Padagos na Maghulit!
1 Kabotan nin Dios na “an gabos na klase nin tawo makaligtas asin makaabot sa tamang kaaraman sa katotoohan.” (1 Tim. 2:4) Sa dahelan na ini, itinao nia sa sato an asignasyon na ihulit an maogmang bareta. (Mat. 24:14) Kun nasasabotan niato kun taano ta maninigo kitang padagos na maghulit, an ano man na panluluya kan boot o potensial na disturbo na mapaatubang sa sato dai makapadedesganar sa sato.
2 Taano ta Kaipuhan na Magpadagos? Dakol an disturbo sa kinaban na nagpapangyari sa mga tawo na malingawan o basangbasangon an sinasabi niato sa sainda. Kaya dapat niatong padagos na pagirumdomon sinda manongod sa mensahe nin Dios na kaligtasan. (Mat. 24:38, 39) Saro pa, pirmeng nagbabago an mga sirkunstansia sa buhay nin mga tawo. Dawa an mga kamugtakan sa kinaban puedeng bigla na sanang magbago. (1 Cor. 7:31) Sa aga, sa masunod na semana, o sa masunod na bulan, an mga tawong hinuhulitan niato tibaad mapaatubang sa bagong mga problema o kapurisawan na nagpapangyari sa sainda na seryosong isip-isipon an maogmang bareta na dinadara niato sa sainda. Dai daw kamo nagpapasalamat na nagpadagos an Saksi na nagdara sa saindo kan katotoohan?
3 Tangani na Arogon an Pagkaherak nin Dios: Mapasensiang tinogotan ni Jehova na umagi an panahon bago hokoman an mga maraot. Paagi sa sato sia padagos na nakikiolay sa mga tama an kamugtakan nin puso na dumolok sa saiya asin maligtas. (2 Ped. 3:9) Magkakasala kita sa dugo kun dai niato padagos na ibalangibog an maheherakon na mensahe nin Dios sa mga tawo asin patanidan sinda manongod sa nagdadangadang na paghokom nin Dios sa gabos na dai minatalikod sa saindang maraot na mga dalan. (Ezeq. 33:1-11) Dawa ngani bako pirmeng marahay an pag-ako sa satong paghuhulit, nungka kitang magpabaya na gibohon an gabos na paghihingoa na tabangan an mga sinsero na pahalagahan an dakulang pagkaherak nin Dios.—Gibo 20:26, 27; Roma 12:11.
4 Tangani na Ipaheling an Satong Pagkamoot: Si Jehova Dios, paagi ki Jesu-Cristo, an nagboot na ihulit an maogmang bareta sa bilog na daga. (Mat. 28:19, 20) Maski dai maghinanyog an mga tawo, may oportunidad kita na ipaheling an satong pagkamoot asin debosyon sa Dios paagi sa pagpadagos sa paggibo nin tama.—1 Juan 5:3.
5 Logod na kita magin determinado na padagos na maghulit! Gibohon niato iyan nin maigot mientras na “aldaw [pa] nin kaligtasan” ni Jehova.—2 Cor. 6:2.