Sarong Paadalan na Sinasangkapan Kita Para sa Pinakamahalagang Aktibidad

¹ An mga tawo nag-eeskuela tangani na kumua nin instruksion na makakatabang sa sainda na maabot an saindang mga pasohan sa buhay. Minsan siring, may mas importante pa daw kisa pag-omaw sa mismong Paratao nin buhay asin pagtabang sa iba na manodan an saiyang mga katuyohan asin an saiyang mga dalan? Mayo. An obheto kan Teokratikong Paadalan sa Pagmiministro iyo na andamon kita na itokdo an satong pagtubod sa iba. Sa siring, mantang nag-aatender kita sa paadalan kada semana, nakakakua kita nin mga abilidad na sinasangkapan kita para sa pinakamahalagang mga aktibidad sa buhay.

² Itinao an “Iskedyul sa Teokratikong Paadalan sa Pagmiministro Para sa 2003” sa nakaaging bulan na isyu kan An Satong Ministeryo sa Kahadean. Kaiba sa iskedyul an mga detalye sa kun paano gigibohon an paadalan. Manonompongan nindo na praktikal na isaray an iskedyul sa saindong kopya kan Makinabang sa Edukasyon sa Teokratikong Paadalan sa Pagmiministro, na maninigo nindong darahon sa Teokratikong Paadalan sa Pagmiministro kada semana. Estudyare an nagkapira sa mga kabtang kan Teokratikong Paadalan sa Pagmiministro Para sa 2003.

³ Kualidad sa Pagtaram: Poon sa Enero, an kada pagtiripon mapoon paagi sa limang minutong pahayag manongod sa sarong kualidad sa pagtaram o aspekto nin pagbasa, pag-adal, o pagtotokdo. Itatao kan paraataman sa paadalan an pambukas na mga pahayag na ini, o puede siang mag-asignar nin ibang kualipikadong magurang sa kongregasyon na mapahayag kaini. Puedeng tokaron kan nagpapahayag an kahulogan asin importansia kan kualidad sa pagtaram. Dangan maninigo niang dagdagan pa an pagpaliwanag kan materyales paagi sa pagtokar nin mga halimbawa sa Kasuratan asin pagdemonstrar kun paano iaaplikar an kualidad sa pagtaram, na partikular na isinesentro an atension sa kun paanong an paggibo kaiyan makapaooswag kan satong ministeryo sa langtad.

⁴ Asignasyon Num. 1: An mga tugang na lalaki na inasignaran na magtao kan pahayag na nagtotokdo sinasadol giraray na “isentro an atension sa praktikal na halaga kan ipinaliliwanag na impormasyon.” Ini nangangahulogan nin pagpaheling sa kongregasyon kun paano gagamiton an impormasyon. Kun maresibi nindo an asignasyon na ini, helingon an pahina 48-9 kan librong pag-aadalan na Paadalan sa Pagmiministro para sa mga suhestion kun paano maandam, asin pag-adalan an mga reperensia na ipinaheheling sa indese kan libro sa irarom kan “Praktikal na pag-aplikar.”

⁵ Iskedyul nin Babasahon sa Biblia: Kun, kan nakaaging mga panahon, dai nindo nasundan an semanal na babasahon sa Biblia, taano ta dai magdesisyon na magdanay sa iskedyul ngonyan na taon? An mga naggigibo kaiyan matatapos an Kristianong Griegong Kasuratan sa katapusan kan taon. An mga pakinabang sa pagpoon nin programa nin pagbasa sa Biblia sa Kristianong Griegong Kasuratan tinotokar sa pahina 10, parapo 4, kan librong Paadalan sa Pagmiministro.

⁶ Tampok na mga Kabtang kan Binasa sa Biblia: An kabtang na ini pinalaba nin sampulong minuto tanganing an mga nagdadangog makapagkomento sa binasa sa semanang iyan. An mga naasignaran maninigong magdanay sa itinaong oras. Iaatubang iyan kada semana, kaiba an semana kan berbal na repaso. Mantang binabasa nindo an asignadong mga kapitulo, hanapon an mga punto na pakikinabangan nindo sa saindong pampamilyang pag-adal, sa saindong ministeryo, o sa saindong pamumuhay. Anong mga kualidad ni Jehova an ipinaheling sa saiyang tratamiento sa mga tawo asin mga nasyon? Ano an nanodan nindo na nakapakosog sa saindong pagtubod asin nakaparigon sa saindong pag-apresyar ki Jehova? Sueltong magkomento sa arin man na punto sa asignadong mga kapitulo, pati sa mga bersikulo na babasahon durante kan Asignasyon Num. 2, huling an tugang na lalaki na mabasa dai makomento sa mga bersikulo.

⁷ Asignasyon Num. 2: An enot na asignasyon kan estudyante kada semana iyo an pagsasanay sa pampublikong pagbasa. An gabos apuera sa huring pagbasa para sa kada bulan kukuanon sa babasahon sa Biblia sa semanang iyan. An ultimong pagbasa sa bulan na iyan kukuanon sa An Torrengbantayan. Maninigong basahon kan estudyante an asignadong materyales na dai nagtatao nin introduksion o konklusyon. Paagi kaini, ikasesentro nia an saiyang pangenot na atension sa saiyang mga abilidad sa pagbasa.​​—1 Tim. 4:13.

⁸ Asignasyon Num. 3 Asin Num. 4: An nagkapira sa mga asignasyon na ini igwa nin mas dakol na reperensia hale sa librong Reasoning kisa iba; an iba igwa sana nin tema. An mga tinawan nin asignasyon na limitado an reperensia o may tema sana magkakaigwa nin oportunidad na gibohon an saindang pag-atubang paagi sa pagsiyasat sa satong Kristianong mga publikasyon. Gigibohon kaining mas pasil para sa mga tugang na babae na ibagay an saindang mga komento sa saindang mga kaiba.

⁹ Mga Eksena: Siring kan ipinaheling sa pahina 45 kan librong Paadalan sa Pagmiministro, puedeng mag-asignar nin eksena an paraataman sa paadalan. Kun dai sia mag-asignar, kun siring puedeng pumili an mga tugang na babae nin eksena hale sa lista na nasa pahina 82. Kun an sarong tugang na babae nagtatao nin sarong kabtang kada duwang bulan, an 30 eksena matao nin igong pagkalaenlaen na matatapos sa laog nin limang taon. An mga tugang na babae na pinili an Num. 30, iyo na ngani, “Iba pang eksena na angay sa saindong lugar,” maninigong isurat an eksena sa ibaba o sa likod kan saindang assignment slip (S-89). Isusurat kan paraataman sa paadalan an petsa kan kabtang kan estudyante sa pahina 82 kan saiyang libro na kataed kan eksena na ginamit nia. Puede niang gibohon ini kadungan kan pagtao nia nin grado sa porma sa pagkonseho kan estudyante.

¹⁰ Porma sa Pagkonseho: An saindong porma sa pagkonseho kaiba na sa saindong libro. Iyan maheheling sa pahina 79-​81. Sa siring, kaipuhan nindong itao an saindong libro sa paraataman sa paadalan pakatapos kan kada kabtang nindo. An paraataman sa paadalan kaipuhan na magkaigwa nin rekord kan mga konseho na pinaooswag kan mga estudyante.

¹¹ Berbal na Repaso: An repaso sa Teokratikong Paadalan sa Pagmiministro gigibohon sa berbal na paagi. Iyan gigibohon sarong beses kada duwang bulan asin sa laog nin 30 minutos. An mga hapot na pag-oolayan durante kan repaso padagos na maluwas sa An Satong Ministeryo sa Kahadean. Kun an semanang nakaiskedyul para sa berbal na repaso kadungan kan semana nin pansirkitong asamblea o pagsongko kan paraataman sa sirkito, kun siring an mga kabtang sa masunod na semana maninigong itao sarong semana antes kaiyan asin an berbal na repaso maninigong iiskedyul giraray sa masunod na semana.

¹² Suplementaryong mga Klase: Sa mga kongregasyon na an nakalista sa paadalan labi sa 50, puedeng estudyaran kan kamagurangan na gumamit nin suplementaryong mga klase. “An areglong ini puedeng gamiton para sa gabos na kabtang nin estudyante o para sana sa duwang nahuhuri.” (Paadalan sa Pagmiministro, p. 285) An ikaduwang suhestion ginibo sa kapakanan kan mga kongregasyon na dakol an tugang na babae alagad pira sana an tugang na lalaki na makagigibo kan mga asignasyon sa pagbasa. Maninigong pumili an kamagurangan nin kualipikadong mga tugang na lalaki na mamamayo sa mga klaseng ini.

¹³ Katabang na Parakonseho: Siring sa ipinaheling sa iskedyul sa Teokratikong Paadalan sa Pagmiministro, an grupo nin kamagurangan maninigong magdesignar nin katabang na parakonseho na matao nin pribadong konseho sa kamagurangan asin ministeryal na lingkod na nag-aatubang kan tampok na mga kabtang sa Biblia asin nagtatao nin mga pahayag na nagtotokdo. An tugang na lalaki na inasignaran na gumibo kaini maninigong eksperyensiado, saro na an konseho igagalang kan iba pang mga magurang. An konseho nia maninigo na nakatatabang, na kinokomendaran an marahay na mga teknika sa pagtaram asin pagtotokdo patin nagrerekomendar nin saro o duwang punto para sa pag-oswag. Dai kaipuhan na magtao nin konseho pakatapos kan kada pahayag nin sarong tugang na parate nang nagpapahayag. Minsan siring, maninigong magin mapagmansay asin masabotan kan tugang na inasignaran na gumibo kan pagkonsehong ini na pati an mga tugang na nagtatao na ngonyan nin pampublikong mga pahayag puedeng matabangan na gumibo nin dugang pang pag-oswag.​​—1 Tim. 4:15.

¹⁴ Kun Ano an Dapat na Hinanyogon: Ano an makakatabang sa parakonseho sa pag-analisar nin sarong pag-atubang? An ikatolong kahon sa kadaklan kan 53 na de numerong kapitulo kan librong Paadalan sa Pagmiministro igwa nin halipot na sumaryo kun ano an dapat na hinanyogon. Maninigo man na tawan nin atension kan paraataman sa paadalan an iba pang mga pagirumdom o suhestion sa libro na makakatabang sa saiya na madaling ebalwaron an pagkasurusurumpay asin pagigin epektibo nin pag-atubang. Halimbawa, helinga an serye nin mga hapot sa itaas kan pahina 55 asin an mga ideya sa huring parapo na nasa pahina 163.

¹⁵ Suratan an mga Espasyo: Apuera sa mahiwas na mga marhen kaiyan, an librong Paadalan sa Pagmiministro igwa nin dakol na blangkong espasyo na dinisenyo tangani na masuratan nindo durante kan saindong personal na pag-adal asin kun nag-aatender kamo sa Teokratikong Paadalan sa Pagmiministro. (Helingon an pahina 77, 92, 165, 243, 246, asin 250.) Seguradohon na dara nindo an saindong libro kada semana. Subaybayan an pambukas na pahayag. Pagdanayon na nakabukas an libro nindo sa natatadang kabtang kan paadalan. Tandaan an mga suhestion kan paraataman sa paadalan. Magtaong atension sa mga pamamaagi nin pagtotokdo, hapot, halimbawa, pananaram na may piguratibong kahulogan, ilustrasyon, bisual na pantabang, asin pagkomparar kan kalaenan na ginagamit kan mga nagpapahayag. Paagi sa pagkua nin kapakipakinabang na mga nota, magigirumdoman asin magagamit nindo an dakol na marahayon na punto na nanodan sa paadalan.

¹⁶ Aram ni Jesu-Cristo na an paghuhulit kan maogmang bareta kan Kahadean nin Dios iyo an pinakadakulang pribilehio na puedeng ipaabot sa siisay man. Iyan an prinsipal na isinugo sa saiya. (Mar. 1:38) Sia nagsabi: ‘Kaipuhan na ipahayag ko an maogmang bareta kan kahadean nin Dios, huli ta dahelan kaini na ako isinugo.’ (Luc. 4:43) Siring kaidtong mga nag-ako kan pangagda na sumunod sa saiya, kita man sibot na marhay sa paghuhulit kan maogmang bareta, asin kita pirmeng nagmamaigot na paoswagon an kualidad kan satong “atang nin pag-omaw.” (Heb. 13:15) Sa katuyohan na iyan, kita logod magin determinado na makikabtang nin regular sa Teokratikong Paadalan sa Pagmiministro, sarong paadalan na makakatabang sa pag-andam sa sato para sa pinakamahalagang aktibidad sa buhay.