Naheheling Ninda na Kita Napapalaen

¹ Kan nakaaging taon, labing 300,000 na bagohan an uminiba sa sato paagi sa pagpabautismo. Ano daw an naheling kan mga tawong ini sa Mga Saksi ni Jehova na nagigin dahelan na booton nindang magin kabtang kan organisasyon nin Dios? Taano kita ta napapalaen na marhay sa gabos na iba pang relihion? Uya an nagkapirang risang-risa na simbag:

—Sinusuportaran niato an Biblia imbes na an personal na mga opinyon: Sinasamba niato si Jehova Dios “sa espiritu asin katotoohan,” siring kan sinabi ni Jesu-Cristo na gibohon. Nangahulogan ini nin pagsayuma sa relihiosong mga kaputikan asin pagsunod sa nasusurat na Tataramon nin Dios.—Juan 4:23, 24; 2 Tim. 3:15-17.

—Nagduduman kita sa mga tawo imbes na halaton na sinda an dumolok sa sato: Inako niato an sugo ni Cristo na maghulit asin magtokdo, asin inaarog niato an saiyang halimbawa sa paghanap kan mga sadiosan an puso. Hinahanap niato sinda sa saindang harong, sa tinampo, o saen man sinda puedeng manompongan.—Mat. 9:35; 10:11; 28:19, 20; Gibo 10:42.

—Nagtatao kita sa gabos nin pagtotokdo sa Biblia na daing bayad: Libre niatong ginagamit an satong mga pondo asin kosog, na idinudusay an labing sarong bilyon na oras kada taon sa paglilingkod sa Dios. Daing pagpaorog na ipinakikipag-adal niato an Biblia sa gabos na klase nin tawo.—Mat. 10:8; Gibo 10:34, 35; Kap. 22:17.

—Kita sinanay na marhay na tumabang sa mga tawo sa espirituwal na paagi: Paagi sa satong personal na pag-adal kan Biblia asin sa pagtotokdo na itinatao sa mga pagtiripon kan kongregasyon, asamblea, asin kombension, nag-aako kita nin daing kaagid sa halaga, nagpapadagos na teokratikong edukasyon, na nagpapangyari sa sato na mapaliwanagan an iba sa espirituwal na paagi.—Isa. 54:13; 2 Tim. 2:15; 1 Ped. 3:15.

—Isinasaboot niato an katotoohan, na iinaaplikar iyan sa satong aroaldaw na pamumuhay: Huli sa satong pagkamoot sa Dios, kita naggigibo nin mga pagliliwat, na iinooyon an satong buhay sa saiyang kabotan. An satong arog-Cristong bagong personalidad nakaaakit sa iba sa katotoohan.—Col. 3:9, 10; Sant. 1:22, 25; 1 Juan 5:3.

—Kita naghihingoa na matoninong na mamuhay asin magtrabaho sa kaibanan nin iba: An pagkultibar nin diosnon na mga kualidad nakatatabang sa sato na bantayan an satong mga hiro-hiro asin pagtaram. Kita ‘naghahanap nin katoninongan asin ginigibo iyan’ sa kaibanan nin gabos na tawo.—1 Ped. 3:10, 11; Efe. 4:1-3.

² An mga halimbawa nin Kristianong pamumuhay na naheheling kan mga tawo sa organisasyon ni Jehova nagmomotibar sa iba na akoon an katotoohan. An sato logod na personal na halimbawa igwa kan iyo man sanang epekto sa mga nakamimidbid asin nagmamasid sa sato.