Taano ta Padagos Kitang Nagbabalik?
1 Hinapot na daw nindo kaiyan an saindong sadiri, tibaad mantang nag-aandam kamo na lumuwas sa paglilingkod? Hinuhulitan niato an satong teritoryo nin paorootro, taon-taon. An dakol na kagharong namimidbid kita asin nagsasayuma sindang maghinanyog sa sato. An nagkapira direktang sinasabihan kita na dai na bumalik. Pipira sanang gayo an puedeng magkaigwa nin marahay na reaksion. Kaya angay an hapot na: “Taano ta padagos kitang nagbabalik?” Isip-isipa an minasunod na mga dahelan.
2 Enot sa gabos, pinagbobotan kitang padagos na ihulit an mensahe kan Kahadean sagkod na dumatong an katapusan. (Mat. 24:14; 28:19, 20) Naghapot si propeta Isaias kun gurano kalawig na dapat niang ipadagos an saiyang paghuhulit. An simbag na inako nia nasusurat sa Isaias 6:11. Mayong kustion manongod dian—sinabihan sia na padagos na bumalik na dara an mensahe nin Dios. Siring man ngonyan, maski ngani tibaad magsayuma sindang maghinanyog, linalaoman kita ni Jehova na padagos na songkoon an mga tawo sa satong teritoryo. (Ezeq. 3:10, 11) Ini sagradong paninimbagan na ipinagkatiwala sa sato.—1 Cor. 9:17.
3 An saro pa niatong dahelan na padagos na bumalik iyo na tinatawan kita kaini nin oportunidad na ipaheling an rarom kan satong debosyon ki Jehova. (1 Juan 5:3) Apuera kaiyan, kun hinohorophorop niato an magigin ngapit kan katawohan, paano niato mapopogolan an satong sadiri sa paghihingoa na patanidan an satong mga kataed? (2 Tim. 4:2; Sant. 2:8) An satong pagigin fiel sa paggibo kan satong asignasyon nagtatao sa sainda nin paorootrong mga oportunidad na maghimate sa mensahe nin Dios, tanganing dai sinda makapagsabi na dai sinda pinatanidan.—Ezeq. 5:13.
4 Dagdag pa, dai niato noarin man aram kun noarin magbabago an puso nin mga tawo. Puedeng huli iyan sa pagbabago sa saindang mga sirkumstansia, trahedya sa saindang pamilya, o mga kamugtakan sa kinaban na ikinahahadit ninda. Dugang pa, an sinasabi niato puedeng makapukaw nin marahay na reaksion. (Ecl. 9:11; 1 Cor. 7:31) Siring man, minabalyo an mga tawo. Tibaad makanompong kita nin bagong mga residente sa satong teritoryo na maghihimate sa maogmang bareta.
5 Kita daw padagos na mabalik? Iyo! An Kasuratan tinatawan kita nin bastanteng motibasyon na padagos na bumalik. Kun tapos na an paghuhulit, bebendisyonan kita ni Jehova huli sa satong padagos na paghihingoa sa ministeryo, asin bebendisyonan nia an mga naghinanyog sa sato.—1 Tim. 4:16.