“An Pagtubod Minasunod sa Bagay na Nadangog”
1 Kun nakanonompong kita nin saro na “may tamang tendensia sa buhay na daing katapusan,” kaipuhan niatong pakosogon an pagtubod kan sarong iyan sa saiyang nadangog. (Gibo 13:48; Roma 10:17) Tangani na magibo iyan, maninigo niatong balikan an mga napasakamotan nin magasin, na dinadara an pinakahuring mga isyu asin tibaad iinaalok an sarong suskripsion. Minsan siring, an satong pasohan iyo na makapoon nin pag-adal sa librong Kaaraman na Minagiya Pasiring sa Buhay na Daing Katapusan. Uya an nagkapirang suhestion na puedeng makatabang:
2 Kun nagdadalaw liwat kun saen ipinakipag-olay nindo an artikulong “Omawon an Hade sa Panahon na Daing Sagkod!,” puede kamong pumoon nin arog kaini:
◼ “Kan nakaagi niatong pag-olay, rinepaso niato an nagkapirang ebidensia na nagpapatunay na igwa nin sarong makakamhan sa gabos na Dios. Minsan siring, an pakaaram sana na sia nag-eeksister bako pang igo. Kaipuhan niatong mamidbid an saiyang ngaran. Aram daw nindo kun ano iyan? [Pasimbagon.] Boot nin Dios na mamidbid niato sia sa saiyang ngaran. [Basahon an Salmo 83:18.] Dakol pa an sinasabi sa sato kan Biblia dapit ki Jehova Dios, siring sa ipinaliliwanag sa librong ini.” Ipaheling an retrato, asin basahon an kapsion sa pahina 29 kan librong Kaaraman. Pakatapos nindong pag-olayan an enot na tolong parapo sa kapitulo 3, nakapoon na kamo nin sarong pag-adal!
3 Para duman sa mga ipinakipag-olay nindo an artikulong “Kun Taano an Tunay na Pagsamba ta Nag-aako kan Bendisyon nin Dios,” tibaad boot nindong kultibaron an interes paagi sa pagsabi:
◼ “Pakabasaha kan artikulo, tibaad nariparo nindo na dai niato puedeng mansayon an gabos na relihion sa pararehong paagi. An tunay na relihion asin an falsong mga relihion parehong nag-eeksister. Pinalalataw kaini an lohikong hapot na, Kiisay na pagsamba an inooyonan nin Dios? An simbag itinatampok sa librong ini.” Buksan sa kapitulo 5 kan librong Kaaraman asin basahon an parapo 4, kabale an Juan 4:23, 24. Dangan maghapot, “Andam daw kamong umako nin libreng pag-adal sa Biblia sa harong?” Kun positibo an simbag, buksan sa kapitulo 1 asin ponan an pag-adal.
4 Kun ipinaheling an interes sa Abril 22 na “Awake!,“ sa pagbalik nindo puede nindong probaran an pagdolok na ini tangani na makapoon nin pag-adal sa librong “Kaaraman”:
◼ “Puedeng nagigirumdoman nindo na napag-olayan niato an manongod sa satong mga paglaom na maheling sa katapustapusi an sarong kinaban na mayo nang guerra. Masakit imahinaron kun ano talaga an magigin kamugtakan dian. Uya an ideya nin sarong pintor manongod kaiyan. [Ipaheling an retrato sa pahina 188-9 kan librong Kaaraman.] Bako daw na nakaoogma na makamtan an mga palibot na ini? [Buksan sa pahina 4-5, ipaheling an retrato, asin basahon an kahon.] An titulo kan librong ini kapareho kan mga tataramon ni Jesus na yaon sa Juan 17:3. [Basahon.] Kun puede, boot kong idemonstrar kun paano an librong ini magagamit kaiba kan saindong Biblia tanganing manompongan an nagliligtas nin buhay na kaaraman na iyan.” Kun gusto kan kagharong, ponan an pag-adal sa enot na kapitulo.
5 Magigin dakula an satong kagayagayahan kun satong ‘mabubuksan sa iba an pinto pasiring sa pagtubod’ na minagiya pasiring sa buhay na daing katapusan.—Gibo 14:27; Juan 17:3.