Puede daw Kamong Magpresentar?

¹ May sarong ekstraordinaryong pangyayari kaidtong taon 778 B.C.E. Sa bisyon, naheling ni propeta Isaias “si Jehova, na nagtutukaw sa trono na halangkaw asin nasa itaas.” Dangan nadangog ni Isaias an mga serafin na nag-aapod nin atension sa kamurawayan ni Jehova, na nagsasarabi: “Banal, banal, banal si Jehova nin mga hukbo.” Kanigoan kanakapupukaw nin may pagkangirhat na paggalang iyan! Sa kamugtakan na iyan, itinatao ni Jehova an sarong mapan-angat na hapot: “Siisay an sakong susugoon, asin siisay an maduman para sa samo?” Mayong itinataong paliwanag manongod sa kun anong klase an asignasyon o kun baga makikinabang dian an sarong nagboboluntaryo. Pero, daing pag-alangan na si Isaias nagsimbag: “Uya ako! Sugoa ako.”​—Isa. 6:​1, 3, 8.

² An espiritung ini nin pagigin andam na gibohon an ano man na hinahagad ni Jehova karakteristiko kan saiyang banwaan. (Sal. 110:3) Asin ngonyan may itinataong pangapodan sa mga puedeng magpresentar. Andam daw kamong sumimbag na may espiritu nin pagigin gikan sa boot, na kaagid kan ki Isaias?

³ May padagos na pangangaipo para sa mga tugang na lalaki na maglingkod sa Bethel. Ini naghahagad na sinda igwa nin makosogon na pagmawot na enoton an intereses kan Kahadean asin andam na gibohon an ano man na tibaad hagadon tangani na masuportaran an paghuhulit sa bilog na kinaban. (Mat. 6:​33) Sa katunayan, an paglilingkod bilang miembro kan pamilyang Bethel nagtatao sa saro nin espesyal na oportunidad na paglingkodan si Jehova sa bilog na kalag. Taano man?

⁴ An Ginigibo sa Bethel: Isip-isipa an gabos na regular na ginigibo sa tolong lokasyon kan Bethel sa Estados Unidos, na nasa Brooklyn, Patterson, asin Wallkill, Nueva York. An 5,730 tugang na lalaki asin babae na minakompuesto kan pamilyang Bethel sa tolong lugar na ini igwang pribilehio na magin imbueltong marhay sa pagprodusir nin mga Biblia asin babasahon sa Biblia na gagamiton sa pambilog na kinaban na langtad asin sa personal na pag-adal. (Mat. 24:45) Halimbawa, kaining nakaaging taon nin paglilingkod, 24,364,670 libro, 39,813,464 pulyeto asin brosyur, 270,528,000 na magasin, asin 1,271,041 audiocassette an naprodusir asin ikinapaktora bilang resulta kan pinag-iribang paghihingoa kan pamilyang Bethel sa Estados Unidos. Digdi sa Pilipinas, 360 miembro kan pamilyang Bethel sa Quezon City an bako sanang nakikabtang sa pagprodusir nin labing 10,000,000 na magasin durante kan nakaaging taon nin paglilingkod, kundi an labing 60 miembro sa departamento nin pagtradusir nagtradusir nin mga libro asin brosyur sa pitong tataramon tanganing ini maprodusir paagi sa composition asin ikapadara sa sangang opisina sa Hapon tangani na imprentahon. Sa bilog na kinaban igwa nin labing 1,900 na paratradusir asin pinoprodusir an mga babasahon sa labing 300 na tataramon. Dakol na gikan sa boot na boluntaryo an kaipuhan sa pag-imprenta asin pagpaktora nin mga babasahon, paglinig, mantension, pagluto nin kakanon, pamamakal, pag-ataman sa salud, asin dakol pang ibang trabaho sa Bethel.

⁵ An paggibo kan gabos na trabahong ini sarong dakulaon alagad nakakokontento sa espirituwal. Nagbubunga nin dakulang kagayagayahan an pakaaram na an gabos niatong kosog asin enerhiya ginagamit tangani na masuportaran an paghuhulit asin pagtotokdo. An paglilingkod sa Bethel nakakatabang sa sato na mamidbid an organisasyon ni Jehova sa mas dakol pang detalye kaiyan. Ipinagigirumdom sa sato na inenkaminar kaidto kan salmista an mga Israelita na orog pang magin pamilyar sa daganon na sentro nin teokratikong pamamahala kan kaaldawan ninda.​​—Sal. 48:​12, 13.

⁶ An mga Bendisyon sa Paglilingkod sa Bethel: Ano an saboot kan mga naglilingkod sa Bethel manongod sa saindang mga pribilehio nin paglilingkod? Mangnoha an minasunod na mga komento hale sa hoben sagkod may edad nang mga miembro kan pamilyang Bethel. An sarong miembro kan pamilyang Bethel na tolong taon na sa paglilingkod sa Bethel nagkomento: “An pagigin nasa Bethel nagpakosog kan sakong relasyon ki Jehova. Mientras na naghahaloy ako sa paglilingkod digdi asin mientras na nagdadakol an nanonodan ko manongod sa kun paano nagpupunsionar an Bethel, mas dakol man an itinotokdo kaiyan sa sako manongod sa personalidad ni Jehova. An paglilingkod sa Bethel nagbukas man kan sakong mga mata tangani na maheling na ginagamit ni Jehova an mga tawo​—gabos na klase nin tawo. Asin dai nindo kaipuhan na magin sangkap tangani na magin akseptable sa saiya.”

⁷ Nagigirumdoman nin sarong hoben na tugang na lalaki: “Nagigirumdoman ko na napag-isip-isip ko, ‘Kanigoan karahay na makalaog sa bagong kinaban asin sabihon sa fiel na mga tawo kan suanoy na ako naglingkod nin dakol na taon sa Bethel, bakong sa luwas tangani na magpayaman.’”

⁸ An sarong hoben na tugang na lalaki naghorophorop sa pagsasanay na inako nia: “An pakamidbid sa sakong sadiri asin pakanood kun ano an kaipuhan kong paoswagon dangan pagpatalubo kan mga kualidad na iyan nagin dakulang bendisyon. Naniniwala ako na ngonyan mas nakapaglilingkod ako ki Jehova. Nadiskobre ko na ako orog pang nagin mapasensia, nagkaigwa nin orog pang pagpopogol sa sadiri, asin ako nakapagpapaheling nin orog na pagkamoot.”

⁹ An sarong tugang na babae nag-isip-isip manongod sa mga bendisyon sa saiya sagkod ngonyan: “An espirituwal na mga programa digdi tinokdoan ako nin dakol pa manongod ki Jehova asin kun paano ko sia maaarog nin orog pa sa kaisipan, saboot, asin paghiro. Asin huling nagpapadagos an pagsasanay, iyan nagpapadagos man na bendisyon.”

¹⁰ An sarong tugang na lalaki na nagdusay nin total na 59 taon sa bilog na panahon na ministeryo, na labing 43 kan mga taon na iyan sa Bethel, nagsabi: “An Bethel bakong siring sa sarong monasteryo, na tibaad iniisip nin nagkapira. Dakol kaming nagigibo huli sa samong nakaiskedyul na pamumuhay. . . . Mayo nin aldaw na ako nagtrabaho asin dai ikinaogma an ginibo ko. Taano? Huli ta kun bilog na kalag na itinatao niato an satong panahon asin kosog para ki Jehova, kita may satispaksion sa pakaaram na ‘an ginibo niato iyo an dapat niatong gibohon.’”​—Luc. 17:10.

¹¹ An saro pang tugang na lalaki, na naglingkod sa Bethel sa laog nin 62 na taon, nagsabi: “Marigon akong naniniwala na an Bethel iyo an pinakamarahay na lugar sa daga bago dumatong an daganon na Paraiso. Nungka kong pinagbasolan ni sarong segundo an paggibo sa bilog na panahon na paglilingkod na magin sakong karera sa bilog na buhay. Kanigoan na kagayagayahan na maheling mismo asin makikabtang sa dakulang pag-oswag kan daganon na organisasyon ni Jehova! Determinasyon ko, sa tabang ni Jehova, na padagos na gibohon an Bethel na mani sakong harong asin magmaigot nin bilog na kalag sa pagpalakop kan intereses kan Kahadean.”

¹² Nasambitan kan mga miembrong ini kan pamilyang Bethel an pipira sana sa dakol na bendisyon na puede nindong makamtan kun magpepresentar kamo para sa paglilingkod sa Bethel. Alagad kun paanong totoo sa pag-ako nin ano man na pribilehio nin paglilingkod, dapat nguna nindong maabot an mga kualipikasyon. Ano an nagkapira sa mga kahagadan tangani na maglingkod bilang miembro kan pamilyang Bethel?

¹³ Mga Kahagadan Para sa Paglilingkod sa Bethel: An pundamental na mga kahagadan sa mga nag-aaplay para sa paglilingkod sa Bethel ipinaheheling sa kaibanan na kahon. Saro pa, mahalaga na sinda andam na magtrabaho nin mahigos, bakong “mga mamomoton sa kasingawan.” (2 Tim. 3:4; 1 Cor. 13:11) Maninigo na an mga miembro kan pamilyang Bethel espirituwal na mga lalaki asin babae na nagpatalubo nin marahay na ugale sa personal na pag-adal asin sinanay an saindang kakayahan nin pakamansay na “mamidbid kun ano an tama asin sala.” (Heb. 5:14) Maninigo na ikinapaheling na ninda an Kristianong pagkamaygurang sa gabos na kabtang nin buhay, kabale an saindang paggubing, pag-alinyar, asin pagpili nin musika patin pag-aling-aling. An andam an puso na mga miembro kan pamilyang Bethel naglilingkod saen man sinda tibaad kaipuhan. Sa parate an hoben na mga miembro tinatawan nin mga asignasyon may koneksion sa pisikal na trabaho, kaiba an pag-imprenta, pag-andam asin pagpaktora nin mga babasahon, mantension, pag-asikaso kan erokan, paglinig, paglaba, asin pagluto nin kakanon. (Tal. 20:29) Pero, bakong arog nin sekular na trabaho, an kada asignasyon nagtatao nin dakulang pagkakontento huli ta iyan sagradong paglilingkod na nagtatao nin kamurawayan ki Jehova.​—Col. 3:23.

¹⁴ Sarong taon an minimum na pag-istar para sa mga inimbitaran sa paglilingkod sa Bethel. Ini nagpapangyari sa sainda na masanay na magin mabungang mga trabahador. Linalaoman na mahihimo nindang gibohon an Bethel na magin saindang harong. Pagkamoot ki Jehova an nagpapahiro sa mga miembro kan pamilyang Bethel na enoton an gibohon na pan-Kahadean kisa personal na intereses, na nakapaoogma ki Jehova.​—Mat. 16:24.

¹⁵ Mga Pangangaipo sa Presente: Huli sa klase kan trabaho sa Bethel sa Pilipinas, sa presente an samong kinakaipuhan sa pangenot daing agom na mga tugang na lalaki. Tinatawan nin prioridad an mga regular payunir, huling sinda nasa bilog na panahon na gibohon na. Kun beses puedeng may mga pangangaipo para sa mga tugang na babae na daing agom asin mga mag-agom poon 19 sagkod 35 anyos na tibaad may mga abilidad na kaipuhan sa Bethel. Saro pa, ineenkaminar na mag-aplay an mga tugang na lalaki asin babae na tibaad matua sana nin kadikit sa 35 asin may espesyalisadong abilidad asin pagsasanay na puedeng magamit sa Bethel. Halimbawa, kabale digdi an mga doktor, inhenyero, rehistradong nars, o mekaniko nin auto, sa pagsambit nin pira sana. Minsan siring, dai niamo ineenkaminar an mga indibiduwal na kumua nin espesyalisadong edukasyon o pagsasanay huli sa pag-isip na ini makadadagdag sa tsansa ninda na apodon sa Bethel. An mga igwa na nin espesyalisadong pagsasanay, tibaad bago makaaram kan katotoohan, tibaad gustong sumurat nin detalyadong résumé asin iiba iyan sa Bethel Information Sheet pag-ipinadara ini.

¹⁶ Kun gusto nindong maglingkod sa Bethel, puede kamong humagad nin Bethel Information Sheet sa sangang opisina. Ini maninigong llenaran asin itao sa komite sa paglilingkod kan kongregasyon tangani na ipadara sa sangang opisina. Kun may kinakaipuhan na tabang sa Bethel, mapili hale sa mga Information Sheet na nasa file asin padadarahan nin Bethel Application an mga puedeng makatabang sa pangangaipo. Kun dai kamo inimbitaran pakalihis nin saro o duwang taon, marahay na sumurat giraray asin mag-aplay liwat kamo tanganing maaraman mi na kamo nasa kamugtakan pa na magdigdi sa Bethel. Bakong gabos maaapod sa Bethel, kaya kun dai kamo inapod, kun siring ipadagos an paglilingkod nindo bilang payunir sa saindong asignasyon, na nagtitiwala na aram ni Jehova kun saen kamo makakagibo nin pinakadakol na karahayan.

¹⁷ Sarong daing kaagid na pribilehio para sa mga nagtatrabaho sa Bethel an paglilingkod ki Jehova kairibaiba kan haloy nang mga lingkod ni Jehova. Inaapresyar kan Namamahalang Grupo an mapagsakripisyong espiritu kan gabos na nagpepresentar na maglingkod sa mga pangangaipo kan satong kasararoan nin magturugang sa bilog na kinaban.​​—Fil. 2:​20-​22; 2 Tim. 4:​11.

¹⁸ Mga Hoben​—Andamon an Saindong Sadiri Ngonyan Para sa Paglilingkod sa Bethel: An pag-andam para sa paglilingkod sa Bethel nagpopoon haloy pa bago maabot an minimum na kahagadan na 19 anyos. Ano an puedeng gibohon nin mga hoben tangani na ikaandam an saindang sadiri para sa paglilingkod sa Bethel? Si Jesus nagsabi: “Siisay sa saindo na boot na magtogdok nin torre an dai nguna minatukaw asin kinukuenta an gastos?” (Luc. 14:28) Huling mahalagang marhay an preparasyon asin pagplano sa kapangganahan nin ano man na proyektong pagtogdok, kanigoan kaimportante na an mga hoben magtao nin maingat na atension sa kun paano ninda itinotogdok an saindang ngapit para sa paglilingkod ki Jehova! Dapat na magbugtak nin marigon na pundasyon sa enot na mga taon nin buhay tanganing maabot ninda an espirituwal na mga pasohan. Bilang sarong hoben, gurano karahay an pagbugtak mo kan saimong pundasyon? Kun gusto mong maglingkod sa Bethel, makikinabang ka paagi sa maingat na pagkonsiderar kan minasunod.

¹⁹ “Magtao nin Lugar” Para sa Espesyal na Pribilehiong Ini nin Paglilingkod: Siring kan nasusurat sa Mateo 19:​12, inenkaminar ni Jesus an saiyang mga disipulo na “magtao nin lugar” sa pagigin daing agom. Taano? Bakong huli sa personal na mga dahelan, kundi “huli sa kahadean kan kalangitan.” Inenkaminar man ni Pablo an siring na pagigin ‘danay na naglilingkod sa Kagurangnan na mayo nin disturbo.’ (1 Cor. 7:​32-35) An makamomondo, dakol an nawawaran kan pribilehio na maglingkod sa Bethel bilang mga daing agom na lalaki huli sa pag-agom sa amay na edad. Gusto niamong enkaminaron an hoben niatong mga tugang na lalaki na gamiton an saindang kosog sa paglaog sa bilog na panahon na ministeryo mientras na sinda mayo pa nin mga paninimbagan sa pamilya. Dangan, kun pakalihis nin sarong peryodo nin panahon magdesisyon sindang mag-agom, sinda magigin mas marahay nanggad na mga agom na lalaki huli sa pagkaigwa nin dakol na eksperyensia sa buhay asin sa Kristianong ministeryo. Pakatapos na maglingkod nin nagkapirang taon sa Bethel, an nagkapira nag-agom asin nakapadagos sa paglilingkod duman bilang mag-agom. Kun sa huri sinda magkaigwa nin iba pang pribilehio, arog baga kan gibohon na nagbibiahe o paglilingkod bilang misyonero, dai nanggad ninda pinagbabasolan an panahon na itinagama ninda sa pagtao nin lugar para sa paglilingkod sa Bethel.

²⁰ Dai Malingling kan Materyal na mga Okupasyon: Marahay na ihapot kan lambang hoben: ‘An pasohan ko daw pakagradwar sa hayskul kumua nin bilog na panahon na sekular na karera o maglingkod ki Jehova nin bilog na panahon?’ Totoo, an paggibo kan ikaduwa magkakaipo nin mga sakripisyo. Alagad iyo man an pagkua nin sekular na karera! Sa katapustapusi, arin dian an talagang magkakaigwa nin nagdadanay asin kapakipakinabang na resulta? Itinao ni Jesus an malinaw na simbag. Oyon sa Mateo 6:​19-21, sia nagsabi: “Ontok na kamo sa pagtipon nin mga kayamanan sa daga, na digdi an polilya asin takla nakararaot, asin igwa nin mga parahabon na nananalakat asin naghahabon. Kundi, magtipon kamo nin mga kayamanan sa langit, na duman an polilya o takla dai nakararaot, asin an mga parahabon dai nananalakat asin dai naghahabon. Huli ta kun saen an saindong kayamanan, dian man an saindong puso.” Logod na dai noarin man kita darahon kan puso niato na pag-aaboton an kinabanon na karera o materyal na mga bagay imbes na an bilog na kalag na paglilingkod ki Jehova. Dapat na rekonoseron niato gabos na an solamenteng mahalagang pasohan na kapakipakinabang na pag-aaboton iyo an marahay na relasyon ki Jehova, tanganing mapaogma niato an saiyang puso. (Tal. 27:11) Paagi sa pag-enot ki Jehova sa satong buhay mantang hoben pa, ipinaheheling niato kun ano an mga pinahahalagahan niato asin kun gurano kaimportante an Kahadean para sa sato. Girumdomon na “an bendisyon ni Jehova​—iyan an nakapayayaman, asin dai nia iyan dinadagdagan nin kakologan.” (Tal. 10:22) An mga hoben igwa nin ekselenteng oportunidad na ikapaheling kun saen an puso ninda paagi sa pagtao nin mahalagang bagay bilang balos ki Jehova huli sa gabos na itinao nia sa sainda. An paglilingkod sa Bethel nagtatao nin siring na marahayon na oportunidad para sa mga nakaaabot sa mga kualipikasyon. An sarong tangga pasiring dian iyo an pagpoon sa paglilingkod bilang payunir.

²¹ An mga Naglilingkod sa Bethel Kaipuhan na Magin Malinig sa Moral: Naghapot an salmista: “Paano lilinigan nin sarong hoben na lalaki an saiyang dana?” Sia nagsimbag: ‘Paagi sa pag-iingat segun sa tataramon ni Jehova.’ (Sal. 119:9) Kabale dian an paglikay sa ano man na may koneksion sa karatan sa moral kan sistema nin mga bagay ni Satanas. An pornograpiya sa Internet, salang paggawe sa bakong kasekso, nakararaot na musika, nakapapababang pag-aling-aling, asin pag-inom nin inomon na de-alkohol na mayo pa sa legal na edad nagkapira sana sa mga siod na ginagamit ni Satanas tangani na olangon an mga hoben niato sa pag-aabot sa espirituwal na mga pasohan. Kaipuhan an makosog na determinasyon tangani na mapaglabanan an mga taktikang ini. Bilang hoben, kun ika napapalabot na sa arin man kan mga bagay na ini, kaolayon an kamagurangan sa saimong kongregasyon asin resolberan an mga isyung ini bago ka mag-aplay para sa paglilingkod sa Bethel. An pagkaigwa nin malinig na konsensia mahalagang marhay sa paglilingkod nin lubos ki Jehova.​—1 Tim. 1:5.

²² Makanood na Makibagay sa Iba: An sarong importanteng kahagadan sa pagigin mapanggana sa paglilingkod sa Bethel iyo an pakanood na makibagay sa iba. An pamilyang Bethel sa Pilipinas kompuesto nin ginatos na tugang na lalaki asin babae hale sa gabos na klase nin pamumuhay. Minsan ngani an laen-laen na personalidad na ini nakadadagdag sa espirituwal na kagayonan nin Bethel, kun beses iyan puede man na magtao nin mga angat. Kun iniisip nindong maglingkod sa Bethel, tibaad marahay na hapoton an sadiri nindo: ‘Ako daw madaling makolgan an boot kun an iba bakong oyon sa sakong opinyon? Madali daw para sa iba na pakibagayan ako?’ Kun kaipuhan nindong umoswag sa siring na mga kabtang, ponan nang gibohon iyan ngonyan. An paggibo nindo kaiyan makakatabang saindo na mas madaling makaadaptar sa pamumuhay asin pagtrabaho kaiba kan mga miembro kan pamilyang Bethel.

²³ Magmaigot na magin espirituwal na tawo paagi sa pagkultibar nin dayupot na relasyon ki Jehova. Magkaigwa nin marahay na programa nin personal na pag-adal, na kabale an pagbasa kan Biblia aroaldaw. Magin aktibo sa paghiras kan maogmang bareta sa iba. Paagi sa paggibo kan mga bagay na ini, ikapaheheling nindo an saindong espirituwal na pag-oswag. (1 Tim. 4:​15) Marahayon nanggad na mga oportunidad an naghahalat sa mga nag-aandam na ngonyan para sa sarong karera nin bilog na panahon na paglilingkod!

²⁴ Mga Magurang, Sanayon an mga Aki Nindo: Ano an puedeng gibohon nin mga magurang tangani na maenkaminar an mga aki na pag-aaboton an bilog na panahon na ministeryo? Si Jesus nagsabi: “An gabos na natokdoan sa sangkap na paagi makaaarog sa saiyang paratokdo.” (Luc. 6:40) An sarong estudyante na natokdoan na marhay natural sanang ipaheheling an marahay na mga kualidad kan saiyang dusay na paratokdo. An prinsipyong ini maninigong girumdomon nin Kristianong mga magurang mantang maigot nindang sinasanay an mga aki ninda “na diosnon na debosyon iyo an [saindang] pag-aaboton.” (1 Tim. 4:7) Huling may tendensia an mga aki na ipabanaag an aktitud kan saindang mga magurang sa espirituwal na mga bagay, marahay na ihapot nin mga magurang sa saindang sadiri: ‘Personal daw niamong pinahahalagahan an trabahong ginigibo sa Bethel tangani na palakopon an intereses kan tunay na pagsamba ki Jehova? Rinerekonoser daw niamo an bendisyon ni Jehova sa areglo sa Bethel? Nagtutubod daw kami na an buhay na ginagamit sa paglilingkod ki Jehova iyo an pinakamarahay na karera na puedeng pilion kan samong mga aki? Ineenkaminar daw niamo an bilog na panahon na paglilingkod paagi sa tataramon asin halimbawa?’ An satong odok sa pusong pagpahalaga sa paglilingkod sa Bethel asin sa ginigibo duman makakatabang sa sato na itadom sa satong mga aki an kaagid na pagpahalaga.

²⁵ Si Elcana asin Ana may hararom na pag-apresyar sa tunay na pagsamba. Sinda nagtao nin risang gayong halimbawa para sa Kristianong mga magurang ngonyan. Sa suanoy na Israel, solamente an mga lalaking Israelita an hinahagadan na ‘magpaheling sa atubangan kan tunay na Kagurangnan, si Jehova’ nin tolong beses kada taon sa tabernakulo. Minsan siring, si Elcana nagbabaklay kaidto nin mga 30 kilometros, na posibleng marhay na naglalakaw sana, kaiba an bilog niang pamilya “taon-taon” tangani na mag-atang sa sentrong ini para sa pagsamba ki Jehova. (Ex. 23:17; 1 Sam. 1:​3, 4, 9, 19; 2:​19) Malinaw na gusto kan payong ini nin pamilya na an bilog niang pamilya magin kapareho nia an personal na interes sa espirituwal na mga bagay.

²⁶ Pareho an interes ni Ana asin kan saiyang agom sa tunay na pagsamba. Namatean niang marhay an saiyang obligasyon na magkontribwir sa pagsuportar kan tunay na pagsamba sa tabernakulo. Nanuga si Ana na kun tatawan sia ni Jehova nin sarong aking lalaki, ipepresentar nia ini na maglingkod sa tabernakulo. (1 Sam. 1:​11) An Ley ni Moises nagtatao sa agom na lalaki kan deretso na gibohon na imbalido an bakong tamang kapanugaan kan saiyang agom. (Bil. 30:​6-8) Minsan siring, minalataw na inaprobaran ni Elcana an kapanugaan ni Ana, na nagpapaheling na sinusuportaran man nia an ekspresyon na iyan nin tunay na pagsamba!​​—1 Sam. 1:​22, 23.

²⁷ Positibo daw an nagin epekto sa aki nindang si Samuel kan pagpahalaga asin marahayon na aktitud na ipinaheling kan saiyang mga magurang? Iyo nanggad. Bilang sadit na aki, si Samuel gikan sa boot asin fiel na inasikaso an iinasignar sa saiya na mga gibohon patin sinanay para sa dugang pang mahal na mga pribilehio sa paglilingkod sa Dios. An interes na ipinaheling ni Elcana asin Ana sa paglilingkod ni Samuel sa tabernakulo dai natapos pakaakoa nia kan saiyang mga obligasyon duman. Padagos nindang dinadalaw sia nin regular tangani na magtao nin pamparigon sa boot asin suporta mantang ipinagpapadagos nia an bilog na panahon na paglilingkod.​—1 Sam. 2:​18, 19.

²⁸ Kanigoan karahay na halimbawa an itinao ni Elcana asin Ana para sa Kristianong mga magurang ngonyan! Kun nadadangog kan mga aki niato an satong odok sa pusong mga kapahayagan nin pag-apresyar sa pribilehio nin paglilingkod sa Bethel asin naheheling an espiritu nin pagsakripisyo sa sadiri na ipinaheheling niato sa pagpalakop kan intereses kan Kahadean, mapatatalubo man ninda an puso na may inklinasyon na maglingkod sa iba. Dakol na magurang an mapangganang itinatadom an marahayon na inklinasyon na ini sa mga aki ninda. An sarong siete anyos nagsurat: “Pagdakula ko, gusto ko sa Bethel, asin may nagkapirang bagay na gusto kong gibohon duman. (1) Pagmakinilya kan magasin na Torrengbantayan asin Awake!, (2) pagtrabaho sa saindong departamento sa arte, (3) pagtipig nin mga linabahan. Kun arin man dian an puede. Ayos lang.” Abaa kanakaoogma na maheling an siring na espiritu nin pagigin gikan sa boot na tumalubo sa puso kan mga aki niato!

²⁹ Mga hoben, girumdomon na “an kinaban maagi sana asin siring man an mawot kaiyan, alagad an naggigibo kan kabotan nin Dios magdadanay sagkod lamang.” (1 Juan 2:17) Padagos na pag-aaboton an espirituwal na mga pasohan, kabale an espesyal na pribilehio nin paglilingkod sa Bethel. Mga magurang, arogon an halimbawa kan mga fiel kan nakaagi na inenkaminar an mga aki ninda na kultibaron an diosnon na debosyon. (2 Ped. 3:​11) Asin logod na gibohon niato gabos an satong kabtang sa pagtabang sa satong hoben na mga tugang na lalaki asin babae na maglingkod sa satong Kaharohalangkaweng Kaglalang sa pinakalubos na mapupuede, mantang ini “may panuga sa buhay ngonyan asin sa madatong.”​—1 Tim. 4:8; Ecl. 12:1.

[Kahon sa pahina 4]

Pundamental na mga Kahagadan Para sa Paglilingkod sa Bethel

● Kisuerra sarong taon nang bautisado

● Sarong espirituwal na tawo na may hararom na pagkamoot ki Jehova asin sa saiyang organisasyon

● May marahay na espirituwal, mental, emosyonal, asin pisikal na salud

● Mas marahay kun naglilingkod bilang payunir

● Siudadano o legal na permanenteng residente kan Pilipinas

● 19-​35 anyos