Pag-aatubang kan Maogmang Bareta—Paagi sa Librong God’s Word
1 Sa saiyang surat sa sarong kapwa paraebanghelyo, si apostol Pablo nagsurat: “An gabos na Kasuratan ipinasabong nin Dios asin kapakipakinabang para sa pagtokdo, sa pagsagwe, sa paghusay kan mga bagay, sa pagdisiplina sa katanosan.”—2 Tim. 3:16.
2 Bilang modernong mga parabalangibog kan maogmang bareta, bilog na puso niatong tinutubod an mga tataramon na ini. Inaako niato an Biblia bilang ipinasabong na Tataramon nin Dios. Inaako niato an paggiya kaiyan sa gabos na kabtang kan satong buhay. (Sal. 119:105; Juan 17:17) Alagad paano niato matatabangan an iba na akoon an Biblia bilang Tataramon nin Dios asin iaplikar an mga prinsipyo kaiyan sa saindang pan-aroaldaw na buhay?
KUN PAANO IYAN GIGIBOHON
3 Mantang kita nakikakabtang sa enot na pagwaras sa publiko kan bagong librong The Bible—God’s Word or Man’s? sa bulan nin Nobyembre, paririgonon niato an pagsarig sa Biblia asin tatabangan an mga tawo na masabotan an mga pakinabang sa pamumuhay sono sa ipinasabong na hatol kaiyan. Kanigoan kadakulang pribilehiyo kaini!
4 Ano an masasabi niato kun iinaalok an libro? Pakatapos nin makikatood na pataratara, puwede niatong apodon an atension sa Talinhaga 14:12 tanganing ipaheling na an mapangganang buhay nagkakaipo nin madonong na paggiya. An salang paggiya puwedeng magin kapahapahamak. Dangan basahon an Talinhaga 2:6, 7 tanganing ipaheling na si Jehova nagtatao nin tunay na kadonongan. Puwede kitang mangatanosan sa kagharong mapadapit sa pangangaipo na dumolok sa Biblia tanganing makanompong nin diosnon na kadonongan. Dangan puwede niatong sabihon: “Ipinaheheling kan librong ini na an Biblia masasarigan na gikanan nin madonong na hatol sa mga problemang inaatubang nin mga tawo. Mangnoha tabi an sinasabi digdi sa parapo 2 sa pahina 5. [Basahon an parapo 2, asin kun may oras pa, basahon an parapo 4.] Tatabangan kamo kan librong ini na masabotan na an Biblia talagang Tataramon nin Dios asin na iyan may praktikal na giya sa gabos na bagay sa buhay. Mapapasaindo an librong ini sa kontribusyon na ₱16.00.”
5 An kagharong tibaad garo baga sibot o magsabi na dai sia interesado, na habong makipag-olay nin haloy. Tanganing makagibo nin halipot na pag-aatubang, puwede nindong sabihon: “Seguradong maoyon kamo na kadakol kan mga problemang inaatubang nin katawohan.” Dangan basahon an enot na parapo sa kapitulo 1. Pakapagkomento kan kagharong sa pantapos na hapot sa parapong iyan, puwede nindong sabihon: “Sinasabi sato kan Biblia na sa halipoton na sanang panahon reresolberan mismo nin Dios an gabos na nakariribong na problema nin tawo. An librong ini nagtatao nin mapuwersang ebidensia na an Biblia totoo, ta iyan Tataramon nin Dios asin bakong nin tawo. Boot kong mapasaindo ini sa kontribusyon sanang ₱16.00.”
PAKATAO SA PANGANGAIPO
6 An bagong librong ini, The Bible—God’s Word or Man’s?, magpapangyari sa sinserong mga parabasa na masabotan asin maapresyar na an Biblia talagang Tataramon nin Dios. An sadiosan na paghorophorop sa sinasabi kaiyan tibaad makapapoon sainda sa dalan pasiring sa buhay. Kun siring, gumibo nin espesyal na paghihingoa na iwaras an librong ini sa pinakadakol na mapupuwede. Tawan niato kan pinakamahiwas na pagwaras an librong ini.