Kita Dapat na Paorootrong Sumongko
1 Kamo daw naghimate kan enot na may nakipag-olay sa saindo dapit sa maogmang bareta? Kun dai, dapat kamong magpasalamat na paorootrong nagsongko an Mga Saksi ni Jehova sagkod na sa katapustapusi inako nindo an alok na pag-adal sa Biblia. Marahay na isip-isipon iyan kun paorootro nindong hinuhulitan an iinasignar sa saindo na teritoryo.
2 An buhay nin mga tawo daing ontok na nagbabago. Sinda napapaatubang sa bagong mga problema o situwasyon, nakababareta manongod sa nakapupurisaw na mga pangyayari sa komunidad o sa kinaban, nag-aagi nin kapierdihan sa ekonomiya, o may naghehelang o nagagadan sa pamilya. An mga bagay na iyan puedeng magin dahelan na booton nindang aramon an dahelan kan mga kapurisawan na ini. Dapat niatong marisa an mga bagay na nakapanluluya sa isip nin mga tawo dangan humiro dara an nakararangang mensahe.
3 Ini Sarong Gibong Pagsukoro: Isip-isipa nindo an mga parasukoro sa sarong lugar na may kalamidad. Minsan ngani an nagkapira tibaad naghahanap sa sarong lugar na kun saen pipira sana an nanonompongan na nakaligtas, dai sinda nagpapabaya asin minaontok huli ta an saindang mga katabang mas dakol an nanonompongan na nakaligtas sa ibang lugar. An satong pagsukoro dai pa tapos. Kada taon, ginatos na ribo na boot na maligtas sa “dakulang kahorasaan” an nanonompongan.—Kap. 7:9, 14.
4 “An gabos na nag-aapod sa ngaran ni Jehova maliligtas.” (Roma 10:13-15) An mga tataramon na ini maninigong itudok sa isip kan kada saro sa sato an pangangaipo na magpadagos sa paghuhulit. Poon kan enot na ponan na kobrehan an satong teritoryo, an mga aki nagdarakula na asin ngonyan husto na sa edad tanganing mag-isip nin seryoso para sa saindang sadiri kan manongod sa saindang ngapit asin sa katuyohan nin buhay. Mayo kitang paagi na maaraman kun siisay sa katapustapusi an mahinanyog. (Ecl. 11:6) Nag-ako kan katotoohan an dakol na dating paratumang. An satong trabaho, bakong husgaran an mga tawo, kundi padagos na tawan sinda nin oportunidad na maghinanyog asin ikasalbar sa daan na kinaban na ini. Siring kan ginibo kan enot na mga disipulo ni Jesus, kita dapat na ‘padagos na magduman’ sa mga tawo asin pagmaigotan na pukawon an saindang interes sa mensahe kan Kahadean.—Mat. 10:6, 7.
5 An katunayan na an dalan bukas pa tanganing kita makapaghulit sarong kapahayagan kan pagkaherak ni Jehova. (2 Ped. 3:9) Mantang tinotogotan niato na paorootrong makadangog an iba kan mensahe, satong itinatampok an pagkamoot nin Dios, asin paagi kaini inoomaw niato sia.