“Ini Nangangahulogan nin Buhay na Daing Katapusan”
1 An mga tataramon ni Jesus sa Juan 17:3 nagsasabi na an pagkua nin kaaraman dapit sa Dios asin ki Cristo nangangahulogan nin buhay na daing katapusan! Alagad paagi sana daw sa pagkaigwa niato nin kaaraman dapit ki Jehova asin ki Jesus na magkakamit kita nin buhay na daing sagkod? Dai. Aram kan mga Israelita na si Jehova an saindang Dios, alagad an saindang pamumuhay dai nagpabanaag kan paniniwalang iyan. Bilang resulta, nawara ninda an saiyang pag-oyon. (Os. 4:1, 2, 6) Ngonyan minilyon na tawo an tibaad ‘igwa nin kaigotan para sa Dios; alagad bakong oyon sa tamang kaaraman.’ (Roma 10:2) Kaipuhan nindang mamidbid si Jehova, an “iyo sanang tunay na Dios,” asin maglingkod sa saiya sa tamang paagi. Sa katuyohan na iyan, ngonyan na Nobyembre iaalok niato an librong Kaaraman na Minagiya Pasiring sa Buhay na Daing Katapusan. Uya an nagkapirang suhestion na puedeng makatabang sa saindo.
2 Mantang an ideya manongod sa pamumuhay sagkod lamang digdi sa daga bago para sa kadaklan na tawo, an introduksion na ini puedeng makua an saindang interes:
◼ “May ihinahapot kami sa samong kataraed. Kun imbitaran kamong mabuhay sagkod lamang sa sarong kinaban na arog kaini, aakoon daw nindo an imbitasyon? [Ipaheling an retrato sa pahina 4-5 kan librong Kaaraman. Pasimbagon.] Alagad ano daw sa paghona nindo an dapat nindong gibohon tangani na magkamit nin siring na paglaom? [Pasimbagon.] Mangnoha an hinahagad sono sa Juan 17:3. [Basahon.] Tinatabangan kan librong ini an dakol na magkaigwa kan klaseng ini nin kaaraman. Boot daw nindong magkaigwa nin personal na kopya na mababasa? [Pasimbagon.] Sa sunod kong pagsongko, puede niatong pag-olayan kun taano ta rasonableng maniwala na puede kitang magkamit nin buhay na daing katapusan digdi mismo sa daga.”
3 Kun minadalaw liwat kamo tangani na songkoon an mga kinaolay nindo manongod sa Juan 17:3, puede kamong magpadagos paagi kaini:
◼ “Durante kan nakaagi kong pagsongko, napag-olayan niato an Juan 17:3, na nagsasabi na an pagkua nin kaaraman dapit sa Dios asin ki Cristo nangangahulogan nin buhay na daing katapusan. Alagad ta dakol na tawo an naniniwala na makakamtan sana an mas marahay na buhay sa langit. Ano an paghona nindo dapit kaiyan? [Pasimbagon.] Kun puede nindong kuanon an librong iwinalat ko sa saindo, gusto kong ipaheling sa saindo an nagkapirang bersikulo sa Biblia na nagpapatunay na ibabalik digdi sa daga an Paraiso. [Pag-olayan an parapo 11-16 sa pahina 9-10 kan librong Kaaraman.] Sa masunod kong pagdalaw, boot kong ipaheling sa saindo kun taano ta makapagtitiwala kamo sa mga panugang ini sa Biblia. Mientras tanto, tibaad puede nindong basahon an kapitulo 2 sa saindong kopya kan libro.”
4 Uya an sarong pag-atubang na tibaad boot nindong gamiton sa mga tawong relihioso:
◼ “Nakikipag-olay kami sa samong kataraed mapadapit sa kun taano ta igwa nin kadakoldakol na manlaenlaen na relihion sa kinaban. Igwa nin labing 10,000 na relihiosong denominasyon sa bilog na kinaban. Pero, saro sana an Biblia. Taano sa paghona nindo ta igwa kaining pagkaribaraw nin mga relihion? [Pasimbagon. Buksan an librong Kaaraman sa kapitulo 5, asin basahon an parapo 1.] Maaako nindo an nakakokontentong simbag sa mga hapot na iyan paagi sa pagbasa kan kapitulong ini. Naoogma akong iwalat an librong ini sa saindo sa sadit na kontribusyon.” Kun akoon iyan, iareglo na madalaw liwat, asin sabihon: “Sa pagdalaw ko liwat, tibaad puede niatong pag-olayan kun baga an gabos na relihion manlaenlaen sanang dalan pasiring sa iyo man sanang lugar.”
5 Kun minadalaw liwat kamo tangani na ipadagos an pag-orolay dapit sa kun taano ta kadakoldakol kan relihion, puede nindong sabihon ini:
◼ “Kan nakaolay ko kamo kan nakaagi, pinalataw ko an hapot na kun baga an gabos na relihion manlaenlaen sanang dalan pasiring sa iyo man sanang lugar. Ano an paghona nindo dapit kaiyan? [Pasimbagon.] Boot kong ipaheling sa saindo sa librong iwinalat ko sa saindo kun ano an sinabi ni Jesus sa bagay na iyan. [Buksan sa kapitulo 5 kan librong Kaaraman, asin basahon an parapo 6-7, kabale an Mateo 7:21-23.] Tibaad naghohorophorop kamo kun taano ta mahalagang marhay na aramon nin eksakto kun ano an kabotan nin Dios. Basahon tabi an natatada kan kapitulong ini. Sa sunod kong pagdigdi, maoogma akong ipaheling sa saindo an halaga nin pagkaigwa nin tamang kaaraman sa Biblia.”
6 An direktang pagdolok parateng mapanggana sa pagpoon nin mga pag-adal sa Biblia. Uya an sarong isinuherir na introduksion na maheheling sa pahina 12 kan librong “Reasoning”:
◼ “Minasongko ako tanganing alokan kamo nin mayong bayad na kurso sa Biblia sa harong. Kun puede, boot kong gumamit nin pirang minuto tangani na idemonstrar kun paano an mga tawo sa mga 200 na kadagaan pinag-oolayan an Biblia sa harong bilang mga grupo nin pamilya. Puede niatong gamiton an arin man sa mga topikong ini na basehan sa pag-orolay. [Ipaheling an mga laog sa librong Kaaraman.] Arin an nangorognang interesante para sa saindo?” Buksan sa kapitulong napili, asin ponan an pag-adal sa enot na parapo.
7 Uya an saro pang mapangganang direktang pag-atubang na puede nindong probaran sa pagpoon nin mga pag-adal:
◼ “Nagtatao ako nin mga leksion sa Biblia na mayong bayad asin bukas pa an sakong iskedyul para sa dagdag pang mga estudyante. An pantabang na ini sa Biblia iyo an samong ginagamit. [Ipaheling an librong Kaaraman.] An kurso malawig sana nin pirang bulan asin nagtatao iyan nin simbag sa mga hapot na siring baga kan: Taano ta tinotogotan nin Dios an kasakitan? Taano kita ta naggugurang asin nagagadan? Ano an nangyayari sa satong nagadan na mga namomotan? Asin paano kamo magigin dayupot sa Dios? Puede daw na idemonstrar ko an pag-adal sa saindo?” Kun sinayumahan an alok na pag-adal, hapoton kun boot kan tawo na basahon an Kaaraman na sia sana. Kun iyo, ialok iyan sa saiya.
8 Kanigoan na kayamanan an tamang kaaraman dapit sa Dios asin ki Cristo para sa gabos na igwa kaiyan! Gamiton ta an gabos na oportunidad ngonyan na Nobyembre na ihiras sa iba an kaaraman na minagiya pasiring sa buhay na daing katapusan.