An Teokratikong Paadalan sa Pagmiministro Para sa 2001
1 May bastanteng dahelan sa Kasuratan kun taano kita gabos ta maninigong makikabtang nin lubos sagkod sa mapupuede sa Teokratikong Paadalan sa Pagmiministro.—Tal. 15:23; Mat. 28:19, 20; Gibo 15:32; 1 Tim. 4:12, 13; 2 Tim. 2:2; 1 Ped. 3:15.
2 An programa para sa semanal na babasahon sa Biblia haloy nang kabtang kan paadalan. Iyan nangangahulogan nin pagbasa nin mga sarong pahina kan Biblia kada aldaw. Poon ngonyan na taon, may iinasignar man na babasahon sa Biblia para sa kada semana nin nasusurat na repaso. An suplementong babasahon sa Biblia, na iiniskedyul kan nakaaging tolong taon, tapos na. Alagad kun orog pa dian an mawot nindong basahon sa Biblia kisa kan nakaiskedyul, puede kamong gumibo nin sadiri nindong programa nin pagbasa.
3 An Asignasyon Num. 2 sinasanay an mga tugang na lalaki para sa “pampublikong pagbasa” kan Tataramon nin Dios. (1 Tim. 4:13) Kun igwa kamo nin asignasyon sa pagbasa, paorootrong ensayohon iyan na makosog an tingog. Puede nindong gamiton an mga rekording kan Biblia sa audiocassette kan Sosyedad tangani na mapaoswag an saindong pagpronunsiar, pagliwatliwat kan boses, asin iba pang aspekto nin marahay na pagbasa.
4 An mga Asignasyon Num. 3 asin Num. 4 basado sa librong Reasoning, na iinandam tangani na magamit sa ministeryo sa langtad. Kun an asignadong materyal dai nindo gabos mahihimong ipakipag-olay sa itinaong oras, pilion sana an pinakapraktikal para sa teritoryo kan saindong kongregasyon. Puedeng gamiton an ano man na eksena na angay para sa saindong teritoryo.
5 Gibohon an gabos na rasonableng paghihingoa tangani na gibohon an gabos nindong asignasyon sa paadalan. Magtao nin panahon tangani na makapag-andam nin marhay, asin magtaram gikan sa saindong puso. Kamo magigin gikanan nin pamparigon sa boot para sa kongregasyon, asin personal kamong makikinabang paagi sa pagpartisipar nin bilog na puso sa Teokratikong Paadalan sa Pagmiministro ngonyan na 2001.