Pag-apresyar sa Satong mga Payunir
1 An magkakairibang trabahador para sa Kahadean nin Dios nagpipinakosogan. (Col. 4:11) Kun iisipon niato na an pangenot na gibohon kan Kristianong kongregasyon ihulit an maogmang bareta, may makokosog na dahelan na apresyaron an bilog na panahon na mga trabahador sa tahaw niato.—Mar. 13:10; Roma 16:2; Fil. 4:3.
TAANO?
2 Sa direktang paagi, an mga payunir nagpapakosog sa kongregasyon paagi sa pakikiiba sa mas kadikit an eksperyensiang mga parahayag sa laen-laen na kabtang kan paghuhulit. Kabale digdi an pagwaras nin magasin, pag-andam asin paggibo nin mga pagdalaw liwat, asin pagpopoon saka epektibong paggibo nin mga pag-adal sa Biblia. Dugang pa, an mga payunir makatatao nin halimbawa sa mapusong pagpatotoo sa impormal. An pagsuportar ninda sa pangrupong paghuhulit sa kabangaan kan semana nagtatao sainda nin oportunidad na makatabang sa iba. An saindang positibong impluwensia sa langtad namamatean nangorogna kun an mga payunir nagsusuportar sa paglilingkod sa langtad kun Sabado asin Domingo, panahon na nakakapakikabtang an kadaklan na ibang parahayag.
3 An mga payunir nakatatabang sa mga kongregasyon sa lubos asin parateng pakatapos sa teritoryo. Ini nagpapangyari sa mga tawo na orog na makaaram sa satong mensahe asin orog na mapamugtak an boot kun kita minasongko sa sainda ta midbid kita ninda.
SA KONGREGASYON
4 An dakol napakosog na lumaog sa bilog na panahon na paglilingkod huli ta an saindang puso napahiro kan kaigotan asin entusiasmo nin maimbod na mga payunir. An sarong tugang na babae nag-aalangan na magin regular payunir ta mayo ni saro sa kongregasyon. Alagad kan dagkahon kan paraataman sa sirkito, sia nagpalista. Dai nahaloy nag-arog an iba, asin ngonyan an kongregasyon na iyan dakol-dakol na an maigot na mga payunir.
5 Tibaad may mga panahon na pakikiolayan kan kamagurangan an sarong payunir na tabangan an saro na nagin iregular o inaktibo. Puwedeng kaiba sa tabang na ini an pakikipag-adal sa Biblia sa tawong iyan. Sa siring an pagtubod asin kaigotan kan payunir puwedeng makakontribuwir sa pagpalaad liwat sa pagkamoot kan tawo sa katotoohan asin makatabang na mareaktibar sia na maghingoang otobon an mga obligasyon kan saiyang pagdusay.—1 Tes. 5:14.
PAKOSOGON AN MGA PAYUNIR
6 An mga payunir, mantang dakula an ginigibo sa pagpakosog sa iba, nagkakaipo man mismo nin pagpakosog tanganing makapagdanay na magayagaya sa saindang paglilingkod. (Roma 1:12) Kamo daw positibo sa pagtaram manongod sa pagpapayunir? Kasuarin nindo huring tinawan nin komendasyon an sarong payunir para sa saiyang ginigibo asin mapagsakripisyong espiritu? An mga payunir nangorognang inaapresyar an pagkaigwa nin kaiba sa paglilingkod sa langtad sa mga oras na pipira sanang parahayag an minaluwas. Puwede daw nindong ibanan an mga payunir asin tibaad gumamit nin mas dakol na oras sa pagsuportar sa paghuhulit?
7 Ano pa an ibang paagi na mapakosog nindo an mga payunir? Apuwera sa pagtao nin komendasyon, puwede kamong magpahayag nin pag-apresyar sa mga mahihigos na iyan paagi sa pag-imbitar sa sainda sa pagkakan, boluntad na pagtabang sainda sa saindang mga panplete, asin sa iba pang paagi sinusuportaran sinda sono sa kaya nindo.—Ikomparar an 1 Tesalonica 5:12, 13.
8 Mantang an kamagurangan asin ministeryal na mga lingkod nangengenot sa kongregasyon, an mga payunir asin parahayag matao nin bilog na pagsuportar sa marahay an pagkaorganisar na mga areglo sa paglilingkod. Sa siring kita gabos magagamit an satong mga balaog sa “paglilingkod sa lambang saro.”—1 Ped. 4:10, 11.