Pagmasid na May Pagpahalaga sa “Harong nin Dios”
“SARONG bagay an hinagad ko ki Jehova—iyan an sakong hahalaton, na ako makapag-erok sa harong ni Jehova sa bilog na mga aldaw kan sakong buhay, tanganing maheling an karahayan ni Jehova asin magmasid na may pagpahalaga sa saiyang templo.”—Salmo 27:4.
An mapagpahalagang si Hadeng David nagmasid na may pagkawili, o kaogmahan, sa templo ni Jehova. Siring man daw kaiyan an saindong pagmate manongod sa mga sentro nin tunay na pagsamba ngonyan? An labi sa 95 erokan na Bethel sa mga sanga kan Watch Tower Society kabale sa mga pasilidad na konektado sa pagsamba ki Jehova sa satong panahon.
“An pagsalingoy sa dakol na taon kong paglilingkod sa Bethel pinapano ako nin hararom na pagpasalamat asin dakulang pagpahalaga, na nagtatalubo taon-taon,” an paliwanag ni Helga, na nagpoon magtrabaho sa erokan sa Alemania kan 1948. Si Helga saro sa 13,828 magayagayang trabahador sa Bethel sa bilog na kinaban na kan 1993 na taon nin paglilingkod ‘naheling an karahayan ni Jehova.’ Ano an talagang kahulogan kan ngaran na Bethel? Paano an kada saro sa mga Saksi ni Jehova, baga man sia naglilingkod sa Dios sa laog kan Bethel o sa luwas, makamamasid na may pagpahalaga sa areglong ini?
Sarong Ngaran na Naghahagad nin Debosyon
An “Bethel” sarong pinakaangay na ngaran, mantang an termino sa Hebreo na Behth-ʼElʹ nangangahulogan “Harong nin Dios.” (Genesis 28:19, nota sa ibaba) Iyo, an Bethel nakaaagid sa organisadong marhay na harong, o ‘harong na napatindog huli sa kadonongan,’ na an Dios asin an saiyang kabotan an sentro nin atension. (Talinhaga 24:3) “Garo man sana iyan pag-istar sa sarong pamilya. Igwa kaming organisadong marhay na rutina sa aroaldaw,” an may pagpahalagang sabi ni Herta. Sia naglilingkod sa iyo man sanang Bethel kapareho ni Helga sa laog nin labi nang 45 taon. An kada miembro kan dakulang pamilyang ini may sadiring trabaho asin sadiring lugar, na nagtotogot saiya na makamateng maogma asin tiwasay. Kaoyon kan ngaran na Bethel, an kada saro sa mga departamento may marahay na pagkaareglo asin pagkaorganisar. Ini nagpapaoswag nin katoninongan, nagpapagin posible sa epektibong paghuhulit kan maogmang bareta, asin nagtatao sa mga kongregasyon nin marahay na dahelan na tawan nin pinakahalangkaw na paggalang an “Harong nin Dios.”—1 Corinto 14:33, 40.
Taano ta kaipuhan an siring na mga pasilidad? An magasin na ini, halimbawa, prinodusir sa sarong imprentahan kan Bethel. Huli sa paghuhulit kan mensahe kan Kahadean asin sa pagwaras nin espirituwal na kakanon, na pareho patienot nang naheling ni Jesu-Cristo, kaipuhan nanggad an organisasyonal na mga areglo na arog kan sa Bethel—na sinusuportaran nin boluntad na mga trabahador asin iginagalang na marhay kan gabos na parasamba ni Jehova.—Mateo 24:14, 45.
Gusto pa daw nindong maaraman an manongod sa rutina nin aroaldaw na trabaho digdi? Sa iniistaran ni Helga asin Herta, may madadangog na magayon na bagting sa gabos na erokan na edipisyo kun alas 6:30 n.a., minsan ngani an kadaklan sa labing 800 na regular na trabahador minabangon nin mas amay pa kaini tanganing mag-andam para sa aldaw. Pag-abot nin alas 7:00 n.a., Lunes sagkod Sabado, an pamilya tiripon na sa kakanan para sa pag-orolay sa teksto kan aldaw, o pan-agang pagsamba. Minasunod an masustansiang pamahaw. An kada aldaw nin trabaho minapoon nin alas 8:00 n.a. asin minalawig nin walong oras, na inooltanan sana nin pagpangodto. (An pamilya sa parate nagtatrabaho nin kabangang aldaw kun Sabado.) Magin sa kusina, sa imprentahan, sa labahan, opisina, pahirahayan, pagibohan nin mga libro, o ano pa man na ibang dapartamento, kadakol kan trabaho.
Durante nin mga banggi asin mga Sabado asin Domingo, an mga miembro kan pamilya nakikiasosyar sa lokal na mga kongregasyon sa mga pagtiripon asin sa paghuhulit sa publiko. An dakol na tugang na lalaki sa Bethel mga magurang asin ministeryal na lingkod sa mga kongregasyon na ini. An lokal na mga Saksi tunay na nagpapahalaga sa pakikipagtabangan na ini, na an duwang grupo iribang naglilingkod na may pagkaoroyon bilang sarong grupo, na may paggalang asin pagsabot an saro sa saro. (Colosas 2:19) An kada trabahador sa Bethel nakakaaram na an saiyang asignasyon sa “Harong nin Dios” ipinaoorog sa iba pang aktibidad. Alagad, an entusiasmo para sa paghuhulit asin an pakikiiba sa mga gibohon sa kongregasyon, na iniibanan nin timbang na kaisipan, nagpaparigon sa espirituwalidad kan trabahador sa Bethel, pinaoorog an saiyang kagayagayahan, asin ginigibo siang mas mabungang miembro kan pamilya. Kanigoan nanggad kahalaga kan mga kuwalidad na ini kun nagtatrabaho sa sarong “harong” na an ngaran konektado sa bilog na kalag na debosyon!
Paggibong Mapanggana sa Paglilingkod sa Bethel
Ano an nakatabang sa dakol na Saksi ni Jehova na gibohon na mapanggana an paglilingkod sa Bethel? An mga miembro kan pamilyang Bethel sa Pransia na dakol nang taon an eksperyensia nagkomento kan minasunod: “An pagkamoot ki Jehova. An pagkaigwa nin determinasyon na magpadagos saen man nia kita ibugtak; pagpapakumbaba, pagpapasakop, asin pagkuyog sa pagdirehir na itinatao sato kan Sosyedad.” (Denise) “Narisa ko kun gurano kaimportante na igalang an prinsipyo na sinambit ni Pablo sa Roma 12:10: ‘Sa pagpaheling nin onra sa lambang saro mangenot kamo.’ An tekstong ini ipinaheheling sato an kahalagahan nin dai pag-insister na akoon an satong personal na opinyon kundi, imbes, kinokonsiderar an mga opinyon kan iba. Sa ibang pagtaram, dai naghihingoang magin pinakahalangkaw.” (Jean-Jacques) “An satong paggalang sa paglilingkod sa Bethel mararaot kun mamansayon niato an mga bagay sa makalaman, sa-tawong punto-de-vista,” an sabi ni Barbara, “huli ta puwedeng gumiya ini sato na malingawan an katunayan na dinidirehiran ni Jehova an saiyang organisasyon. An siring na paggalang puwedeng mawara kun masisingkog kita sa mga pagkabakong sangkap kan iba.”
An gabos sa Bethel bakong sangkap, kaya an pakikiasosyar kaipuhan na maingat na horophoropon. An mga hobenes o mga minaralaog pa sana marahay na makiasosyar bako sanang sa saindang mga kaedad. An mga tibaad nagpapaheling nin tendensia na magreklamo o na mag-isip nin negatibo bakong nakapakokosog na kairiba sa Bethel o sa kongregasyon. Sa ibong na kampi, an pag-arog sa “kadonongan hale sa itaas,” na ilinaladawan sa Santiago 3:17, nagtatao nin mga bendisyon. Ini “enot sa gabos malinig, dangan matoninong, makatanosan, andam na magkuyog, pano nin pagkaherak asin marahay na mga bunga, dai nagpapalaenlaen, bakong parasaginsagin.” An siring na mga kuwalidad, kaiba kan pakatios asin kabootan, risang marhay sa “Harong nin Dios,” na ginigibong maogma asin nakapakokosog an pag-istar dian nin saro. Pati an bakong Saksing mga bisita parateng nagpapahayag nin paghanga sa marahay na gawe, pagkamakikatood, asin magayagayang espiritu kan mga trabahador.
Si Anny, na labi nang 70 anyos asin miembro kan pamilyang Bethel sa Alemania poon pa kan 1956, nagpaliwanag kun paano nia pinapadanay an saiyang pagigin andam na maglingkod: “Para sa sakong espirituwal na karahayan, dakula an sakong pagmamaigot na danay na makabasa kan mga publikasyon kan Sosyedad, makaatender nin regular sa mga pagtiripon, asin makapakikabtang nin regular sa paghuhulit. Pinagmamaigotan ko man na magdanay na marahay an salud paagi sa pag-ehersisyo kada aga, paagi sa dai paggamit piripermi sa elevator, asin paagi sa paglakaw sa pinakaparateng mahihimo, nangorogna sa paglilingkod sa langtad.”
An dakol na eksperyensiado na sa buhay sa Bethel maoyon ki Anny. Nungka sindang minapondo sa pag-adal, nungkang minaontok sa pagtrabaho. An pisikal na salud naghahagad na sinda magkaigwa nin supisyenteng torog asin ehersisyo asin magpaheling nin pagigin tama sana sa pagkakan asin pag-inom. An pinakamahalaga sa gabos, dai sinda nagpapabaya sa personal na pagpamibi asin pag-adal sa Biblia.
Halangkaw na Paggalang sa Banal na Paglilingkod sa Bethel
“Saen ka nagtatrabaho?” an parateng ihinahapot sa mga miembro kan Bethel. An mga asignasyon sa trabaho manlaenlaen, pero an kada saro maninigo na tawan nin halangkaw na paggalang kan gabos. Taano? Huli ta an kada asignasyon—baga man pagpadalagan nin makina na nag-iimprenta nin espirituwal na kakanon, paglaba nin mga bado, pagluto asin paglinig para sa pamilya, o pagtrabaho sa opisina—banal na paglilingkod. Siring sa nasambitan sa enotan, an mga Kristiano dai nagpapalaenlaen. Girumdomon na an gabos na kinakaipuhan na trabaho na ginigibo kan mga saserdote asin Levita sa templo, sa mga patyo asin kakanan kaiyan, gabos ibinilang na banal na paglilingkod ki Jehova. Kabale dian an pagbuno asin pag-andam nin mga hayop para sa pag-atang, pagpalis nin mga lana sa kandelero, pati mga trabahong paglinig asin pagbantay. Siring man, an kada asignasyon sa Bethel sarong nakakokontento asin mahalagang marhay na aktibidad “sa gibohon kan Kagurangnan,” sa siring saro nanggad na pambihirang pribilehiyo.—1 Corinto 15:58.
Horophoropa sa halipot an sarong ugale na puwedeng makaolang sa satong pagmasid na may pagpahalaga sa “Harong nin Dios.” An mga Kristiano kapwa sa Bethel asin sa luwas kinakaipuhan na mag-ingat tumang sa pagkauri asin pag-imon, na “kalapaan sa mga tolang.” (Talinhaga 14:30) Mayo nin siisay man na may dahelan na mauri sa mga pribilehiyo nin paglilingkod kan mga trabahador sa Bethel. Dugang pa, mayo nin lugar sa laog kan pamilyang Bethel para sa pag-imon, na saro sa mga gibo kan laman. Mapakumbabang maghalat—iyan madonong na hatol sa saro na tibaad garo baga nalihisan mantang an iba natawan nin mas dakulang mga pribilehiyo. Orog na nanggad, an mga tawo na dakula an pagkakalaen sa pinansial na mga pinaghalean dayupot na nag-iiribaiba sa Bethel. Kanigoan kanakapanluluya sa boot kun an saro minamansay an saiyang mga kamugtakan “sa pagkomparar sa ibang tawo”! An pagigin naninigoan “kun igwa na nin kakanon asin gubing” nakatabang sa dakol na makapagpadagos na maimbod sa laog nin mga dekada sa “Harong nin Dios.”—Galacia 5:20, 26; 6:4; 1 Timoteo 6:8.
An mga Saksi ni Jehova asin an minilyon na iba pa nagkakamit nin dakulang pakinabang sa daing bayad na mga paglilingkod na ginigibo sa Bethel—trabaho na daing kapasloan na ginigibo huli sa pagkamoot sa Dios asin kataed. An mga erokan na Bethel asin imprentahan kan Watch Tower Society, arog kan iba pang teokratikong pasilidad, sustentado nin boluntaryong mga kontribusyon. (2 Corinto 9:7) Arog ki Hadeng David asin kan mga prinsipe asin poon sa Israel, satong ikapaheheling an paggalang asin pagpahalaga sa “Harong nin Dios” paagi sa pagtao nin moral asin pinansial na suporta sa Sosyedad. (1 Cronica 29:3-7) Helingon niato ngonyan kun paano posibleng “maheling an karahayan ni Jehova” sa Bethel.
Mga Bendisyon sa “Harong nin Dios”
Kun nag-aatender sa asamblea, nakakamate daw kamo nin hararom na pagkakontento, mantang kamo napapalibotan nin maogmang mga parasamba ki Jehova? Horophoropa na sana, an sarong trabahador sa Bethel igwa kan pribilehiyo na maglingkod ki Jehova sa tahaw nin sarong grupo nin mga tugang aroaldaw! (Salmo 26:12) Kanigoan nanggad karahay na paglaom para sa espirituwal na pag-oswag an iinaalok kaiyan! An sarong tugang nagsabi na mas dakol siang nanodan na nakatabang saiya na moldehon an saiyang personalidad sa laog nin sarong taon sa Bethel kisa sa laog nin tolong taon nia sa ibang lugar. Taano? Huli ta mayo nang ibang lugar na sia nagkaigwa nin oportunidad na masdan asin arogon an pagtubod kan kadakol na maygurang na Kristianong personalidad.—Talinhaga 13:20.
Sa Bethel an saro garo man sana napapalibotan nin may kabatidan na mga parahatol. Saro pa, may pakinabang sa paghinanyog sa inandam na marhay na mga komento na iinaatubang durante nin pan-agang pagsamba asin sa Pag-adal sa Torrengbantayan kan pamilyang Bethel patin kun naghihinanyog sa mga pahayag kun mga Lunes na banggi. An mga bagong magralaog nag-aako nin pagtotokdo sa Paadalan Para sa mga Bagong Laog sa Bethel asin inaasignaran na basahon an bilog na Biblia sa laog kan enot na 12 bulan.
An mga bareta asin eksperyensia gikan sa mga bisita hale sa ibang nasyon nagtatao nin dugang pang pagpakosog. Saro pa, an mga miembro kan Namamahalang Grupo o an saindang mga representante nagsosongko sa mga sangang opisina. “Minsan ngani kadakol kan saindang gibohon,” an paggirumdom ni Helga, “an mga tugang perming may panahon para sa makikatood na tataramon o huyom.” Kanigoan kanakapakokosog na maheling nin personal an nakagiginhawa asin mapakumbabang ugale kan siring na maimbod na mga tawo!
Nangorogna sa Bethel na mamamasdan na gayo nin saro kun paano an organisasyon nin Dios nagpupunsionar asin kun paano pinahihiro kan saiyang banal na espiritu an andam na mga puso asin kamot. “Sa Bethel an saro nakakamate na mas harani sia sa sentro kan aktibidad,” an paliwanag nin sarong tugang na lalaki, na naglilingkod sa Bethel sa Pransia poon pa kan 1949. Sabi pa nia: “Tunay nanggad na masasabi ko na para sa sako an Bethel iyo an klase nin pambilog na panahon na paglilingkod na nagtotogot sako na magdusay kan pinakadakol na panahon asin kosog sa paglilingkod ki Jehova asin na maglingkod sa pinakadakulang bilang nin mga tugang.” Asin bako daw na iyan an satong tunay na katuyohan sa buhay—na gibohon an kabotan nin Dios? Sa Bethel an saro ‘makatatao nin pag-omaw sa bilog na aldaw.’ Kanigoan nanggad na bendisyon!—Salmo 44:8.
Siring sa satong naaraman, an saro na nagtatrabaho sa erokan na Bethel makakaheling kan karahayan ni Jehova asin magkakamit nin dakol na bendisyon. (Hebreo 6:10) Puwede daw na magin mahalagang marhay para sa saindo an paglilingkod sa “Harong nin Dios”? Idtong mga kabilang sa mga Saksi ni Jehova na kisuerra 19 anyos, na marahay an espirituwal asin pisikal na salud, asin, arog ki Timoteo, “marahay an patotoo sa saiya kan mga tugang” puwedeng mag-aplay na maglingkod sa Bethel. (Gibo 16:2) Dakol an ginibo an paglilingkod sa Bethel na okupasyon ninda sa buhay, arog kan mga kinotar sa enotan. Para sa sainda, an paghimuyawot kan salmista—na ‘mag-erok sa harong ni Jehova sa bilog na mga aldaw kan saiyang buhay’—nagin katunayan.
An mga Saksi ni Jehova dakula an paggalang sa mapagsakripisyo sa sadiring espiritu na ipinaheheling kan saindang mga tugang na lalaki asin babae sa Bethel, na boluntad asin magayagayang ginigibo an mga asignasyon. Baga man kita naglilingkod ki Jehova sa Bethel o saen pa man, an kada saro sato igwang marahay na dahelan na makamate nin siring ki Hadeng David—na magmasid na may pagpahalaga, o kaogmahan, sa “Harong nin Dios.”
[Ritrato sa pahina 31]
An mga Kristianong ini naoogma sa banal na paglilingkod sa Bethel sa Alemania sa laog na nin mga dekada