Pagpalakop kan Kaaraman na Minagiya Pasiring sa Buhay na Daing Katapusan
1 Si Jehova “an Saro na nagtotokdo sa mga tawo nin kaaraman.” (Sal. 94:10) Ginagamit nia kita tanganing ipalakop an nagliligtas buhay na kaaraman manongod sa saiya duman sa mga daing pakaaram kun paano maglilingkod sa saiya sa inaakong paagi. An librong Kaaraman na Minagiya Pasiring sa Buhay na Daing Katapusan sarong marahay na instrumento sa pagtotokdo tanganing tabangan an mga may sadiosan na puso na magkamit nin tamang kaaraman kan katotoohan. (1 Tim. 2:3, 4) An klaro asin lohikong pagpaliwanag kan katotoohan sa librong Kaaraman makatatabang sa mga tawo na masabotan an itinotokdo sa sainda ni Jehova. Sa bulan na ini boot niatong makipag-olay sa mga tawo sa paaging madagka sa sainda na mawoton na basahon an libro. Uya an nagkapirang suhestion. Hingoahon na sabihon an mga ini sa sadiri nindong tataramon asin natural na paagi nin pakikipag-olay.
2 Huling kadaklan na tawo tibaad nagadanan na nin sarong namomotan, puede nindong ilaog sa orolay an paglaom sa pagkabuhay liwat paagi sa pagsabi nguna nin arog kaini:
◼ “Kadaklan sa sato nagadanan na nin sarong namomotan. Napag-isip-isip ta na daw kun baga sinda maheheling ta pa giraray? [Pasimbagon.] An kagadanan bakong kabtang kan orihinal na katuyohan nin Dios para sa tawo. Pinatunayan ni Jesus na an satuyang mga namomotan puedeng kaldahon hale sa kagadanan. [Basahon an Juan 11:11, 25, 44.] Ipinaheheling kaini kun ano an ipinanugang gigibohon nin Dios para sa sato. [Buksan an librong Kaaraman sa retrato sa pahina 85 asin basahon an kapsion. Dangan ipaheling an retrato sa pahina 86 asin komentohan iyan.] Kun gusto nindong makabasa nin dakol pa manongod sa paglaom na ini na pagkabuhay liwat, naoogma akong iwalat sa saindo an librong ini.”
3 Pagkatapos kan enot na pag-oolay manongod sa paglaom sa pagkabuhay liwat, puede nindong ponan an sunod na orolay sa tawo man sanang iyan nin arog kaini:
◼ “Tibaad nagigirumdoman nindo an sinabi ko na an kagadanan bakong kabtang kan orihinal na katuyohan nin Dios para sa tawo. Kun totoo iyan, taano kita ta naggugurang asin nagagadan? An nagkapirang baoo nabubuhay nin labing 100 na taon, asin may mga kahoy na buhay pa sa laog nin rinibo nang taon. Taano an mga tawo ta nabubuhay nin 70 o 80 taon sana? [Pasimbagon.] Kita nagagadan huli ta an enot na tawong mag-agom suminuway sa Dios.” Basahon an Roma 5:12. Buksan an pahina 53 kan librong Kaaraman asin basahon an titulo kan kapitulo. Ipaliwanag an enot na tolong parapo, na ipinaheheling an simbag sa inimprentang mga hapot. Mag-areglong bumalik tanganing pag-olayan an natada pang kabtang kan kapitulo.
4 Kun nakikipag-olay kamo sa tawong garo relihioso, puede nindong sabihon:
◼ “Igwa nin ginatos na manlaenlaen na relihion ngonyan. Sinda nagtotokdo nin dakol na paniniwala na nagkokorontrahan. May mga tawong nagsasabi na an gabos na relihion marahay asin bakong mahalaga kun ano an tinutubod ta. Ano an saindong opinyon? [Pasimbagon.] Itinokdo ni Jesus an tunay na relihion asin ipinaheling nia na an ibang paagi nin pagsamba dai inaako nin Dios. [Basahon an Mateo 7:21-23.] Kun boot niatong paogmahon an Dios, dapat na sambahon ta sia sono sa saiyang kabotan.” Buksan an librong Kaaraman sa kapitulo 5, basahon an titulo kan kapitulo asin an nagkapira sa mga subtema. Ialok sa saiya an libro.
5 An mga tawong nariribaraw huli sa dakol na relihion tibaad apresyaron an simbag sa hapot na ini sa saindong pagdalaw liwat:
◼ “Sa kadakolan nin manlaenlaen na relihion ngonyan, paano niato masasabi kun arin an tama? Paano nindo maaaraman kun arin na relihion an tama? [Pasimbagon.] Si Jesus nagsabi sato kun paano mamimidbid an saiyang tunay na mga parasunod.” Basahon an Juan 13:35. Ipaliwanag an parapo 18 asin 19 sa kapitulo 5 kan librong Kaaraman. Idoon na paagi sa paggamit kan Makakasuratan na mga giyang ini, mamimidbid nin sarong tawo an tunay na relihion. Iestorya kun paanong an Mga Saksi ni Jehova midbid sa bilog na kinaban huli sa saindang tunay na pagkamoot asin halangkaw na mga pamantayan sa moral. Iesplikar kun paanong an pag-adal sa Biblia, na ginagamit an librong Kaaraman, klarong magpapamidbid kan paagi nin pagsamba na inooyonan nin Dios.
6 Kun kamo makanompong nin sarong magurang, an pagdolok na ini tibaad epektibo:
◼ “Aroaldaw, nakadadangog kita nin mga bareta manongod sa pasaway na gawe kan mga hoben na garo mayo nin ano man na mga pamantayan sa moral. Binabasol nin iba an mga eskuelahan sa dai pagtotokdo sa mga aki kun ano an tama asin sala. Siisay sa paghona nindo an dapat na magtao kan pagpapatood na ini? [Pasimbagon.] Hinanyoga nindo an sinasabi kan Biblia manongod sa hapot na ini. [Basahon an Efeso 6:4.] Iyan nagsasabi sa sato na an pagpapatadom nin moral na mga pamantayan sa mga aki responsibilidad kan mga magurang.” Buksan an librong Kaaraman sa pahina 145, basahon an parapo 16, asin komentohan an mga retrato sa pahina 147. Ipaliwanag na an libro dinisenyo tanganing pag-adalan kan bilog na pamilya. Ginagamit an parapo 17 asin 18 sa pahina 146, ialok na idemonstrar kun paano ta ginigibo an siring na pag-adal kaiba an mga pamilya.
7 Kun nakapoon kamo nin pag-adal sa sarong nahahadit na magurang sa enot na pagsongko, puede nindong ipadagos iyan sa saindong pagdalaw liwat paagi sa pagsabing:
◼ “An kinaban ngonyan nagtatao nin kadakoldakol na sugot sa atubangan kan satuyang mga hoben. Ginigibo kaini na magin depisilon para sa sainda na magin matatakton sa Dios mantang sinda nagdadakula. Tibaad nagigirumdoman nindo na sa huri niatong pag-oolay, pinalataw ta an duwang prinsipyo. Bilang diosnon na mga magurang, kaipuhan na magpaheling kita nin mararahay na halimbawa sa mga aki niato, asin dayaday na ipahayag an pagkamoot niato sa sainda. Sinasabi kan Biblia na may saro pang bagay na kaipuhan nin mga aki hale sa saindang mga magurang.” Basahon an Talinhaga 1:8. Buksan an pahina 148 sa librong Kaaraman asin ipadagos an pag-adal, na kinokobrehan an parapo 19-23. Isuherir na kamo mabalik giraray tanganing mag-adal kaiba an bilog na pamilya, na mapoon sa kapitulo 1.