An Teokratikong Paadalan sa Pagmiministro Nagtatao nin mga Pakinabang
1 Padagos na inootob kan Teokratikong Paadalan sa Pagmiministro an duwang mayor na katuyohan kaiyan: (1) paoswagon an satong kakayahan sa pagtaram kan katotoohan sa Biblia asin (2) gibohon kitang mas pamilyar sa Tataramon nin Dios, sa mga doktrina kaiyan, asin sa mga prinsipyo kaiyan. Dakol an nagpapasalamat sa progresibong pagtotokdo na inako ninda. An mga tugang na lalaki asin babae pararehong natabangan na ‘gamiton an tataramon kan katotoohan sa tamang paagi.’—2 Tim. 2:15.
PAG-OSWAG
2 An mga bagong magpalista magkakamit kan pinakadakulang pakinabang paagi sa maingat na pag-andam kan asignasyon sa sainda. Namasdan na may mga binabasa an saindang pag-aatubang. An pagigin mas matibay na magpatotoo nagkakaipo pareho nin marahay na pagbasa asin kan abilidad na ipahayag an nasa boot sa sadiring tataramon.
3 An librong Reasoning nagin marahayon na tabang sa satong gibohon, asin tinatabangan kita kan Teokratikong Paadalan sa Pagmiministro na orog na maaraman an mga laog kaiyan. An pagigin mas pamilyar sa librong ini makatatabang sato na ipahayag an mga ideya sa sadiri niatong tataramon asin makipag-olay sa natural na paagi.
MGA INSTRUKSION PARA SA 1989
4 Ngonyan na 1989, an Asignasyon Num. 1 basado pa man giraray sa “All Scripture Is Inspired of God and Beneficial.” Minsan ngani 15 minutos an itinao, may kadikit na pagliliwat. Puwedeng gamiton sa pahayag an magpoon 10 sagkod 12 minutos asin an 3 sagkod 5 minutos para sa berbal na repaso.
5 An mga tugang na nag-aatubang kan tampok na mga kabtang sa pagbasa kan Biblia maninigong tabangan an mga nagdadangog na masabotan kun taano asin kun paano mahalaga sa sato an impormasyon. An paggamit sa indese sa Kasuratan na yaon sa Watch Tower Publications Index puwedeng makatabang na gayo. Dugang pa, an espesyal na mga artikulo manongod sa mga libro kan Hebreong Kasuratan padagos na maluwas sa Torrengbantayan, asin ini magtatao nin impormasyon na makatatabang sa pagsabot asin nin iba pang praktikal na mga punto na magagamit.
NASUSURAT NA REPASO
6 Magpoon ngonyan na 1989, may pagliliwat sa mga nasusurat na repaso. An repaso gigibohon nin tolong beses sa laog kan taon—sa katapusan nin Abril, Agosto asin Disyembre. An Sosyedad dai na magibo nin inimprentang repaso, kundi an kada parahayag maninigong magdara nin sadiring papel asin lapis tanganing makapakikabtang. Arog kan dati, an preparadong mga hapot asin simbag itatao kan Sosyedad. Sa mga nasusurat na repaso, tatawan nin partikular na atension an materyales sa Asignasyon Num. 1 asin tampok na mga kabtang kan Biblia.
PAGBASA SA BIBLIA
7 Nakikinabang daw kita nin personal sa iinasignar na pagbasa sa Biblia? Sa pagbasa niato, hanapon niato an mga teksto na nagpapararom sa pag-apresyar, nagpapakosog sa mga kuwalidad na kaipuhan sa satong personal asin pampamilyang buhay, o nakatatabang sato na iaplikar an mga halimbawang isinasaysay. Naprobaran na daw niatong basahon an Biblia mantang dinadangog an tape sa Biblia kan Sosyedad? Dai niato paglingawan an tabang na itinatao kan mga tape na ini sa mga tugang na naasignaran na mag-andam kan Pahayag Num. 2. Paagi sa pagtao nin atension sa tamang pagpronunsiar, pagliwatliwat kan boses, asin pagdodoon, gigibohon kaining mas buhay asin makahulogan an saindang pagbasa.
8 Si Jehova nagtao nin abundang espirituwal na probisyon tanganing tabangan kita sa satong mahahalagang paghuhulit. Sa Salmo 19:14, ipinahayag ni David an saiyang mapagngayongayong kamawotan: “Logod an mga tataramon kan sakong ngoso asin an paghorophorop kan sakong puso magin nakaoogma sa saimo, O Jehova na sakong Gapo asin sakong Paratubos.” Kun, kapareho ni David, nagsusulwak sa satong puso an pagkamoot ki Jehova asin sa saiyang Aki, an Teokratikong Paadalan sa Pagmiministro makatatabang sato na gibohon na orog na nakaoogma ki Jehova an mga tataramon kan satong ngoso ngonyan na 1989. Magdesisyon kita ngonyan na lubos na makinabang sa mamomoton na probisyon na ini kan satong maboot na langitnon na Ama.