Tinatabangan Kita kan Teokratikong Paadalan sa Pagmiministro Para sa 2015 na Mapauswag an Satong Pagtutukdo

¹ An salmistang si David nagsurat: “Lugod na an mga tataramon kan sakong nguso asin an paghurop-hurop kan sakong puso magin nakakaugma sa saimo, O Jehova na sakong Gapo asin sakong Paratubos.” (Sal. 19:14, NW) Gusto man niyato na makapaugma ki Jehova an satong mga tataramon huling pinapahalagahan ta an satong pribilehiyo na magtaram kan katotoohan sa laog kan kongregasyon saka sa ministeryo. An saro sa mga paagi nin pagsasanay ni Jehova sa sato sa ministeryo iyo an Teokratikong Paadalan sa Pagmiministro. Ginigibo ini surusemana sa labing 111,000 na kongregasyon sa bilog na kinaban. Natabangan kaini an mga tugang sa bilog na daga na iba-iba an kamugtakan sa buhay na magin kuwalipikadong mga ministro kan maugmang bareta, an buot sabihon, may kakayahan na magtukdo nin mataktika, may pangungumbinsir, asin kusog nin buot.​—Gui. 19:8; Col. 4:6.

² An iskedyul sa paadalan para sa 2015 igwa nin mga topiko na makukua sa Insight on the Scriptures, Volume 1 asin sa “An Introduction to God’s Word” (“Mga Panginot na Manunudan sa Tataramon nin Diyos”) saka sa “Glossary of Bible Terms” na mahihiling sa New World Translation, 2013 Edition. May pagbabago man sa oras na gagamiton para sa Tampok na mga Kabtang sa Bibliya asin sa Asignasyon Num. 1. An pagbabagong ini pati na an instruksiyon kun paano ipepresentar an mga kabtang sa paadalan ipapaliwanag sa masunod na mga parapo.

³ Tampok na mga Kabtang sa Bibliya: An mga brother na aasignaran kaini igwa nin duwang minuto para magtao nin sarong interesante asin praktikal na punto hali sa semanal na babasahon sa Bibliya. Ikakahiras sa kongregasyon an mahalagang punto sa laog kan itinaong oras kun iyan pinaghandaan na marhay. Pagkatapos, arog kan dati, may anom na minuto an mga nagdadangog para magtao nin 30 segundos na komento o mas halipot pa dapit sa interesanteng mga punto na napahalagahan ninda sa semanal na babasahon sa Bibliya. Kaipuhan digdi an paghahanda asin disiplina sa sadiri para makatao nin makahulugan na komento sa laog nin 30 segundos, pero an paggibo kaiyan marahay na pagsasanay sa sato. Natatawan man kaiyan nin pagkakataon an iba na makapagkomento kan nanudan ninda sa saindang pag-adal.

⁴ Asignasyon Num. 1: Binawasan an babasahon asin an oras para sa pagbasa kan Bibliya—tulong minuto na sana o mas halipot pa. Mga kabanga kan sarong pahina an babasahon. An mga aasignaran na magbasa dapat na magpraktis nin nagkapirang beses paagi sa pagbasa kaiyan nin makusog asin pagtao nin atensiyon sa kun paano iyan sasayudon nin tama saka babasahon nin natural tanganing maipaabot an mensahe sa paaging nasasabutan. An gabos na lingkod ni Jehova dapat na maghinguwang magin mahusay sa pagbasa, huling may mahalagang papel iyan sa satong pagsamba. Nakakaugma nanggad ta kadakul sa satong mga aki an mahusay magbasa! Angay na komendaran an mga magurang sa saindang mamumuton na paghihinguwa na tabangan an saindang mga aki na magin matibay magbasa.

⁵ Asignasyon Num. 2: An limang minutong presentasyon na ini iaasignar sa sarong tugang na babayi. Dapat na gamiton an iinasignar na tema. Kun basado iyan sa impormasyon na nasa New World Translation, 2013 Edition, asin sa buklet na “Mga Panginot na Manunudan sa Tataramon nin Diyos,” iaplikar iyan sa sarong aspekto nin paglilingkod sa langtad na realistiko asin praktikal sa teritoryo nindo. Kun manungod iyan sa sarong karakter sa Bibliya na kinua sa Insight on the Scriptures, Volume 1, maninigong pag-adalan kan estudyante an impormasyon na nasa irarom kan pangaran kan karakter na iyan, pumili nin angay na mga teksto, asin ipahiling kun ano an manunudan sa halimbawa kaiyan. Puwedeng magdagdag nin mga teksto na konektado sa tema. Maasignar an paraataman kan paadalan nin sarong assistant.

⁶ Asignasyon Num. 3: An limang minutong presentasyon na ini iaasignar sa sarong tugang na lalaki o babayi. Kun iasignar sa tugang na babayi, ipepresentar ini arog kan Asignasyon Num. 2. Kun sa tugang na lalaki ini iasignar asin an tema basado sa Insight, ipepresentar ini bilang sarong pahayag na isinasaisip an mga nagdadangog. Maninigong pahiwason kan estudyante an inasignar na tema, pumili nin angay na mga teksto, asin ipahiling kun ano an manunudan sa halimbawa kan sarong karakter sa Bibliya.

⁷ Bagong Paagi nin Pagpresentar kan Asignasyon Num. 3 Para sa mga Tugang na Lalaki: Kun an tema basado sa New World Translation, 2013 Edition, asin sa buklet na “Mga Panginot na Manunudan sa Tataramon nin Diyos,” ipresentar iyan na sarong demonstrasyon nin pampamilyang pagsamba o paghuhulit sa langtad. An parating mangyayari, maasignar an paraataman kan paadalan nin sarong assistant asin setting. An assistant maninigo na kapamilya kan estudyante o sarong brother sa kongregasyon. Puwedeng magdagdag nin mga teksto na nagtatampok kan mga prinsipyo sa Bibliya na konektado sa tema. Sa pana-panahon, puwedeng iasignar sa sarong elder an kabtang na ini. Puwedeng siya an pumili kan saiyang assistant asin setting. Siguradong mapapakusog an kongregasyon na mahiling an mga elder na pigdedemonstrar an marahayon na paagi nin pagtutukdo kaiba an kapamilya o sarong brother.

⁸ Konseho: Pagkatapos kan kada presentasyon, may duwang minuto an paraataman kan paadalan para magtao nin komendasyon asin makakatabang na konseho basado sa librong Makinabang sa Edukasyon sa Teokratikong Paadalan sa Pagmiministro. Pag iniintrodusir kan paraataman kan paadalan an kabtang kan estudyante, dai niya sasambiton kun sa anong leksiyon susubaybayan an estudyante. Pagkatapos kan kada presentasyon, tatawan niya nin sinserong komendasyon an estudyante, sasambiton kun sa anong leksiyon hiniling an estudyante asin espesipikong sasabihon kun paano nagibo kan estudyante an leksiyon na iyan o kaya ipapaliwanag sa mabuot na paagi kun taano ta makikinabang an estudyante kun tatawan niya pa nin atensiyon an partikular na leksiyon na inasignar sa saiya.

⁹ An porma sa pagkonseho sa estudyante mahihiling sa pahina 79-81 sa sadiri niyang kopya kan librong Paadalan sa Pagmiministro. Pagkatapos na magibo kan estudyante an saiyang kabtang, mamarkahan iyan kan paraataman kan paadalan asin hahaputon nin pribado an estudyante kun nagibo niya an pagsasanay sa leksiyon na iyan. Puwedeng magtao nin komendasyon asin nin makakatabang pang suhestiyon pagkatapos kan pagtiripon o sa ibang panahon. Maninigong mansayon ini kan kada estudyante na sarong oportunidad na makakatabang sa saiya na umuswag sa espirituwal.​—1 Tim. 4:15.

¹⁰ Kun maglampas sa oras an estudyante, maninigo na magin alerto an paraataman kan paadalan o an assistant na magtao nin senyal, arog nin pagbagting o pagtaptap, para iparisa sa magalang asin maingat na paagi na lampas na siya sa oras. Dapat na dai iyan baliwalaon kan estudyante kundi tapuson na niya an saiyang sinasabi dangan bumaba sa entablado.​—Hilingon an librong Paadalan sa Pagmiministro, p. 282, par. 4.

¹¹ Dinadagka an gabos na kuwalipikado na magpalista sa Teokratikong Paadalan sa Pagmiministro. (Hilingon an librong Paadalan sa Pagmiministro, p. 282, par. 6.) An pagsasanay na itinatao kan paadalan na ini nakatabang sa mga lingkod ni Jehova na ihulit asin itukdo an maugmang bareta kan Kahadian nin may kumbiksiyon, dignidad, asin pagkamuot. Siyertong nauugma si Jehova na umawon kan gabos na nakikinabang na marhay sa teokratikong edukasyon!​—Sal. 148:12, 13; Isa. 50:4.