Mga Susundan kan mga Paraataman sa Paadalan
SA BALANG kongregasyon, may ninonombrahan na sarong magurang sa kongregasyon na magin an paraataman sa Teokratikong Paadalan sa Pagmiministro. Kun ipinaniwala sa saindo an paninimbagan na ini, an entusiasmo nindo para sa paadalan asin an personal na interes nindo sa pag-oswag kan balang estudyante puedeng magin darakulang bagay na nakakokontribwir sa magigibo kan paadalan sa lokal.
An sarong importanteng kabtang kan asignasyon nindo pangenotan an semanal na Teokratikong Paadalan sa Pagmiministro kan saindong kongregasyon. Isaisip na apuera sa mga estudyante na may mga asignasyon sa ano man na nakatalaan na okasyon, may mga ibang nag-atender. Pamayohan an paadalan sa paagi na an bilog na kongregasyon mag-ako nin nakamomotibar, praktikal na mga pagirumdom na konektado sa kisuerra saro sa mga obheto kan paadalan na sinasabi sa pahina 5 sagkod 8 kan librong pag-aadalan na ini.
Magpaheling nin interes sa gabos na estudyante, baga man nakaiskedyul sindang magbasa, tumao nin pag-atubang sa estilong demonstrasyon, o magpahayag. Tabangan sindang ibilang an ginigibo ninda na bako sanang asignasyon kundi sarong oportunidad na umoswag sa saindang paglilingkod ki Jehova. Siempre, an paghihingoa na personal nindang ginigibo mayor na bagay na nakakokontribwir sa pag-oswag ninda. Alagad importante man na kamo magpaheling nin maboot na interes, tabangan nindo sinda na masabotan an halaga kan mga puntong tinatawan nin konseho, asin ieksplikar nindo kun paano iaaplikar an konsehong iyan. Sa katuyohan na iyan, maingat na hinanyogon an balang pahayag tangani na makatao kamo nin mahahalagang komento.
Seguradohon na ponan asin taposon an paadalan nin nasa oras. Tumao nin marahay na halimbawa paagi sa pagpapadanay kan mga komento nindo na nasa laog kan oras na itinao para dian. Kun sumobra sa oras an sarong pahayag nin estudyante, maninigo na kamo o an sarong katabang magtao nin senyal. Maninigo na taposon kan estudyante an sentence na sinasabi nia dangan bumaba na sa plataporma. Kun magsobra sa oras an iba pang kabtang kan programa, lipotan an sadiri nindong komento, dangan ipakipag-olay iyan sa tugang pagkatapos kan pagtiripon.
Kun yaon kamo, maninigo na pamayohan nindo an paadalan. Kun may beses na dai kamo magigin presente, an paadalan maninigong asikasohon nin saro pang magurang sa kongregasyon na dati nang designado kan grupo nin kamagurangan. Kun kaipuhan nindo nin tabang sa paggibo nin mga iskedyul, pagllenar asin pagdistribwir nin mga sinusuratan kan asignasyon, o pag-areglo nin mga kasangli sa programa, an sarong ministeryal na lingkod na iinasignar kan grupo nin kamagurangan puedeng tumabang sa mga bagay na ini.
Paglista nin mga Estudyante. Enkaminaron an gabos na parahayag na magpalista sa paadalan. An iba na aktibong nakikiasosyar sa kongregasyon puedeng magpalista kun oyon sinda sa mga katokdoan kan Biblia asin an buhay ninda kaoyon nin Kristianong mga prinsipyo. Kun may magpahayag nin kamawotan na magpalista, tawan sia nin mainit na komendasyon. Kun sia bako pang parahayag, maninigo na bilang paraataman sa paadalan ipakipag-olay nindo sa saiya an mga kahagadan sa pagpalista sa paadalan, mas marahay kun ginigibo iyan kaatubang an nakikipag-adal sa saiya sa Biblia (o kaatubang an may pagtubod na magurang). An mga kahagadan na ini kapareho kan para sa pagigin dai pa bautisadong parahayag. Iyan yaon sa pahina 97 sagkod 99 kan Organized to Accomplish Our Ministry. Magkaigwa nin kompletong lista kan gabos na nasa paadalan.
Paggamit kan Porma sa Pagkonseho. An porma sa pagkonseho para sa balang estudyante yaon sa saiyang personal na kopya kan librong pag-aadalan, sa pahina 79 sagkod 81. Arog kan ipinaririsa kan klasipikasyon depende sa kolor, an arin man na puntong tatawan nin konseho poon 1 sagkod 17 magagamit kun an estudyante tinawan nin asignasyon na pagbasa. Para sa mga pag-atubang sa estilong demonstrasyon, magagamit an arin man na puntong tatawan nin konseho apuera an 7, 52, asin 53. Kaiba sa konseho para sa mga pahayag an gabos na punto apuera an 7, 18, asin 30.
Kun may iinasignar na sarong puntong tatawan nin konseho, maninigong seguradohon kan paraataman sa paadalan na iyan isurat nin lapis sa irarom kan “Petsang Iinasignar” sa espasyong itinao kataed kan puntong iyan sa porma sa pagkonseho na yaon sa libro kan estudyante. Pakatapos na magibo kan estudyante an asignasyon sa saiya, ihapot sa pribado kun baga ginibo nia an praktis na yaon sa poro kan pagtokar sa puntong tatawan nin konseho. Kun iyo, maninigong markahan nin tsek an kahon sa porma. Kun irinerekomendar nindo na ipadagos niang hingoahon na mapaoswag an iyo man sanang puntong tatawan nin konseho, dai na nin kaipuhan na idagdag na isurat sa porma sa pagkonseho; basta blangkohon sana an “Petsang Nagibo.” Iyan maninigo sanang markahan kun andam na siang dumagos sa ibang punto. Saro pa, sa pahina 82 kan libro kan estudyante, sa wala kan eksenang ginamit, maninigong isurat an petsa pagkatapos kan balang pahayag nin estudyante. May espasyo sa porma sa pagkonseho asin sa lista nin mga eksena tangani na magamit nin duwang beses an balang saro. Maninigong darahon nin mga estudyante an libro ninda durante kan programa.
Saro-saro sanang iasignar an puntong tatawan nin konseho sa pagtaram. Sa parate, pinakamarahay na iasignar an mga puntong tatawan nin konseho sono sa pagkasunodsunod nin pagkalista kaiyan. Minsan siring, kun may mga estudyante na nagpapaheling nin pambihirang abilidad, puede nindo sindang enkaminaron na magsadiri na sanang adalan asin iaplikar an nagkapirang leksion. Dangan puede nindo sindang tabangan sa mga punto na sa paniniwala nindo pinakamakakokontribwir sa pagtalubo ninda bilang mga epektibong magpahayag asin paratokdo.
Dawa dakol nang taon na nakalista sa paadalan an sarong estudyante, dakula an makukua niang pakinabang sa pag-adal asin pag-aplikar kan balang leksion. Tanganing matabangan an mga estudyante na may espesipikong mga pangangaipo, puede kamong pumili nin nagkapirang kualidad sa pagtaram na hihingoahon nindang mapaoswag imbes na basta sana sarosaroon an mga punto sa porma sa pagkonseho sa pinagkatodan na paagi.
Pagtao nin Konseho. Kun nagtatao nin konseho, gamiton nin tama an mga halimbawa asin prinsipyo sa Biblia. Maninigo na mamatean nin mga estudyante na an konsehong itinatao asin an espiritu sa likod kan pagtao kaiyan ginigiyahan kan halangkawon na mga prinsipyo kan Tataramon nin Dios.
Girumdomon na kamo “kapwa trabahador” kan saindong mga tugang na lalaki asin babae. (2 Cor. 1:24) Kapareho ninda, kaipuhan na kamo padagos na magmaigot na umoswag bilang nagpapahayag asin paratokdo. Personal na adalan an librong Makinabang sa Edukasyon sa Teokratikong Paadalan sa Pagmiministro, iaplikar an konseho kaiyan, asin magtao nin marahay na halimbawa tanganing gibohon man iyan nin iba.
Mantang ginigibo nindo iyan, gibohon na obheto nindo na tabangan an mga estudyante na magin matibay bumasa, may kakayahan na magpahayag, asin epektibong paratokdo. Sa katuyohan na iyan, hingoahon na itao an ano man na tabang na kaipuhan tangani na masabotan kan mga estudyante kun ano an laen-laen na kualidad sa pagtaram, kun taano ta importante an mga ini, asin kun paano iyan kukultibaron. Ginibo an librong pag-aadalan na ini sa paagi na matabang sa saindo na magibo iyan. Minsan siring, parate na an kaipuhan na gibohon nindo bako sanang basta basahon an mga sinasabi sa libro. Tokaron an mga ideya na ipinahahayag kan mga iyan asin kun paano iyan iaaplikar.
Kun marahay an ginibo nin estudyante sa sarong punto, tawan sia nin komendasyon. Sabihon sa halipot kun ano an dahelan na iyan epektibo o kun taano ta importante an ginibo nia. Kun makikinabang sia sa pagtao nin dagdag na atension sa sarong bagay, seguradohon na nasasabotan nia kun taano. Idetalye kun paano iyan gigibohon. Magin espesipiko, asin kadungan kaiyan, magin maboot.
Girumdomon na para sa dakol, depisilon an tumindog tanganing tumao nin pag-atubang sa atubangan nin sarong grupo. Kun sa paghona nin saro bakong marahay an ginibo nia, tibaad isip-isipon nia kun baga maninigo siang magpadagos na magmaigot. Arogon si Jesus, na dai rinonot an “nalanog na gaho” o pinarong an “nagbabagang linong mitsa.” (Mat. 12:20) Konsideraron an emosyon kan estudyante. Kun nagtatao nin konseho, isipon kun baga an estudyante medyo bagohan o eksperyensiado nang parahayag. An may init asin tunay na komendasyon puedeng makapakosog sa mga tawo na padagos na gibohon an pinakamakakaya ninda.
Trataron an balang estudyante sa paaging may dignidad. Sinasabi sa sato kan Roma 12:10: “Sa pagtao nin onra sa lambang saro mangenot kamo.” Abaa kaangay na sadol para sa parakonseho sa Teokratikong Paadalan sa Pagmiministro! Kun an estudyante mas matua sa saindo, maingat na iaplikar an giyang itinatao sa 1 Timoteo 5:1, 2. Minsan siring, ano man an edad nin sarong tawo, kun an konseho na may kalabot na pagliwat sa saiyang paagi itinatao sa maboot na paagi, parate na iyan mas inaako.—Tal. 25:11.
Kun nagtatao nin konseho, idoon sa estudyante an obheto kan pagpatood. An obhetong iyan bako sanang tanganing matawan nin komendasyon asin masabihan na dumagos na sa sumunod na puntong tatawan nin konseho. An pasohan bakong magin nagpapahayag asin paratokdo na hahangaan nin iba. (Tal. 25:27) An kamawotan niato gamiton an talento niato sa pagtaram sa pag-omaw ki Jehova asin sa pagtabang sa iba na mamidbid saka kamotan sia. An pagpatood sa sato tanganing andamon kita na epektibong maasikaso an gibohon na sinasabi sa Mateo 24:14 asin 28:19, 20. An bautisadong mga tugang na lalaki na kualipikado tibaad pag-abot nin panahon imbitaran na makikabtang sa pag-ataman sa “aripompon nin Dios” bilang mga nagpapahayag sa publiko asin paratokdo.—1 Ped. 5:2, 3.
Isuherir na basahon kan mga estudyante an pagtokar sa librong pag-aadalan kan masunod nindang punto na tatawan nin konseho mga pirang aldaw pakatawan kan asignasyon. Enkaminaron sinda na iaplikar an nanonodan ninda sa pag-andam kan mga kabtang ninda sa paadalan, sa pakikipag-olay sa aroaldaw, sa pagkomento sa mga pagtiripon, asin sa paglilingkod sa langtad.
Pagtao nin mga Asignasyon. Sa ordinaryong kamugtakan ini maninigong gibohon kisuerra tolong semana antes pa. An gabos na asignasyon maninigo na itao na nakasurat kun puede.
An mga kabtang na kalabot an pagtotokdo sa kongregasyon maninigong itao sa mga magurang sa kongregasyon, mas marahay kun sa mga makakagibo kan mga kabtang na iyan nin epektibo, asin sa ministeryal na mga lingkod na matibay na mga paratokdo.
Sa pagdeterminar kun arin na mga pahayag nin estudyante an itatao sa mga tugang na lalaki asin kun arin an itatao sa mga tugang na babae, sunodon an instruksion na itinatao kaiba kan iskedyul kan paadalan. Kun pipira sana an tugang na lalaki alagad dakol an tugang na babae na nagtatao nin mga pahayag nin estudyante, mag-ingat na tawan nin igong oportunidad an mga tugang na lalaki na makatao nin mga pahayag na bako sanang pagbasa.
Konsideraron an kamugtakan nin mga indibiduwal kun nagtatao nin mga asignasyon. Kaipuhan daw na iasignar an sarong magurang sa kongregasyon o ministeryal na lingkod na magtao nin pahayag sa paadalan sa banggi na sia may kabtang sa Pagtiripon sa Paglilingkod o sa semana na sia may pampublikong pahayag sa kongregasyon? Kaipuhan daw na iasignar an sarong tugang na babae na tumao nin pag-atubang sa banggi na kadungan kan saro niang hoben pang aki, na tibaad kaipuhan niang tabangan? Nangorogna sa kaso nin sarong hoben o inaadalan na dai pa bautisado, angay daw an tema? Berepikaron na an asignasyon angay sa puntong tatawan nin konseho na hinihingoang paoswagon kan estudyante.
Para sa mga asignasyon na itinao sa mga tugang na babae, parate na an estudyante an mapili kan eksena nia kaoyon kan instruksion sa pahina 78 asin 82. Maninigo na mag-asignar nin sarong kaiba, alagad puedeng gumamit nin dagdag pang kaiba. Kun an estudyante maghagad nin kaiba na bagay na bagay para sa sarong eksena, maninigong konsideraron an kahagadan na iyan.
Suplementaryong mga Klase. Kun labi sa 50 estudyante an nakalista, tibaad gusto nindong konsideraron an paggamit nin suplementaryong mga lugar para sa mga kabtang na ginigibo nin mga estudyante. Segun sa lokal na pangangaipo, an areglong ini puedeng gamiton para sa gabos na pag-atubang nin estudyante o para sana sa duwang nahuhuri.
An balang suplementaryong klase maninigo na may kualipikadong parakonseho, mas marahay kun magurang sa kongregasyon. Sa kamugtakan na kaipuhan, puedeng magin kasangli an sarong kualipikado nanggad na ministeryal na lingkod. An pag-aprobar sa mga parakonsehong ini maninigong itao kan grupo nin kamagurangan. Maingat na makipagtabangan sa sainda tangani na epektibong masubaybayan an mga estudyante saen man an masunod na pag-atubang ninda.
Espesyal na Klase sa Pagbasa. Kun madeterminaran kan grupo nin kamagurangan na dakol sa kongregasyon an nagkakaipo nin pundamental na pagtotokdo sa pagbasa kan lenguahe na ginagamit sa kongregasyon, puedeng iareglo nindo ini kakombinar kan Teokratikong Paadalan sa Pagmiministro. Puedeng kalabot sa pagtotokdong ini an pundamental na abilidad sa pakabasa asin pakasurat, o puedeng an obheto kaiyan pakarhayon an pagbasa.
An mga klaseng iyan dai kaipuhan na gibohon kadungan kan mga pahayag nin estudyante sa Teokratikong Paadalan sa Pagmiministro. Tangani na ikatao an supisyenteng tabang, tibaad mas dakol na oras an kaipuhan kisa posible durante kan paadalan. Puedeng determinaran kan lokal na kamagurangan kun ano an kaipuhan asin kun noarin itatao an pagtotokdong iyan. Segun sa pangangaipo, puedeng gibohon an areglo para sa pagtotokdo sa sarong grupo o sorolohan sana.
Kaipuhan an kualipikadong paratokdo. Mas marahay na iasignar an sarong tugang na lalaki na matibay bumasa asin tataong marhay kan lenguahe. Kun mayo nin tugang na lalaki, puedeng pakiolayan kan kamagurangan an sarong may kakayahan, arogan na tugang na babae na tumabang. Maninigo na sia magkolbong kun nagtotokdo sa klase.—1 Cor. 11:3-10; 1 Tim. 2:11, 12.
An pulyetong Apply Yourself to Reading and Writing ilinuwas sa dakol na lenguahe. Dinisenyo iyan na magtokdo nin pundamental na abilidad sa pakabasa asin pakasurat. Puede man na gamiton an ibang materyales sa pagtotokdo, depende sa grado kan abilidad sa pagbasa kan mga nakalista. Kun supisyente na an nagibong pag-oswag kan mga estudyante, sinda maninigo na enkaminaron na makikabtang sa regular na programa kan Teokratikong Paadalan sa Pagmiministro.
Bilang paraataman sa Teokratikong Paadalan sa Pagmiministro, dakula an magigibo nindo tanganing makinabang an kongregasyon. Mag-andam nin toltol, asin kaoyon kan hatol sa Roma 12:6-8, asikasohon an asignasyon sa saindo bilang mahalagang marhay na ipinaniwala nin Dios.