Mga Paraataman na Nangengenot—An Paraataman sa Teokratikong Paadalan sa Pagmiministro
1 An paraataman sa Teokratikong Paadalan sa Pagmiministro sarong gurang na lalaki sa espirituwal na nagmamaigot sa pagtaram asin pagtotokdo patin maninigo sa satong onra asin kooperasyon. (1 Tim. 5:17) Ano an saiyang mga paninimbagan?
2 Sia an nag-aasikaso kan libreriya sa Teokratikong Paadalan sa Pagmiministro sa Kingdom Hall. Sia interesadong marhay sa pag-enkaminar sa gabos na kualipikado na magpalista sa paadalan. Saiyang sinesegurado na may tamang rekord tanganing magibo an mga asignasyon sa aregladong paagi kisuerra tolong semana bago an kada sesyon kan paadalan. Kaipuhan na midbid niang marhay an kongregasyon, na isinasaisip an kada estudyante asin an mga kakayahan kaini. Dawa ngani puede siang magpatabang sa sarong tugang na lalaki sa pag-andam kan iskedyul sa paadalan, an pag-asignar kan mga kabtang tama sanang nasa personal na superbisyon kan paraataman.
3 Tanganing epektibong makapagtokdo sa paadalan, an paraataman dapat na mahigos na mag-andam kada semana, na maingat na inaadalan an asignadong materyal. Pinangyayari kaini na mapagdanay nia an entusiasmo kan kongregasyon dapit sa leksion, maaraman kun tama an pagkakobre kan asignadong materyal, asin ikatampok an importanteng mga punto na iiiba sa nasusurat na mga repaso.
4 Kasunod kan pahayag kan kada estudyante, kokomendaran kan paraataman an estudyante asin ipaliliwanag nia kun taano ta marahay an sarong kualidad sa pagtaram o kun taano ta kinakaipuhan iyan na paoswagon. Kun an siisay man nangangaipo nin dugang pang pagtotokdo sa pag-andam kan saiyang mga asignasyon sa paadalan, an paraataman o an saro na pinili nia puedeng magtao nin personal na tabang.
5 Tanganing lubos na makinabang sa pagmamaigot kan paraataman sa Teokratikong Paadalan sa Pagmiministro asin kan siisay man na dagdag pang parakonseho na naglilingkod sa irarom kan saiyang pagdirehir, maninigo kitang regular na umatender sa paadalan. Maninigo man niatong gibohon an gabos niatong asignasyon asin iaplikar an hatol na inaako niato siring man an mga itinatao sa ibang estudyante. Paagi kaini, progresibo kitang maoswag sa satong abilidad na iatubang sa publiko asin sa harong-harong an mensahe kan Kahadean.—Gibo 20:20; 1 Tim. 4:13, 15.