Kun Taano ta Paorootro Kitang Nagbubuelta
1. Anong hapot an minalataw mapadapit sa satong paghuhulit?
1 Sa dakol na lugar, parateng marhay na nahuhulitan niato an satong teritoryo. Padagos kitang nagbubuelta nin paorootro sa iyo man sanang mga harong, minsan ngani tibaad sinabihan na kita kan kagharong na dai sia interesado. Taano ta padagos kitang nakikipag-olay sa mga dai naghimate nin paborable kan nakaagi?
2. Ano an pangenot na dahelan na nagmamaigot kita sa ministeryo?
2 Pagkamoot ki Jehova Asin sa mga Tawo: An pangenot na dahelan na nagmamaigot kita sa ministeryo iyo an satong pagkamoot ki Jehova. Pinapahiro kita kan satong puso na padagos na sabihon sa iba an manongod sa satong dakulang Dios. (Luc. 6:45) An satong pagkamoot ki Jehova nagtutulod sa sato na kuyogon an saiyang mga pagboot asin tabangan an iba na gibohon man iyan. (Tal. 27:11; 1 Juan 5:3) An maimbod na pagtagal niato sa gibohon na ini dai nakadepende sa reaksion kan mga tawo. Dawa kan pinersegir an mga Kristiano kan enot na siglo, padagos sindang naghulit na “dai nin ontok.” (Gibo 5:42) Kun habong maghinanyog an mga tawo, imbes na togotan ini na makadesganar sa sato, nagdadanay kitang marigon, na ipinapaheling an rarom kan satong pagkamoot asin debosyon ki Jehova.
3. Paano makakatabang sa sato an pagkamoot sa mga tawo na padagos na maghulit?
3 Nagmamaigot man kita huli ta namomotan niato an satong kapwa. (Luc. 10:27) Dai gusto ni Jehova na an siisay man malaglag. (2 Ped. 3:9) Dawa sa teritoryo na parate nang ginigibo, nakakanompong pa man giraray kita nin mga gustong maglingkod ki Jehova. Halimbawa, sa Guadeloupe, na duman 1 sa kada 56 katawo an Saksi ni Jehova, 214 an nabautismohan kan nakaaging taon. Haros 20,000 an nag-atender sa Memorial, mga 1 sa kada 22 katawo sa Guadeloupe!
4. Sa anong mga paagi nagbabago an mga teritoryo?
4 Mga Pagbabago sa Teritoryo: Padagos na nagkakaigwa nin laen-laen na tawo sa satong teritoryo. Sa masunod na dumalaw kita sa pamilya na bakong paborable an reaksion kaidto, tibaad an magbukas kan pinto asin maghinanyog ibang miembro kan pamilya—tibaad saro na nungka pang nakadangog kan satong mensahe. O tibaad makanompong kita nin bagong mga nakaistar na interesado. An mga aki na may nagkokontrang mga magurang nagdadakula asin naghahale sa harong. An mga iyan tibaad gustong magdangog sa mensahe kan Kahadean.
5. Ano an puedeng magpangyari na magin mas mapaghimate an mga tawo?
5 An mga tawo nagbabago man. Si apostol Pablo “paralanghad asin parapersegir patin tawong daing galang” kaidto. (1 Tim. 1:13) Siring man, an dakol na naglilingkod ki Jehova ngonyan dating dai interesado sa katotoohan. An nagkapira tibaad nagkontra pa ngani kaidto sa maogmang bareta. Mantang nagbabago an mga kamugtakan sa kinaban, an nagkapirang paratumang o mga indiperente tibaad mapahirong maghinanyog. An iba tibaad mas maghimate pagkatapos na makaeksperyensia nin personal na trahedya, arog baga nin pagkagadan nin sarong kapamilya, pagkawara nin trabaho, pinansial na problema, o problema sa salud.
6. Taano ta dapat na padagos kitang maghulit na may entusiasmo?
6 Matatapos na an sistemang ini nin mga bagay, alagad nagririkas an satong paghuhulit asin pagtotokdo. (Isa. 60:22) Kun siring, padagos kitang naghuhulit na may entusiasmo asin nagmamaigot na papagdanayon an positibong kaisipan. Tibaad maghinanyog an masunod na indibiduwal na makakaolay niato. Kaipuhan na padagos kitang makipag-olay! ‘Sa paggibo niato kaini ililigtas niato an sato man sana sagkod idtong mga naghihinanyog sa sato.’—1 Tim. 4:16.