An Kaaraman Gikan sa Dios Sinisimbag an Dakol na Hapot
1 Bago nindo nanodan an tamang kaaraman kan katotoohan, posibleng dakol kamong hapot manongod sa buhay na dai nindo nasimbag. Kanigoan an kaogmahan nindo na akoon an basado sa Biblia na simbag sa mga hapot na idto! Ngonyan natatabangan na nindo an iba na manompongan an iyo man sanang mga simbag. (Ikomparar an 2 Timoteo 2:2.) Ikahihiras nindo sa sainda an kaaraman nin Dios na minagiya pasiring sa buhay na daing katapusan. (Juan 17:3) Alagad paano nindo matatabangan an saro na apresyaron an halaga kan kaaraman na ini? Bueno, isip-isipa an mga hapot na sinimbag kan katotoohan para sa saindo. Ano an minamawot na maaraman kan mga naghahanap kan katotoohan? An pag-isip-isip sa mga tataramon na ini makatatabang sa saindo na ialok an librong Kaaraman na Minagiya Pasiring sa Buhay na Daing Katapusan. An minasunod na mga suhestion puedeng makatabang sa saindo kun nag-aandam para sa pagpatotoo ngonyan na Hunyo.
2 Huling dakol na tawo an naghohorophorop kun taano ta grabe an kasakitan sa kinaban, tibaad magin marahay an reaksion sa pagdolok na ini:
◼ “Kun may kalamidad o kun nagdadakol an krimen asin kadahasan, parateng naghahapot an mga tawo kun taano an siring kamakatatakot na mga bagay ta nangyayari. Ano daw an isisimbag nindo?” Pasimbagon asin pasalamatan an simbag kan tawo. Dangan buksan an kapitulo 8 kan librong Kaaraman, asin darahon an atension sa sinasabi sa parapo 2. Ipaliwanag na an librong ini nagpepresentar kan paliwanag kan Biblia sa kun taano ta nangyayari an maraot na mga bagay, asin sabihon: “Boot kong iwalat an librong ini sa saindo sa sadit na kontribusyon.” Dangan iareglo na masongko liwat tangani na ipadagos an saindong pag-orolay.
3 Kun nagdadalaw liwat sa napasakamotan nindo kan librong “Kaaraman,” puede nindong sabihon:
◼ “Interesado ako sa saindong opinyon sa kun taano ta grabe an kasakitan sa kinaban. Minaoyon daw kamo sa simbag kan Biblia siring sa sinumaryo sa libro?” Pasimbagon. Basahon an parapo 17 sa pahina 77 kan librong Kaaraman, asin alokon na basahon an Roma 9:14 sa Biblia kan kagharong. Dangan magsabi: “An maogmang bareta iyo na an Dios bakong daing katanosan na nagkacausa sa sato nin kolog asin pagsakit. Nanuga siang tatawan kita nin buhay na daing katapusan sa katoninongan asin kaogmahan. An enot na kapitulo sa librong ini may temang ‘Puede Kamong Magkaigwa nin Maogmang Ngapit!’ Boot kong ipaliwanag kun paano iyan puedeng magin totoo sa saindo asin sa saindong mga namomotan.” Buksan sa kapitulo 1, asin idemonstrar an satong paagi nin pag-adal. Kobrehan an pinakadakol sa kapitulo kun angay sa mga kamugtakan.
4 Tibaad gusto nindong gamiton an introduksion na maheheling sa pahina 14 kan librong “Reasoning,” sa irarom kan temang “Old Age/Death”:
◼ “Ihinapot na daw nindo: ‘An kagadanan daw an katapusan nin gabos? O igwa pa pakalihis nin kagadanan?’ [Pasimbagon.] Sinisimbag kan Biblia an ano man na hapot niato manongod sa kagadanan. [Basahon an Eclesiastes 9:5, 10.] Ipinaheheling man kaiyan na igwang tunay na paglaom para sa mga may pagtubod. [Buksan an parapo 13 sa pahina 84 kan librong Kaaraman; basahon asin ipaliwanag an mga tataramon ni Jesus na yaon sa Juan 11:25.] An bilog na kapitulong ini nagkokonsentrar sa pagsimbag kan hapot na, Ano an nangyayari sa satong gadan nang mga namomotan? Kun boot nindong basahon iyan, puede kong iwalat an kopyang ini sa saindo sa sadit na kontribusyon.”
5 Kun nagdadalaw liwat, puede nindong ipagirumdom sa kagharong an saindong nakaaging pagdalaw dangan sabihon:
◼ “Kan nakaagi nag-olay kita dapit sa kun ano an nangyayari kun magadan an saro. Dakol na tawo an naniniwala na an ano man na buhay pagkagadan magsalang mapapasa langit o impierno. Alagad napaghorophorop na daw nindo an manongod sa posibilidad na mabuhay liwat an mga gadan digdi mismo sa daga? [Pasimbagon.] Sono sa Biblia, an mga bubuhayon liwat makakabilang sa mga mahoyo na magmamana kan daga. [Basahon an Salmo 37:11, 29, dangan ipakipag-olay an parapo 20 sa pahina 88 kan librong Kaaraman.] An paglaom na iyan nagtao nin karangahan sa minilyon na tawo na nabubuhay na takot sa kagadanan. Tatabangan kamo kan librong ini na masabotan nin mas marahay an bagay na iyan. Puede daw na idemonstrar ko sa saindo kun paano?”
6 Kun mas gusto nindo nin sarong pinasimpleng pag-atubang, puede nindong probaran ini:
◼ “Boot kong ipaheling sa saindo an sarong ilustrasyon sa librong ini, an Kaaraman na Minagiya Pasiring sa Buhay na Daing Katapusan. Bako daw magayon na retrato ini?” Buksan an libro tanganing maheling kan kagharong an pahina 4-5. Pasimbagon sia. Dangan basahon an mga tataramon sa pahina 5. Taposon paagi sa pagsabing: “Puede nindong kuanon an librong ini tangani na mabasa nindo mismo. May sadit na kontribusyon tangani na makobrehan an gastos sa pag-imprenta.” Aramon kun ano an kombenyenteng panahon na madalaw liwat tangani na makultibar an interes na ipinaheling.
7 Yaon sa sato an kaaraman gikan sa Dios na minasimbag sa importanteng mga hapot sa buhay. Mag-andam na marhay, asin bebendisyonan ni Jehova an saindong mga paghihingoa na ihiras an impormasyon na ini na nagtataong buhay sa mga naghahanap kan katotoohan.