Mga Hoben—Ano an Gigibohon Nindo sa Saindong Buhay?
“GUSTO kong makamtan an pinakamarahay sa buhay.” Iyan an sabi nin sarong daragita. Daing duwa-duwa na iyan man an gusto nindo. Alagad paano nanggad nindo makakamtan an “pinakamarahay” sa buhay? Tibaad sinasabi kan media asin kan mga kaedad nindo, tibaad pati kan mga maestro nindo, na iyan gikan sa pakakua nin dakol na kuarta asin pagkaigwa nin maimpluwensiang karera—sa pagigin asensado!
Minsan siring, pinatatanidan kan Biblia an mga hoben na an pagmamaigot na kamtan an materyal na pag-asenso saro sanang “paglapag sa doros.” (Eclesiastes 4:4) Sarong bagay, pipira sanang hoben an talagang nagkakamit nin kayamanan asin kabantogan. An mga nagkakamit kaiyan parate na nadedesganar na marhay. “Garo iyan kahon na daing laog,” sabi nin sarong hoben na Britano na nagmaigot na magkaigwa nin maimpluwensiang karera akademiko. “Pagheling mo sa laog, basiyo iyan.” Totoo, an trabaho kun beses nagtatao nin kayamanan asin pagrekonoser kan publiko. Alagad dai kaiyan mapaninigoan an “espirituwal na pangangaipo” nindo. (Mateo 5:3) Apuera kaiyan, nagpapatanid an 1 Juan 2:17 na “an kinaban maagi sana.” Dawa kun kamo mag-asenso sa kinaban na ini, iyan magigin temporaryo sana.
Sa siring, an mga hoben sinasadol kan Eclesiastes 12:1: “Girumdoma an saimong Kaglalang mantang ika hoben pa.” (Today’s English Version) Iyo, an pinakamarahay na paagi na gamiton nindo an saindong buhay iyo an maglingkod ki Jehova Dios. Alagad enot, dapat na kamo magin kualipikadong maglingkod sa Dios. Paano nindo magigibo iyan? Asin ano an kalabot sa buhay na naglilingkod sa Dios?
Pagkualipikar na Magin Saksi ni Jehova
Primero, dapat na kultibaron nindo an kamawotan na maglingkod sa Dios—asin an kamawotan na iyan bakong automatiko, dawa kun Kristiano an saindong mga magurang. Dapat na kamo magkaigwa kan sadiri nindong relasyon ki Jehova. “An pamimibi nakatatabang sa saimo na magkaigwa kan sadiri mong relasyon ki Jehova,” sabi nin sarong daragita.—Salmo 62:8; Santiago 4:8.
Isinesentro kan Roma 12:2 an atension sa saro pang aksion na dapat nindong gibohon. Sinasabi kaiyan: ‘Patunayan nindo sa saindong sadiri kun ano an marahay asin inaako patin sangkap na kabotan nin Dios.’ Narisa na daw nindo na may pagduda kamo sa nagkapirang itinokdo sa saindo? Kun siring, sunodon an sadol kan Biblia, asin ‘patunayan sa saindong sadiri’ na totoo an mga bagay na ini! Magsiyasat mismo kamo. Basahon an Biblia asin an mga publikasyon na basado sa Biblia. Pero an pakanood manongod sa Dios bako sanang sa isip. Tawan nin panahon an paghorophorop kan binabasa nindo tangani na iyan makaabot sa saindong piguratibong puso. Patataluboon kaini an pagkamoot nindo sa Dios.—Salmo 1:2, 3.
Sunod, probaran na ipaabot sa impormal na paagi an saindong nanonodan, tibaad sa mga kaeskuela nindo. An sunod na tangga paghuhulit sa harong-harong. Tibaad masabatan nindo kun minsan an sarong kaeskuela mantang kamo naghuhulit, asin tibaad nerbioson kamo sa primero. Alagad sinasadol kita kan Biblia na dai ‘ikasupog an maogmang bareta.’ (Roma 1:16) An dara nindo mensahe nin buhay asin paglaom! Taano ta ikakasupog iyan?
Ngonyan, kun Kristiano an saindong mga magurang, tibaad minaiba na kamo sa sainda sa gibohon na ini. Alagad kaya na daw nindong gumibo nin labi sa pagtindog sana nin daing girong o pagwaras sana nin mga magasin asin pulyeto? Kaya na daw nindong makipag-olay mismo, na ginagamit an Biblia sa pagtokdo sa kagharong? Kun dai pa, patabang sa saindong mga magurang o sa sarong maygurang na miembro kan kongregasyon. Gibohon na pasohan nindo na makualipikar bilang dai pa bautisadong parahayag kan maogmang bareta!
Pag-abot nin panahon, mapahihiro kamong magdusay—na nagpopromesa sa Dios na poon sa panahon na iyan maglilingkod na kamo sa saiya. (Roma 12:1) Minsan siring, an pagdusay bako sanang pribadong bagay. Hinahagad nin Dios sa gabos na ‘magpahayag sa publiko para sa kaligtasan.’ (Roma 10:10) Sa panahon nin bautismo, enot matao kamo nin berbal na kapahayagan kan saindong pagtubod. An masunod bautismo sa tubig. (Mateo 28:19, 20) Totoo, seryosong aksion an pagpabautismo. Alagad dai pagpogolan an saindong sadiri ta iniisip nindo na tibaad kamo magkulang maski paano. Kun madepende kamo sa Dios na tawan kamo nin kosog, tatawan nia kamo kan “puersa na labi sa ordinaryo” tanganing tabangan kamo na marigon na makapanindogan.—2 Corinto 4:7; 1 Pedro 5:10.
Sa panahon nin bautismo, kamo nagigin saro sa Mga Saksi ni Jehova. (Isaias 43:10) Ini maninigong magkaigwa nin pambihirang epekto sa kun paano nindo gagamiton an saindong buhay. Kalabot sa pagdusay an ‘pagpainda sa saimong sadiri.’ (Mateo 16:24) Tibaad talikdan nindo an nagkapirang personal na pasohan saka ambisyon asin ‘hanapon nguna an kahadean nin Dios.’ (Mateo 6:33) Sa siring, binubuksan kan pagdusay asin bautismo an dakol na oportunidad na gibohon iyan. Estudyaran niato an nagkapira dian.
Mga Oportunidad na Maglingkod sa Dios nin Bilog na Panahon
● An pagpapayunir saro sa siring na oportunidad. An parahayag na payunir arogan na bautisadong Kristiano na nag-areglo na gumamit nin sa pinakahababa 70 oras kada bulan sa paghuhulit kan maogmang bareta. An paggamit nin mas dakol na oras sa langtad matabang sa saindo na mapatalubo an abilidad nindo sa paghuhulit asin pagtotokdo. Dakol na payunir an nakaeksperyensia kan kagayagayahan na tabangan an mga inaadalan ninda sa Biblia na magin bautisadong mga Saksi. Anong sekular na trabaho an nakaoogma asin nakakokontento arog kaiyan?
Tanganing masustentohan an mga gastos ninda, an kadaklan na payunir may trabahong por ora sana. Dakol an nagpaplano na para sa paninimbagan na ini paagi sa pag-adal nin magigin hanap-buhay sa eskuelahan o sa saindang mga magurang. Kun hinohona nindo asin kan saindong mga magurang na may bentaha na kamo mag-ako nin suplementaryong pagtotokdo pakatapos sa sekondarya, seguradohon na an motibo nindo, bakong makakua nin dakol na kuarta, kundi suportaran an saindong ministeryo asin tibaad maglingkod bilang bilog na panahon na ministro.
Minsan siring, an sentro kan buhay nin sarong payunir, bakong an sekular niang trabaho, kundi an saiyang ministeryo—na tinatabangan an iba na magkamit nin buhay! Taano ta dai gibohon na personal na pasohan an pagpapayunir? An pagpapayunir parateng nagbubunga nin ibang pribilehio. Halimbawa, an nagkapirang payunir minabalyo sa mga lugar na mas dakula an pangangaipo para sa mga parahayag kan Kahadean. An iba nag-aadal nin ibang lenguahe asin naglilingkod magsalang sa sarong lokal na kongregasyon na iba an lenguahe o sa ibang nasyon pa ngani. Iyo, an pagpapayunir nakakokontentong pamumuhay!
● An School for Kingdom Evangelizers saro pang pinto nin oportunidad. An duwang bulan na paadalan na ini dinisenyo para magsanay nin eksperyensiadong mga payunir na andam na maglingkod sa ibang lugar na kaipuhan sinda. Garo man sana sinasabi ninda, ‘Uya ako, sugoa ako!’ bilang pag-arog sa pinakanangongorog na Ebanghelisador na naglingkod sa daga, si Jesu-Cristo. (Isaias 6:8; Juan 7:29) An pagbalyo sa harayong lugar puedeng mangaipo nin pagpasimple nin pamumuhay. Tibaad ibang-iba sa kinatodan an kultura, klima, asin mga kakanon duman. Posible nganing kaipuhan pang mag-adal nin ibang lenguahe. Tinatabangan kan paadalan na ini an daing agom na mga brother asin sister saka an mga mag-agom, na edad 23 sagkod 65, na magkaigwa kan espirituwal na mga kualidad na kakaipuhanon sa saindang asignasyon asin kan mga kakayahan na makakatabang tanganing lubos sindang magamit ni Jehova asin kan saiyang organisasyon.
● An paglilingkod sa Bethel paglilingkod bilang boluntaryo sa saro sa mga sanga kan Mga Saksi ni Jehova. An ibang miembro kan pamilyang Bethel direktamenteng naglilingkod sa pagprodusir nin mga babasahon sa Biblia. An iba man tinatawan nin mga asignasyon na nagtatao nin suporta, arog baga kan mantension nin mga edipisyo asin kasangkapan o pag-asikaso sa pisikal na mga pangangaipo kan pamilyang Bethel. An gabos na asignasyon sagradong pribilehio nin paglilingkod ki Jehova. Dugang pa, an mga yaon sa Bethel may kagayagayahan sa pakaaram na ano man an ginigibo ninda, iyan nagtatao nin pakinabang sa dakol nindang tugang sa bilog na kinaban.
Kun beses iniimbitaran na maglingkod sa Bethel an mga tugang na may espesyal na mga abilidad. Minsan siring, an kadaklan tinotokdoan na sana pag-abot ninda. An mga yaon sa Bethel dai naglilingkod para sa materyal na pakinabang kundi kontento na sa itinataong mga probisyon para sa kakanon, istaran, asin kadikit na pag-embolsar sa personal na mga gastos. Arog kaini an pagkaladawan nin sarong hoben na miembro kan pamilyang Bethel sa saiyang paglilingkod: “Marahayon iyan! Bakong madali an rutina, alagad kadakol kan inako kong bendisyon sa paglilingkod digdi.”
● An construction service nagtatao nin oportunidad na an saro makatabang sa pagtogdok nin mga pasilidad kan sangang opisina asin Kingdom Hall. An mga construction servant, na iyo an apod sa sainda, nagtatabang sa pagtogdok na iyan. Ini sarong klase nin sagradong paglilingkod, kaagid kan ginibo kan mga nagtogdok kan templo ni Salomon. (1 Hade 8:13-18) An mga areglo sa pag-asikaso sa mga construction servant kaagid kan sa pamilyang Bethel. Abaa kadakula kan pribilehio kan mga tugang na lalaki asin babaeng ini na maglingkod sa linyang ini nin aktibidad sa ikaoomaw ni Jehova!
Maglingkod ki Jehova nin Bilog na Kalag
An paglilingkod ki Jehova iyo an pinakamarahay na paagi nin paggamit kan saindong buhay. Taano ta dai isipon na gibohon na personal na pasohan an maglingkod sa Dios nin bilog na panahon? Ipakipag-olay an bilog na panahon na paglilingkod sa saindong mga magurang, sa lokal nindong kamagurangan, asin sa saindong paraataman sa sirkito. Kun interesado kang maglingkod sa Bethel o mag-adal sa School for Kingdom Evangelizers, umatender sa miting para sa potensial na mga aplikante na ginigibo sa mga pangrehion na kombension.
Totoo, bakong gabos puedeng makualipikar o makapaglingkod nin bilog na panahon. Kun beses nalilimitaran nin mga problema sa salud, pinansial na situwasyon, asin obligasyon sa pamilya an magigibo nin saro. Dawa siring, dapat na himateon kan gabos na nagdusay na Kristiano an pagboot kan Biblia: “Kamotan mo si Jehova na saimong Dios sa bilog mong puso asin sa bilog mong kalag patin sa bilog mong isip.” (Mateo 22:37) Hinahagad ni Jehova na gibohon nindo an pinakamakakaya nindo depende sa saindong kamugtakan. Kaya ano man an situwasyon nindo, gibohon na sentro kan buhay nindo an paglilingkod ki Jehova. Magbugtak nin realistikong mga pasohan na teokratiko. Iyo, “girumdoma an saimong Kaglalang mantang ika hoben pa”—asin bebendisyonan ka sagkod lamang sa paggibo mo kaiyan!
Apuwera sana kun may ibang tanda, an gabos na kotasyon sa Biblia trinadusir hali sa New World Translation of the Holy Scriptures.