An Teokratikong Paadalan sa Pagmiministro Para sa 2002
1 An abilidad sa pagtaram ipinapasipara na sana kan kadaklan na tawo. Minsan siring, an pagtaram sarong regalo hale ki Jehova. Tinotogotan kita kaiyan na makikomunikar sa iba asin ipahayag an satong mga ideya asin saboot. Sa pangenot, paagi kaiyan puede niatong omawon an satong Dios.—Sal. 22:22; 1 Cor. 1:4-7.
2 Sinasanay an mga lalaki, babae, asin aki sa Teokratikong Paadalan sa Pagmiministro na ipahayag an ngaran ni Jehova. (Sal. 148:12, 13) An programa sa paadalan para sa 2002 nagtatratar nin kadakol na tema sa Biblia na personal niatong mapakikinabangan asin magagamit sa ministeryo. Paagi sa pag-andam para sa paadalan asin pakikikabtang dian, madudugangan niato an satong kaaraman asin an satong mga abilidad bilang mga paratokdo kan Tataramon nin Dios.—Sal. 45:1.
3 Basahon an Biblia Aroaldaw: Kun sa parate may Biblia kita na magagamit, puede niatong aprobetsaran an ano man na libreng oras niato na basahon iyan. An kadaklan sa sato igwa nin nagkapirang sobrang minuto durante kan aldaw na magagamit niato sa paaging ini. Kapakipakinabang nanggad na magbasa nin kisuerra sarong pahina aroaldaw, na igo na tangani na makadungan sa programa nin pagbasa sa Biblia na itinao sa iskedyul kan paadalan!—Sal. 1:1-3.
4 An abilidad sa mahusay na pagbasa kan Biblia makakatabang sa sato na mataros an puso kan mga naghihinanyog sa sato asin nakamomotibar sa sainda na omawon si Jehova. An mga tugang na lalaki na tinatawan nin Asignasyon Num. 2 sa paadalan maninigong mag-ensayo, mag-ensayo, mag-ensayo sa pagbasa nin makosog kan asignasyon. An paraataman sa paadalan matao nin komendasyon asin mga suhestion tangani na mapaoswag an pagbasa.
5 Gamiton an Librong Reasoning: An Asignasyon Num. 3 asin Num. 4 basado sa librong Reasoning. An kadaklan sa sato puede gayod na magin orog na mapagrisa sa paggamit kan praktikal na pantabang na ini sa ministeryo sa langtad. An mga tugang na babae maninigong pumili nin mga eksena na praktikal para sa teritoryo. An paraataman sa paadalan maninigong magtao nin partikular na atension sa kun paano sinda nagtotokdo asin naggagamit kan Kasuratan.
6 Logod na an Teokratikong Paadalan sa Pagmiministro makatabang sa sato gabos na padagos na gamiton an satong tao nin Dios na regalong pagtaram tangani na ikapahayag an maogmang bareta asin omawon an satong dakulang Dios, si Jehova!—Sal. 34:1; Efe. 6:19.