An Biblia—Giya nin Dios Para sa Gabos na Tawo
1 Kinakarkulong apat na bilyon (4,000,000,000) na Biblia an naimprenta na sa labing 2,100 na lenguahe asin dialekto, na nagpapangyari na makua kan labing 90 porsiento kan populasyon kan daga an Tataramon nin Dios. Pero, igwa nin gutom sa kinaban “sa pagdangog kan mga tataramon ni Jehova.” (Amos 8:11) An dakol na tawo na may sadiring kopya nin Biblia magsalang dai nagbabasa kaiyan o dai nasasabotan an laog kaiyan. Paano niato sinda mamomotibar na gamiton an Biblia bilang praktikal na giya sa saindang buhay?
2 Sa Disyembre iaalok niato an librong The Bible—God’s Word or Man’s? Kun interesado, puede ta man na ialok an traduksion sa Biblia na pinakinabangan na niato sa nakaaging 47 taon—an New World Translation. Magigibo ini paagi sa pag-ilustrar kan malinaw, modernong pananaram kaiyan. (Helingon an librong “All Scripture,” pahina 328, parapo 6.) Ipaheheling niato an satong makosog na pag-apresyar sa balaog na ini hale ki Jehova paagi sa entusiastikong pagtabang sa iba na akoon an Biblia bilang giya nin Dios para sa gabos na tawo.
3 Puede nindong ponan an sarong pag-atubang paagi sa paggamit kan tract na “Why You Can Trust the Bible.” Puede nindong sabihon:
◼ “Dawa ngani an Biblia makukua kan labing 90 porsiento kan populasyon kan kinaban, pipira sana an regular na nagbabasa kaiyan. Sa paghona nindo ano daw an dahelan?” Basahon an primerong duwang parapo kan tract, kabale an 2 Timoteo 3:16. Ialok an librong God’s Word. Kun dai akoon an libro, sabihon sa kagharong na basahon an iba pang kabtang kan tract. Itampok an ultimong subtopiko, “Foretelling the Future.”
4 Kun minabalik sa mga tawo na tinawan nindo kan tract na “Why You Can Trust the Bible,” puede nindong probaran ini:
◼ Pakatapos na magpamidbid giraray, basahon an ultimong duwang parapo kan tract. Hapoton an kagharong kun napaghorophorop na lamang nia an posibilidad na mabuhay sagkod lamang digdi sa daga. Pakasimbag nia, sabihon: “Nasisierto kan Mga Saksi ni Jehova na maootob an gabos na hula sa Biblia, kabale na an mga hula dapit sa sarong makangangalas na ngapit para sa gabos na tawo na nakaaabot sa mga kahagadan nin Dios.” Ipaheling an ilustrasyon sa pahina 13 sa brosyur na Kahagadan, buksan an leksion 5, asin ialok na ipaliliwanag nindo an mga simbag sa nalilistang mga hapot, sa siring mapoponan an sarong pag-adal.
5 Sa mga teritoryo na an mga tawo relihioso, puede nindong probaran an primerong pagdolok na ini:
◼ “Ineenkaminar niamo na tawan nin orog na paggalang an Biblia. Dakol na pamilya an igwa nin Biblia, alagad bihira nindang konsultahon iyan kun sinda nagkakaigwa nin magabat na mga problema. Nariparo na daw nindo ini? [Pasimbagon.] Tibaad sinda naniniwala na lihis na sa uso an Biblia. An librong ini, The Bible—God’s Word or Man’s?, nagtatao nin nakakokombensir na prueba na an Biblia eksakto sa siensia asin na iyan nagtatao nin praktikal na mga solusyon sa kritikal na mga problema ngonyan.” Itampok an nagkapirang punto sa kapitulo 8 o kapitulo 12 kan libro, dangan ialok iyan.
6 Kun binabalikan an napasakamotan kan librong “God’s Word,” puede nindong sabihon:
◼ “Kan dalawon ko kamo kan nakaagi, napag-olayan niato kun paano nakatatabang an Biblia na maresolberan an komplikadong mga problema ngonyan. Idtong mga nag-ako kaiyan bilang Tataramon nin Dios natabangan man na mabuhay nin mas maogma, mas kontento. Gusto kong ipaheling sa saindo an saro sa praktikal na mga prinsipyo sa Biblia na ipinaliliwanag sa librong iwinalat ko sa saindo.” Ipaliwanag an saro sa Makakasuratan na mga prinsipyo sa kapitulo 12, parapo 3-6, asin taposon paagi sa pagbasa kan parapo 7. Kun magpaheling nin interes, mag-alok nin pag-adal magsalang sa librong Kaaraman o sa brosyur na Kahagadan.
7 An minasunod na pag-atubang tibaad makapukaw sa interes kan mga may edad na:
◼ “May panahon kaidto na an Biblia binabasa sa kadaklan na harong asin na an mga pamilya namumuhay sono sa mga prinsipyo kaiyan. Nagin totoo daw iyan sa saindong pamilya? [Pasimbagon.] Ngonyan, garo baga an dakol nalilingling nang marhay tanganing makatao pa nin panahon sa pagbasa nin Biblia o sinda naghohona na an moral na mga prinsipyo kaiyan lihis na sa uso. An kapitulo 13 kan librong ini, The Bible—God’s Word or Man’s?, ipinipresentar an tolong tunay na buhay na eksperyensia kan mga indibiduwal na an buhay napakarhay pakatapos na mag-adal sa Biblia. Kun gusto nindong mabasa kun paano nakatabang sa sainda an puersa kan Tataramon nin Dios, maoogma akong iwalat sa saindo an librong ini.”
8 Sa pagdalaw liwat, puede nindong sabihon:
◼ “Kan nakaagi niatong pag-olay, nagkaoyon kita na an moral na mga prinsipyo sa Biblia dai na iniintindi sa sosyedad ngonyan. Maninigo daw niatong ikahadit an dai pag-intinding iyan? [Pasimbagon.] Pinahalagahan na marhay ni Jesu-Cristo an pagkua nin kaaraman sa Biblia.” Basahon an Juan 17:3. Dangan ipakipag-olay an parapo 5 kan kapitulo 1 sa librong Kaaraman. Ipaliwanag an satong programa sa daing bayad na pag-adal sa Biblia, asin mag-alok na idemonstrar iyan ora mismo.
9 Ipamibi na bendisyonan logod ni Jehova an gabos nindong paghihingoa na darahon an atension sa Biblia—an giya nin Dios para sa gabos na tawo.