Tabangan an an Iba na Kumua kan Kaaraman na Minagiya Pasiring sa Buhay
1 Si apostol Pablo nagpaliwanag na ‘kabotan nin Dios na an gabos na klase nin tawo makaabot sa tamang kaaraman kan katotoohan.’ (1 Tim. 2:4) Paano niato matatabangan an iba na kumua kan kaaraman na iyan? An sarong paagi iyo an mga pagdalaw liwat sa mga tawo na nagkua kan librong Kaaraman na Minagiya Pasiring sa Buhay na Daing Katapusan. Paano niato maparirigon an boot kan iba na pag-adalan iyan kaiba niato?
2 Para duman sa mga nagpaheling nin interes sa Biblia bilang praktikal na giya, puede kamong bumalik tangani na mag-alok nin pag-adal, tibaad paagi sa pagsabi:
◼ “Kan enot kong pagdigdi, napag-olayan niato an kun taano kita ta makatitiwala sa Biblia bilang praktikal na giya. Huli ta iyan ipinasabong nin Dios, an Biblia saro man na seguradong gikanan nin karangahan asin paglaom. [Basahon an Roma 15:4.] Sa katapusan kan satong huring pag-olay, nagpalataw ako nin hapot, Paano kita personalmenteng makikinabang sa kaaraman na yaon sa Biblia?” Basahon an parapo 18 sa pahina 11 kan librong Kaaraman. Idoon na an Mga Saksi ni Jehova nagkokondukta nin mga limang milyon na pag-adal sa Biblia sa bilog na kinaban. Mag-alok na idemonstrar an pag-adal, na ginagamit an enot na limang parapo sa kapitulo 1.
3 Kun minabalik kamo sa pagsongko sa sarong magurang na nahahadit dapit sa mga problema sa pamilya, puede nindong sabihon ini:
◼ “Aram ko na, bilang sarong magurang, gusto nindo an pinakamarahay para sa saindong mga aki. Mantang imposible na protehiran sinda sa gabos na maraot, kaipuhan nindo sindang patoodon na pangganahan an mga problema sa buhay. Paano daw sa paghona nindo magigibo ini? [Pasimbagon.] Digdi sa pahina 145-6 kan librong Kaaraman igwang marahay na hatol gikan sa Biblia.” Basahon an nagkapirang kabtang sa mga pahinang ini, dangan alokon na bumalik liwat tangani na idemonstrar kun paano gagamiton an libro na manodan nin orog pa an manongod sa kun paano magkakamit nin sarong maogmang buhay pampamilya.
4 Kun ginamit nindo an direktang pagdolok sa pagpoon nin pag-adal, puede nindong sabihon ini tangani na pasundan an enot na pag-orolay:
◼ “Naggibo ako nin espesyal na paghihingoa na dalawon kamo liwat huli ta dakol pa akong boot na sabihon sa saindo manongod sa samong daing bayad na programa nin pag-adal sa Biblia. Winalatan ko kamo nin sarong kopya kan librong ini, na Kaaraman na Minagiya Pasiring sa Buhay na Daing Katapusan, na iyo an pantabang sa pag-adal na ginagamit niamo. Mangnoha kun paano kaiyan pinaririgon an boot niato na pag-olayan an Tataramon nin Dios. [Basahon an parapo 23 sa pahina 22.] Kun puede tabi nindong kuanon an saindong kopya kan libro, tibaad puede niatong ipadagos an pag-adal kun saen kita napondo kan enot.” Kun dai naponan an pag-adal kan enot na pagsongko, puede nindong sabihon: “Tibaad marahay na panahon ini na ikademonstrar ko sa saindo kun paano niamo pinag-aadalan an Biblia.” Iareglo an depinidong oras na bumalik para sa masunod na pag-adal.
5 An paggamit kan librong Kaaraman pangyayarihon kitang ikapalakop an tamang kaaraman para sa bendisyon nin iba. (Tal. 15:7) Para sa an puso tanos, paririgonon kaiyan an boot ninda na mamuhay nin oyon sa katanosan ni Jehova, na pag-abOt nin panahon magiya pasiring sa buhay na daing katapusan.