An Teokratikong Paadalan sa Pagmiministro Para sa 1998
An pag-eskuela nangangahulogan nin pagigin “tinotokdoan o ineensayo sa sarong espesipikong kaaraman o abilidad.” Paagi sa Teokratikong Paadalan sa Pagmiministro, kita daing ontok na sinasanay sa kaaraman nin Dios. Siring man, an satong pakikikabtang sa paadalan na ini pinapangyayari kitang paoswagon an satong mga abilidad sa pagtaram asin pagtotokdo. An programa nin paadalan para sa 1998 tatawan kita nin dugang pang oportunidad na orog pang umoswag sa espirituwal.
Mantang iniestudyaran nindo an iskedyul sa masunod na taon, maririparo nindo na paminsanminsan an Kabtang Num. 3 ibabasar sa sarong tawohan sa Biblia na manonompongan sa mga tomo kan Insight. Dugang pa, an librong Kaogmahan nin Pamilya idinagdag sa kurikulum para sa 1998, asin an Kabtang Num. 3 asin Num. 4 kokobrehan iyan sa progresibong paagi. Kun an librong Kaogmahan nin Pamilya iyo an basehan para sa Kabtang Num. 4, gigibohon iyan na sarong pahayag sa kongregasyon nin sarong tugang na lalaki. Asin, bilang pagirumdom, dai nin siisay man sa programa sa paadalan na maninigong lumampas sa oras.
Sarong Bagong Kabtang: Para sa satong personal na kapakinabangan, an sarong “Suplementong Iskedyul sa Babasahon sa Biblia” ilinaag sa mga bracket pakatapos kan numero sa kanta sa kada semana. Minsan ngani mayong mga kabtang sa semanal na programa sa paadalan na ibabasar dian, gibohon nindong pasohan na sunodon iyan. Tatabangan kita kaini na magin ugale an pagbasa nin Biblia aroaldaw kun dai pa nindo iyan ginigibo.
Para sa dugang pang impormasyon manongod sa mga kabtang, konseho, asin mga nasusurat na repaso, tabi basahon nin maingat an mga instruksion na manonompongan sa “Iskedyul sa Teokratikong Paadalan sa Pagmiministro Para sa 1998,” patin sa pahina 3 kan Oktubre 1996 na An Satong Ministeryo sa Kahadean.
Kun kamo dai pa nagpalista sa Teokratikong Paadalan sa Pagmiministro, inaagda niamo kamo na magpalista na ngonyan. An daing kaparehong paadalan na ini nagpapadagos sa mahalagang kabtang kaiyan sa pagsasanay nin mapakumbaba asin debotong mga lingkod ni Jehova na magin mas kualipikado bilang saiyang mga ministro.—1 Tim. 4:13-16.