KAPITULO 10
Mga Paagi Para Mapahiwas an Saimong Ministeryo
KAN panahon na para suguon ni Jesus an saiyang mga disipulo bilang mga parahulit kan Kahadian, sinabi niya sa sainda: “Kadakul kan aanihon, pero kakadikit kan paraani.” Kadakul kan dapat gibuhon, kaya sinabi pa niya: “Makimahirak kamo sa Kagurangnan kan pag-ani na magsugo nin mga trabahador sa saiyang pagpaani.” (Mat. 9:37, 38) Nagtao nin instruksiyon si Jesus sa mga disipulo kun paano gigibuhon an ministeryo ninda. Mahihiling an pagkaapurado sa sinabi niya: “Bago pa nindo matapos na libuton an mga siyudad sa Israel, maabot na an Aki nin tawo.”—Mat. 10:23.
2 Sa ngunyan man, kadakul kan dapat gibuhon sa ministeryo. An maugmang baretang ini kan Kahadian dapat na ikahulit bago mag-abot an katapusan, asin paubos na an panahon! (Mar. 13:10) An huhulitan ta iyo an bilog na kinaban kaya an sitwasyon ta haros kapareho kan ki Jesus asin sa mga disipulo niya. Pero mas dakula an teritoryo ta asin dikit kita kumpara sa bilyon-bilyon na tawo sa kinaban, pero makakasigurado kita na tatabangan kita ni Jehova. An maugmang bareta kan Kahadian ihuhulit sa bilog na daga, asin sa itinalaan na panahon ni Jehova, maabot an katapusan. Iinuton ta daw sa satong buhay an Kahadian nin Diyos tanganing lubos niyatong magibo an satong ministeryo? Anong teokratikong mga pasuhan an puwede tang abuton para magibo iyan?
3 Sinabi ni Jesus kun ano an hinahagad ni Jehova sa nagdusay na mga lingkod Niya: “Kamutan mo si Jehova na saimong Diyos sa bilog mong puso asin sa bilog mong kalag saka sa bilog mong isip pati sa bilog mong kusog.” (Mar. 12:30) Dapat niyatong paglingkudan an Diyos nin bilog niyatong kalag. Buot sabihon, maipapahiling ta na makusog an debosyon ta asin tunay an pagdusay ta ki Jehova pag ginigibo ta an satong pinakamakakaya sa paglilingkod sa saiya. (2 Tim. 2:15) May mga oportunidad na bukas sa lambang saro sa sato depende sa kamugtakan asin kakayahan ta. Pag-isipan an pira sa mga oportunidad na ini, asin pumili ka nin teokratikong mga pasuhan na aabuton mo sa pagsagibo mo kan saimong ministeryo.
PAGLILINGKOD BILANG PARAHAYAG SA KONGREGASYON
4 An gabos na nag-aako kan katotoohan igwa kan pribilehiyong ipahayag an maugmang bareta. Ini an panginot na ipinapagibo ni Jesus sa mga disipulo niya. (Mat. 24:14; 28:19, 20) Sa parati, sinasabi tulos sa iba kan sarong disipulo ni Jesu-Cristo an manungod sa maugmang bareta pagkadangog niya kaiyan. Iyan an ginibo ni Andres, Felipe, Cornelio, asin nin iba pa. (Juan 1:40, 41, 43-45; Gibo 10:1, 2, 24; 16:14, 15, 25-34) Nangangahulugan daw ini na dawa dai pa nababawtismuhan an saro, puwede na niyang sabihon sa iba an manungod sa maugmang bareta? Iyo! Pag makuwalipikar na siya bilang dai pa bawtisadong parahayag sa kongregasyon, puwede na siyang umiba sa pagpapatotoo sa harong-harong. Depende sa saiyang kakayahan asin kamugtakan, puwede man siyang magpartisipar sa iba pang aspekto kan ministeryo.
5 Pagkatapos mabawtismuhan an sarong parahayag, siguradong gustong-gusto niyang gibuhon an bilog niyang makakaya para tabangan an iba na makaaram kan maugmang bareta. An mga lalaki asin babayi pareho may pribilehiyong magpartisipar sa paghuhulit. Sarong bendisyon na makatabang maski sa dikit na paagi sa pagpalakop kan intereses kan Kahadian nin Diyos. Mauugma nanggad an siisay man na makakapahiwas kan saiyang ministeryo paagi sa pagpartisipar sa iba pang mga oportunidad nin paglilingkod.
PAGLILINGKOD KUN SAIN MAS DAKULA AN PANGANGAIPO
6 Tibaad parati nang nahuhulitan an teritoryo kan kongregasyon nindo asin dakul na an napapatotoohan. Kaya iniisip mo gayod na mapapahiwas mo pa an saimong ministeryo paagi sa paglipat sa ibang lugar na mas dakula an pangangaipo. (Gibo 16:9) Kun saro kang elder o ministeryal na lingkod, tibaad may ibang kongregasyon na nangangaipo kan tabang mo. An saindong paraataman nin sirkito puwedeng makatao nin mga suhestiyon kun paano ka makakatabang sa ibang kongregasyon sa sirkito nindo. Kun gusto mong maglingkod sa ibang lugar sa saindong nasyon, makakatao an sangang opisina nin impormasyon na kaipuhan mo.
7 Gusto mong maglingkod sa ibang nasyon? Kun iyo, kaipuhan mong pag-isipan na marhay iyan. Puwede mo iyan ipakipag-ulay sa mga elder sa kongregasyon nindo. An siring na paglipat siyertong dakula an magigin epekto sa saimo asin sa siisay man na kaibanan mo. (Luc. 14:28) Pero kun dai mo man planong maghaloy, tibaad pinakamarahay na pag-isipan mong maglingkod sa ibang lugar sa laog kan nasyon nindo.
8 Sa ibang kadagaan, an mga brother na ginagamit para mangataman sa kongregasyon medyo baguhan pang mga Saksi. An mapakumbabang mga brother na iyan andam na ipabaya sa mas eksperyensiyadong mga elder na naglipat sa kongregasyon ninda an pangangataman. Kun ika sarong elder asin nagpaplanong maglipat sa arog kaiyan na nasyon, tandaan na an katuyuhan mo bakong para maglingkod kasalida kan mga brother sa lokal, kundi para maglingkod kaiba ninda. Dagkahon sinda na maghinguwang magkaigwa asin mag-ako nin mga paninimbagan sa kongregasyon. (1 Tim. 3:1) Magin mapasensiya kun may mga areglong dai nasusunod nin arog kan sa pinaghalian mong nasyon. Gamiton an eksperyensiya mo bilang elder tanganing lubos na makatabang sa mga brother. Sa siring, kun kaipuhan mo nang humali asin bumalik sa nasyon nindo, mas may kakayahan na an lokal na mga elder na pangatamanan an kongregasyon.
9 Bago makapagtao sa saimo an sangang opisina nin pangaran kan mga kongregasyon na puwede mong matabangan, kaipuhan na magpadara an saindong Komite sa Paglilingkod kan Kongregasyon nin surat nin rekomendasyon. Kaipuhan an surat na iyan baga man ika elder, ministeryal na lingkod, payunir, o parahayag. An surat na iyan, kaiba kan saimong personal na surat, direktang ipapadara kan saindong komite sa paglilingkod sa sangang opisina kan nasyon kun sain gusto mong maglingkod.
PAGHUHULIT SA IBANG LENGGUWAHE
10 Tanganing mapahiwas an saimong ministeryo, tibaad puwede mong pag-isipan na mag-adal nin ibang lengguwahe, kaiba an lengguwaheng pasenyas. Kun gusto mong makanuod na maghulit sa ibang lengguwahe, puwede kang makipag-ulay sa mga elder asin sa paraataman nin sirkito. Makakatao sinda nin mga suhestiyon asin pampakusog na kaipuhan mo. Sa superbisyon kan sangang opisina, may mga sirkito na nag-oorganisar nin mga klase sa pag-adal nin lengguwahe para sanayon an may kakayahan na mga parahayag asin payunir na maghulit sa ibang lengguwahe.
PAGLILINGKOD BILANG PAYUNIR
11 Dapat na aram kan gabos na parahayag an mga kahagadan para sa paglilingkod bilang auxiliary, regular, asin espesyal payunir saka sa iba pang klase nin bilog na panahon na paglilingkod. An payunir dapat na sarong arugan na bawtisadong Kristiyano asin nasa kamugtakan na maabot an kahagadan na oras sa paghuhulit kan maugmang bareta. An Komite sa Paglilingkod kan Kongregasyon an nag-aaprubar kan mga aplikasyon para sa paglilingkod bilang auxiliary asin regular payunir, asin an sangang opisina man an nag-aaprubar sa mga espesyal payunir.
12 An mga auxiliary payunir puwedeng aprubaran na maglingkod nin sarong bulan, pirang magkakasunod na bulan, o dagos-dagos, depende sa kamugtakan ninda. Dakul na parahayag kan Kahadian an nag-o-auxiliary payunir sa espesyal na mga okasyon, arog baga sa panahon kan Memoryal o sa bulan kan dalaw kan paraataman nin sirkito. An iba nagpapayunir sa mga bulan nin bakasyon. An mga bawtisado na asin nag-eeskuwelang mga parahayag puwedeng mag-auxiliary payunir pag bakasyon sinda sa eskuwelahan. Puwedeng pillion kan mga ma-auxiliary payunir an mas hababang kahagadan na oras kada Marso asin Abril saka sa bulan kan dalaw kan paraataman nin sirkito. Ano man an saimong sitwasyon, kun marahay an saimong paggawi asin moralidad, maaabot mo an kahagadan na oras, asin naniniwala kang makakapag-auxiliary payunir ka nin sarong bulan o labi pa, mauugma an mga elder na konsideraron an aplikasyon mo para sa pribilehiyong ini nin paglilingkod.
13 Tanganing makuwalipikar na magin regular payunir, dapat nasa kamugtakan kang maabot an taunan na kahagadan na oras. Bilang regular payunir, gusto mong makipagtabangan na marhay sa kongregasyon nindo. An maigot na mga payunir bendisyon sa kongregasyon. Nakakamotibar sinda sa mga tugang na urog pang magin maigot sa ministeryo asin nakakadagka pa ngani sa iba na magpayunir man. Pero bago ka makapag-aplay na magin regular payunir, dapat saro kang arugan na parahayag asin kisiyera anom na bulan nang bawtisado.
14 Sa parati, an mga espesyal payunir pinipili hali sa mga regular payunir na napatunayan nang epektibo sa ministeryo. Dapat na kaya nindang maglingkod sain man sinda idestino kan sangang opisina. Sa parati, ipinapadara sinda sa harayong mga lugar kun sain makakakua sinda nin mga interesado asin makakabilog nin bagong mga kongregasyon. Kun minsan, idinedestino sinda sa mga kongregasyon na nangangaipo nin tabang para makobrehan an saindang teritoryo. An ibang espesyal payunir na elder inaasignaran na tumabang sa sadit na mga kongregasyon dawa ngani dai iyan nangangaipo nin dagdag na parahulit. Nakakaresibi an mga espesyal payunir nin katamtaman na allowance para sa mga gastuson sa aroaldaw. May nagkapira na inaasignaran bilang temporaryong espesyal payunir.
MGA MISYONERO
15 An Service Committee kan Namamahalang Grupo an nag-aaprubar nin mga misyonero, na idinedestino kan lokal na Komite kan Sangay sa mga lugar na dakula an populasyon. Dakula an naitatabang ninda para pakusugon asin pauswagon an paghuhulit saka an mga aktibidad kan kongregasyon. An kadaklan sa mga misyonero sinanay sa School for Kingdom Evangelizers. May probisyon na istaran para sa sainda asin nakakaresibi sinda nin katamtaman na allowance para sa mga gastuson sa aroaldaw.
PANSIRKITONG GIBUHON
16 An mga pignonombrahan kan Namamahalang Grupo na magin mga paraataman nin sirkito sinasanay nguna para magkaigwa nin eksperyensiya paagi sa paglilingkod bilang kasalihid na paraataman nin sirkito. Gustong-gusto ninda an ministeryo asin namumutan ninda an saindang mga tugang. Maigot sindang mga payunir, mahigos na paraadal kan Bibliya, asin epektibong ispiker saka paratukdo. Marahayon sindang halimbawa sa pagpahiling kan mga aspekto kan bunga kan espiritu. Timbang man sinda, rasonable, saka may pakasabot. Kun may agom an paraataman nin sirkito, an agom niyang payunir arugan sa paggawi asin pagtratar sa iba. An agom sarong epektibong parahulit. Nasasabutan man niya an papel niya bilang mapagpasakop na Kristiyanang agom, na dai pinapanginutan an agom niya asin dai pinapangibabawan an mga urulay. Sibot an iskedyul kan mga paraataman nin sirkito asin kan agom ninda, kaya dapat na marahay an salud kan mga gustong maglingkod sa gibuhon na ini. An mga payunir dai nag-aaplay para sa pansirkitong gibuhon. Imbes, sinasabi ninda sa saindang paraataman nin sirkito an pagmawot nindang maglingkod sa gibuhon na iyan, na iyo man an matao sainda nin mga suhestiyon.
TEOKRATIKONG MGA PAADALAN
17 School for Kingdom Evangelizers: Nangangaipo nin dakul pang ebanghelisador kan Kahadian para mahulitan an mga teritoryo na bihirang madumanan saka para matabangan sa espirituwal an mga kongregasyon. Kaya an mga mag-agom saka an mga brother asin sister na daing agom puwedeng mag-aplay para matawan nin espesyal na pagsasanay sa School for Kingdom Evangelizers. An mga naggradwar idinedestino bilang mga regular payunir sa mga lugar sa saindang nasyon kun sain mas dakula an pangangaipo. Pero may mga tinatawan man nin ibang asignasyon sa sadiri nindang nasyon o sa ibang nasyon, kun andam sindang akuon iyan. May mga nadedestino bilang temporaryo o permanenteng espesyal payunir. Para maaraman an mga kuwalipikasyon, an mga payunir puwedeng mag-atender sa miting para sa mga interesadong mag-adal sa SKE na ginigibo sa mga pangrehiyon na kumbensiyon.
18 Watchtower Bible School of Gilead: An mga brother asin sister na daing agom saka mga mag-agom na pinipili para mag-adal digdi nakakataram nin Ingles saka nasa espesyal na bilog na panahon na paglilingkod. Puwede sindang makatabang na mas mapauswag asin magin organisado an gibuhon sa langtad o sa sangay. Napatunayan na ninda na gusto talaga nindang maglingkod sa mga tugang asin kaya nindang tabangan an iba sa mabuot na paagi na manudan saka sunudon an mga instruksiyon kan Kasuratan asin kan organisasyon. Iniimbitaran kan lokal na Komite kan Sangay an potensiyal na mga estudyante na magsumitir nin aplikasyon. An mga naggradwar sa paadalan na ini idinedestino sa langtad o sa sangang opisina sa ibang nasyon o sa sadiri nindang nasyon.
PAGLILINGKOD SA BETHEL
19 Sarong espesyal na pribilehiyo an paglilingkod sa Bethel. An Bethel nangangahulugan na “Harong nin Diyos,” asin angay nanggad an apod na iyan sa mga sentrong ini nin teokratikong aktibidad. An mga tugang na naglilingkod sa Bethel igwa nin mahalagang marhay na gibuhon may koneksiyon sa paggibo, pagtradusir, asin pagpadara nin mga literatura na basado sa Bibliya. An paglilingkod ninda dakulaon na tabang para sa Namamahalang Grupo, na nangangataman asin naggigiya sa mga kongregasyon sa bilog na daga. Dakul na Bethelite na translator an nakaistar asin naglilingkod sa mga lugar sa laog kan teritoryo kan sangay kun sain ginagamit an lengguwahe na pigtatradusir ninda. Kaya nadadangog ninda kun paano itinataram an lengguwaheng iyan sa aroaldaw na pamumuhay. Nahihiling man mismo ninda kun baga nasasabutan kan mga tawo an lengguwahe na ginamit ninda sa pigtatradusir na mga publikasyon.
20 Magabat na trabaho an kadaklan na ginigibo sa Bethel. Kaya sa panginot, an mga inaapod para maglingkod sa Bethel mga nagdusay asin bawtisadong hoben na mga brother, marahay an salud, asin makusog an hawak. Kun may pangangaipo sa sangang opisina na nangangataman sa nasyon nindo asin gusto mong maglingkod sa Bethel, puwede mong aramon sa mga elder sa kongregasyon nindo an manungod sa mga kuwalipikasyon.
PAGLILINGKOD SA MGA PROYEKTO NIN PAGTUGDOK
21 An pagtugdok nin teokratikong mga pasilidad sarong klase nin sagradong paglilingkod, kapareho kan pagtugdok kan templo ni Solomon. (1 Ha. 8:13-18) Dakul na brother asin sister an nagpapahiling nin pambihirang kaigutan paagi sa paggamit kan saindang panahon asin mga pagsadiri para magtabang sa gibuhon na ini.
22 Puwede ka daw na tumabang? Kun ika bawtisadong parahayag asin gustong magtabang sa gibuhon na ini, papahalagahan kan mga brother na nangangataman sa pagtugdok sa saindong lugar an tabang mo asin handa sindang sanayon ka dawa mayo kang gayong aram sa pagtugdok. Sabihon sa mga elder nindo na puwede kang tumabang. An ibang bawtisadong parahayag na nakuwalipikar nakapagboluntaryo pa ngani sa pagtugdok nin teokratikong mga pasilidad sa ibang nasyon.
23 Kadakul nin oportunidad para makapaglingkod sa mga proyekto nin pagtugdok. Puwedeng maglingkod bilang mga Local Design/Construction volunteer an arugan na bawtisadong mga parahayag na makakasuportar sa mga proyekto na harani sa sainda, dawa dikit an kakayahan ninda. An iba nagtatabang sa mas hararayong proyekto sa halipot na panahon asin inaasignaran sinda kan sangang opisina na maglingkod bilang mga construction volunteer sa laog nin duwang semana sagkod tulong bulan. An mga naasignaran na maglingkod nin halawig na panahon inaapod na mga construction servant. An construction servant na idinedestino sa ibang nasyon naglilingkod bilang expatriate construction servant. An sarong Construction Group, na kompuwesto nin mga construction servant asin mga construction volunteer, an nanginginot sa kada proyekto. Tinatabangan sinda kan mga Local Design/Construction volunteer asin kan mga boluntaryo hali sa mga kongregasyon na kaiba sa proyekto. Kada may matapos na proyekto, an mga Construction Group minalipat naman sa sunod na proyekto sa laog kan teritoryo kan sangay.
ANO AN ESPIRITUWAL NA MGA PASUHAN MO?
24 Kun idinusay mo na ki Jehova an saimong buhay, nangangahulugan iyan na gusto mo siyang paglingkudan habangbuhay. Pero ano an espirituwal na mga pasuhan mo? Kun igwa ka nin espirituwal na mga pasuhan, magagamit mo sa madunong na paagi an saimong kusog asin iba pang bagay na igwa ka. (1 Cor. 9:26) Makakatabang man iyan saimo na umuswag an saimong espirituwalidad asin makapagpokus ka sa mas mahalagang mga bagay mantang naghihinguwa kang abuton an dagdag na mga pribilehiyo sa paglilingkod.—Fil. 1:10; 1 Tim. 4:15, 16.
25 Nagtao nin marahayon na halimbawa si apostol Pablo na puwede tang arugon sa satong paglilingkod sa Diyos. (1 Cor. 11:1) Naglingkod siya ki Jehova sa abot kan saiyang makakaya. Nahiling niya na tinawan siya ni Jehova nin dakul na oportunidad. Nagsurat si Pablo sa mga tugang sa Corinto: “Sarong dakulang pinto para sa gibuhon an nabuksan sa sako.” Bako daw na totoo man iyan sa sato? Iyo, dakul an oportunidad ta na mapaglingkudan si Jehova kaiba kan kongregasyon, lalo na sa paghuhulit kan maugmang bareta kan Kahadian. Pero arog kan naeksperyensiyahan ni Pablo, kaiba sa paglaog sa “dakulang pinto” na iyan an pag-atubang sa ‘kadakul na parakontra.’ (1 Cor. 16:9) Handa si Pablo na disiplinahon an sadiri niya. Mangnuha an sinabi niya: “Linalanog ko an sakuyang hawak asin ginigibo iyan na magin siring sa uripon.” (1 Cor. 9:24-27) Arog man daw kaiyan an kaisipan ta?
Kun igwa ka nin espirituwal na mga pasuhan, magagamit mo sa madunong na paagi an saimong kusog asin iba pang bagay na igwa ka
26 An kada saro dinadagka na maghinguwang umabot nin teokratikong mga pasuhan depende sa saiyang kamugtakan sa buhay. Dakul an nasa bilog na panahon na paglilingkod ngunyan huling may teokratikong mga pasuhan na sinda kan aki pa. Dawa mga aki pa, dinagka na sinda kan mga magurang ninda asin kan iba na gibuhon iyan. Huli kaiyan, maugmahon asin mabungang marhay sinda sa paglilingkod ki Jehova—asin mayo sindang pinagbasulan. (Tal. 10:22) May iba pang marahayon na magin mga pasuhan ta arog kan pag-iba sa paglilingkod sa langtad kada semana, pagpuon asin pagkondukta nin pag-adal sa Bibliya, o pagtao nin mas dakul na panahon sa pag-andam para sa mga pagtiripon. An importante, magdanay kitang marigon asin lubos na utubon niyato an satong ministeryo. Kun gigibuhon ta iyan, matatawan niyato nin onra si Jehova asin maaabot ta an satong pinakapasuhan, an maglingkod saiya sagkod pa man.—Luc. 13:24; 1 Tim. 4:7b, 8.