Mag-andam Para sa Nasusurat na Repaso
1 An inimprentang mga hapot kairiba kan An Satong Ministeryo sa Kahadean na ini para sa nasusurat na repaso sa katapusan kan Agosto. An pagkakaigwa niato kaini nin amay magtatao sa lambang saro nin oportunidad na magsiyasat kan espisipikong mga impormasyon tanganing magin andam na gayo.
2 Kun hinahanap an sinambit na mga impormasyon na duman basado an mga hapot, dai pagmarkahan o suratan an listahan nin mga hapot, huli ta gagamiton nindo an listahan na ini sa pagkua nin nasusurat na repaso. Girumdomon na an Biblia sana an puwedeng abrihan durante kan nasusurat na repaso. An saindong personal na mga nota o iba pang reperensia dai gagamiton sa panahon na iyan.
3 Durante kan nasusurat na repaso, kaipuhan nindo an laen na papel na susuratan kan saindong simbag sa mga hapot. Pagmaigotan na magin espisipiko asin halipot. Mantang nag-andam na kamo nin patienot, bako na ining masakit. Kun itinatao na an mga simbag kan paraataman sa paadalan, maaaraman nindo kun tama o sala an simbag nindo.
4 Kaipuhan na mag-andam nin marhay an lambang saro para sa Teokratikong Paadalan sa Pagmiministro sa lambang semana. Magtao nin orog na atension asin magmaigot na kuanon an pangenot na mga punto na iinaatubang sa plataporma. Sisiertohon kan paraataman sa paadalan na an gabos na puntong kokonsideraron sa masunod na nasusurat na repaso malinaw na ipinahayag.
5 An bagong areglong ini makatatabang sa gabos tanganing makinabang nin orog sa nasusurat na repaso. An kalabot na dugang na pagsiyasat makatatabang tanganing ipako sa satong isip an pangenot na mga punto, na magsasangkap sa sato nin orog para sa ministeryo sa langtad.