Taano ta Padagos na Maghulit?
1 Haloy na daw na ginigibo sa saindong komunidad an paghuhulit kan Kahadean? (Mat. 24:14) Kun iyo, tibaad an pagmate nindo nakobrehan nang marhay an teritoryo kan kongregasyon. Ngonyan kun kamo naghuhulit, tibaad an kadaklan na tawong nanonompongan nindo garo baga indiperente sa mensahe kan Kahadean. Dawa siring, mangnoha an rinerekonoser manongod sa tunay na mga disipulo ni Jesus sa pahina 141 kan librong Isaiah’s Prophecy II: “Sa nagkapirang lugar, an resulta kan saindang ministeryo tibaad garo baga kadikiton kun ikokomparar sa kadakolan nin gibohon asin paghihingoa na ginibo. Sa ibong kaiyan, sinda nagtatagal.” Alagad taano ta padagos na maghulit?
2 Girumdoma si Jeremias: An satong fiel na pagtagal sa paghuhulit dai maninigong magdepende sa kun baga an mga tawo naghihinanyog sa sato o dai. Si Jeremias naghulit sa laog nin 40 taon sa iyo man sanang teritoryo dawa ngani pipira sanang marhay an naghihinanyog sa saiya asin dakol an nagkokontra sa saiyang mensahe. Taano ta nagmaigot si Jeremias? Huli ta sia naggigibo nin gibohon na ipinagboot nin Dios na gibohon nia asin an saiyang kaaraman manongod sa kun ano an mangyayari sa ngapit an nagpahiro sa saiya na padagos na pusoan na magtaram.—Jer. 1:17; 20:9.
3 Kaagid kaiyan an satong situwasyon. Si Jesus ‘pinagbotan kita na maghulit sa mga tawo asin magtao nin lubos na pagpatotoo na ini iyo an Saro na itinalaga nin Dios na magin hokom kan mga buhay asin gadan.’ (Gibo 10:42) An mensahe na dinadara niato nangangahulogan nin buhay asin kagadanan para sa mga naghihinanyog kaiyan. Hohokoman an mga tawo basado sa saindang reaksion sa maogmang bareta. Huli kaiyan, an paninimbagan niato iyo na gibohon nanggad an siring sa ipinagboot sa sato na gibohon. Dawa kun habong maghinanyog an mga tawo, ini nagtatao sa sato nin oportunidad na ipaheling an rarom kan satong pagkamoot sa sainda asin an satong debosyon ki Jehova paagi sa danay na paggibo kan dapat niatong gibohon. Alagad igwa nin orog pa.
4 Nakikinabang Kita: An paggibo kan kabotan nin Dios, ano man an reaksion sa teritoryo, nagtatao sa sato nin panlaog na katoninongan, satispaksion, asin kaogmahan, na dai manonompongan sa arin man na iba pang paagi. (Sal. 40:8) An satong buhay nagkakaigwa nin tunay na kahulogan asin katuyohan. Mientras na kita nakikikabtang sa ministeryo, orog man na nakasentro an satong puso asin isip sa paglaom asin kagayagayahan na mabuhay sa bagong kinaban nin Dios. An paghorophorop sa mga panuga na ini na nasa Kasuratan nagpapaoswag kan satong espirituwalidad asin nagpapakosog kan satong relasyon ki Jehova.
5 Dawa kun dai niato naheheling tolos an mga resulta sa satong paghuhulit, tibaad ikinatanom na an banhi nin katotoohan sa puso nin indibiduwal na matubo sa itinalaan na panahon ni Jehova. (Juan 6:44; 1 Cor. 3:6) Mayo sa sato nin nakaaaram kun pira pa an makanonood manongod sa Kahadean paagi sa mga paghihingoa kan banwaan ni Jehova, magsalang sa lokal o sa bilog na kinaban.
6 Orog kisa kasuarin man, maninigo niatong himateon an instruksion ni Jesus: “Magdanay kamong mapagmasid, magpuka kamo, huli ta dai nindo aram kun noarin an itinalaan na panahon. Alagad an isinasabi ko sa saindo isinasabi ko sa gabos, Magdanay kamong mapagbantay.” (Mar. 13:33, 37) Kun siring, logod na kita gabos padagos na magpahayag kan maogmang bareta kan Kahadean, na pinagagayagaya an puso ni Jehova mantang kita nakikikabtang sa pagsantipikar kan saiyang dakula asin banal na ngaran.