An Teokratikong Paadalan sa Pagmiministro Para sa 2000
1 An Teokratikong Paadalan sa Pagmiministro napatunayan na sarong mayaman na bendisyon para sa banwaan ni Jehova. Sa nag-aging 50 taon, tinabangan kaiyan an minilyon na pataluboon an saindang mga abilidad bilang pampublikong mga espiker asin paratokdo kan mga katotoohan sa Biblia. (Sal. 145:10-12; Mat. 28:19, 20) Naheheling daw nindo kun paano kamo natabangan kan paadalan? Iyan puedeng magpadagos sa paggibo kaiyan durante kan 2000 kun kamo makikikabtang dian nin lubos asin iaaplikar an konseho na itinatao.
2 An mga instruksion dapit sa mga asignasyon asin publikasyon na gagamiton nakalista sa enot na pahina kan iskedyul sa paadalan para sa 2000. Kinonsiderar an iinasignar na oras para sa kada kabtang, an reperensia, kun paano ipepresentar an materyal, asin iba pang detalye. Tawan tabi nin panahon na maingat na basahon an mga instruksion asin iaplikar iyan.
3 Semanal na Babasahon sa Biblia: Igwa nin duwang magkasuhay na programa para sa semanal na babasahon sa Biblia na nakalista sa iskedyul sa paadalan. An saro iyo an dating programa sa pagbasa na kinokobrehan an mga limang pahina kan Biblia. Basado sa babasahon na ini an mga tampok na kabtang kan Biblia. An saro pang programa sa pagbasa suplementaryo sana asin doble kaiyan an materyal na kinokobrehan. Paagi sa pagsunod sa programang ini, mahihimo nindong basahon an bilog na Biblia sa laog nin tolong taon. Siempre an nagkapira tibaad boot na magbasa nin mas halawig kisa nakaiskedyul sa suplementaryong programa, asin an iba tibaad dai kayang sundan iyan. Imbes na ikomparar an saindong sadiri sa iba, maggayagaya sa kaya nindong taposon. (Gal. 6:4) An mahalagang marhay iyo na basahon an Tataramon nin Dios aroaldaw.—Sal. 1:1-3.
4 Tangani na makapalista sa Teokratikong Paadalan sa Pagmiministro, maninigo na kaolayon nindo an paraataman sa paadalan. Tabi odok sa boot na akoon an saindong mga asignasyon, asin dai magkanselar kun dai man kaipuhan. Pahalagahan an paadalan bilang sarong probisyon hale ki Jehova. Mag-andam na marhay, magin pamilyar na marhay sa asignadong materyal, asin ipahayag an saindong sadiri gikan sa puso, sa siring nakikinabang nin lubos sa daing kaagid na paadalan na ini.