Kun Paano Kita Nakikinabang sa Teokratikong Paadalan sa Pagmiministro
1 An banwaan ni Jehova igwa nin napapalaen na pribilehio na mag-ako nin teokratikong edukasyon. (Isa. 54:13; Juan 6:45) Minsan siring, kun sagkod saen kita nakikinabang dian nakadepende sa kadaklan sa paghihingoa niato. Puede daw nindong marisa an positibong mga epekto kan Teokratikong Paadalan sa Pagmiministro sa saindong espirituwalidad?
2 Paborableng mga Komento: Naobserbaran nin dakol na paraataman sa paadalan na an lubos na pag-adal dapit sa mga kualidad sa pagtaram nagpaoswag sa pagigin epektibo kan saindang mga kongregasyon sa ministeryo sa langtad. Dugang pa, naheling nin sarong paraataman sa paadalan na bilang resulta kan probisyon na makapartisipar an mga nagdadangog sa tampok na mga kabtang kan Biblia, mas dakol an nagsusubaybay sa iskedyul kan babasahon sa Biblia. Mapadapit sa Asignasyon Num. 2, dakol na tugang an paborableng nagkomento manongod sa mga pakinabang sa pagkonsentrar sa babasahon na dai na kaipuhan na mag-andam nin introduksion asin konklusyon. An mga inasignaran kan kabtang na ini mas nagkokonsentrar nang marhay ngonyan sa pagpaoswag kan saindang mga abilidad sa pagbasa.—1 Tim. 4:13.
3 An Gabos Puedeng Makinabang: Puedeng magin dakulang kaogmahan an pagsimbag sa mga pagtiripon. (Tal. 15:23) Huling yaon na sa sato antes pa an mga hapot sa berbal na repaso, kita makakapag-andam para sa asin makakapakikabtang tolos sa repaso. Dugang pa, nagluwas sa isyu kan An Torrengbantayan na Enero 1, 2004 an tampok na mga kabtang kan mga libro sa Biblia na kadungan kan iinasignar sa sato na babasahon sa Teokratikong Paadalan sa Pagmiministro. Nakatabang an mga artikulong ini sa dakol na makatao nin nakakaparigon na mga komento durante kan tampok na mga kabtang sa Biblia. Itatampok kan maabot na mga isyu kan An Satong Ministeryo sa Kahadean an nagkapirang hapot sa berbal na repaso basado sa mga artikulong ini kan Torrengbantayan.
4 An gabos na nakalista sa paadalan may espesyal na pribilehio na mag-andam asin magpahayag kan mga asignasyon. Kita gabos puedeng makinabang sa positibong mga komento kan paraataman sa paadalan hale sa plataporma. Nakikinabang nin orog an indibiduwal na mga estudyante sa mga konseho na puedeng itao nia sa pribado pagkatapos kan pagtiripon. An mga praktis sa katapusan kan kada kapitulo kan librong Makinabang sa Edukasyon sa Teokratikong Paadalan sa Pagmiministro na nagtotokar kan mga kualidad sa pagtaram nagtatao nin dugang pang tabang.
5 Kun iinaapod sa saindong atension an praktikal asin sono sa Kasuratan na mga ideya durante asin pagkatapos kan paadalan, isurat ini sa saindong kopya kan librong pinag-aadalan na Paadalan sa Pagmiministro. Horophoropon an nanodan nindo, asin konsideraron kun paano nakakapaoswag sa saindong espirituwalidad an aspektong ini kan edukasyon hale sa Dios.