong marahay na probisyon tangani na tabangan an mga nagmamawot na mapaoswag an saindang abilidad sa paghulit kan tataramon. Kun pribilehio nindong makikabtang dian, gibohon iyan na may pasasalamat, kapakumbabaan, asin kagayagayahan.