Pag-alok kan Librong Kaaraman na Minagiya Pasiring sa Buhay na Daing Katapusan
1 Naogma kitang marhay kan iluwas an bagong libro na Kaaraman na Minagiya Pasiring sa Buhay na Daing Katapusan! Dinisenyo iyan tangani na tabangan an mga tawo na makaabot tolos sa tamang kaaraman kan katotoohan. Sa Marso magkakaigwa kita kan kaenot-enoteng oportunidad na ialok an librong ini sa satong teritoryo. Ano an puede niatong sabihon tanganing mapukaw an interes?
2 Puede nindong gamiton an sarong pag-atubang na nagtatampok kan Biblia bilang praktikal na gikanan nin giya, paagi sa pagsabi:
◼ Ipinakikipag-olay niamo sa samong kataraed kun saen makakukua nin praktikal na gikanan nin giya para sa pakapanggana sa mga problema sa buhay. Namamatean daw nindo na an Biblia sarong praktikal na giya ngonyan? [Pasimbagon, dangan basahon an 2 Timoteo 3:16, 17.] An mga prinsipyo sa Biblia aplikadong marhay ngonyan nin siring kaidto kan ipasabong nin Dios an pagsurat kaiyan.” Buksan sa pahina 16 kan librong Kaaraman, asin komentohan nin halipot an praktikal na giya na yaon sa Sermon sa Bukid ni Jesus. Basahon an kotasyon na nasa parapo 11 o an nasa parapo 13, dangan ialok an libro asin iareglo na bumalik tangani na simbagon an hapot na, Paano kita personalmenteng makikinabang sa kaaraman na yaon sa Biblia?
3 Kun makanompong kamo nin sarong magurang, puede nindong isentro an atension sa pamilya:
◼ “An kadaklan na magurang minaoyon na dakol an problema sa paghihingoa na papagdanayon an sarong maogmang buhay pampamilya. Ano an naoobserbaran nindo na seryosong mga kaolangan? [Pasimbagon.] An Biblia nagtatao nin ekselenteng sadol na makatatabang sa sato. [Basahon an mga kabtang sa Colosas 3:12,18-21.] Itinatao an marahay na hatol sa kapitulo 15 kan librong ini, na may temang ‘Pagtogdok nin Pamilya na Nagtatao nin Onra sa Dios.’ Ipinaheheling kaiyan kun paano mareresolberan an problema nin mag-agom asin makapanggagana sa mga problema na napaaatubang sa satong mga aki. Sierto ako na maoogma kamong basahon iyan.”
4 Boot daw nindong probaran an direktang pagdolok sa pagpoon nin pag-adal? Uya an saro na puedeng magin epektibo sa saindo:
◼ “Nag-aalok kami nin daing bayad na pag-adal sa Biblia sa harong. Nakapag-adal na daw kamo sa Biblia? [Pasimbagon.] Togoti akong ipaheling sa saindo an pantabang sa pag-adal na ginagamit niamo.” Ipaheling an librong Kaaraman, buksan sa pahina 3 tangani na maheling kan kagharong an mga laog, asin hapoton. “Napag-isip-isip na daw nindo kun ano an sinasabi kan Biblia dapit sa mga temang ini?” Buksan sa kapitulo na puedeng magin interesante para sa kagharong, asin basahon an mga subtema. Ipaliwanag na boot nindong idemonstrar sa halipot kun paano niato pinag-oolayan an impormasyon na ini sa satong pag-adal. Baga man maponan o dai an pag-adal, ialok an libro sa tawong iyan.
5 Ngonyan an kaburonyogan nin mga tawo naghihimate sa tamang kaaraman kan tunay na Dios. (Isa. 2:2-4) Pribilehio niato na tabangan an pinakadakol na mapupuede na makanood manongod ki Jehova asin magiyahan pasiring sa buhay.—1 Tim. 2:4.