Panigoan an Saindong Espirituwal na Pangangaipo
1 An satong nagdadangadang na “Maigot na mga Parabalangibog kan Kahadean” na Pandistritong Kombension nagtatao sa sato nin marahayon na oportunidad na mapanigoan an satong espirituwal na pangangaipo. Siring sa masustansiang materyal na kakanon, an programa seguradong babasogon kita sa espirituwal paagi “sa mga tataramon kan pagtubod.” (1 Tim. 4:6) Pangyayarihon kita kaiyan na orog na dumayupot ki Jehova. Asin makakalaom kitang umako nin hatol asin pagparigon sa boot na makakatabang sa sato na tagalan an mga pagbalo sa satong buhay. Inaasegurar kita ni Jehova: “Papangyayarihon ko na ika magkaigwa nin pakarorop asin totokdoan taka sa dalan na maninigo mong lakawan. Magtatao ako nin sadol na nakaturuhok sa saimo.” (Sal. 32:8) Kanigoan an kaogmahan niato na magkaigwa kan saiyang mamomoton na paggiya sa satong buhay! Estudyare an nagkapirang praktikal na lakdang na magigibo niato tangani na makinabang na marhay sa programa kan kombension.
2 Kaipuhan Niatong Andamon an Satong Puso: An balang saro sa sato may paninimbagan na ingatan an saiya mismong piguratibong puso. (Tal. 4:23) Ini nagkakaipo na kita magkaigwa nin disiplina sa sadiri asin na kita magin sadiosan sa satong sadiri. An kombension panahon na horophoropon an manongod sa satong relasyon ki Jehova, panahon na ‘magturuhok sa sangkap na ley para sa katalingkasan.’ Tangani na andamon an satong puso na ‘akoon an pagtatanom kan tataramon,’ maninigo na makimaherak kita ki Jehova na siyasaton kita, itokdo sa sato an ano man na “nakararaot na dalan” na nangangaipong itanos, asin na giyahan kita sa “dalan nin daing talaan na panahon.”—Sant. 1:21, 25; Sal. 139:23, 24.
3 Maghinanyog Asin Maghorophorop: Kinomendaran ni Jesus si Maria huli sa pagtao nin maingat na atension sa saiyang mga tataramon, na nagsasabi: “Pinili ni Maria an marahay na kabtang, asin iyan dai hahaleon sa saiya.” (Luc. 10:39, 42) Kun igwa kita nin kaparehong disposisyon nin isip, dai niato totogotan an daing halagang mga bagay na makadisturbo sa sato. Seseguradohon niato na kita nakatukaw asin atento durante kan bilog na programa. Lilikayan niato an pakipag-estoryahan o paglakawlakaw na dai man kaipuhan patin mag-iingat na dai madisturbo an iba paagi sa mga cellular phone, pager, kamera, saka camcorder.
4 Kun kita naghihinanyog sa mga pahayag, marahay na kumua nin halipot na mga nota na makakatabang sa sato sa pag-analisar kun paano ipinaliliwanag an tema. Maninigo niatong ikonektar an satong nadadangog sa kun ano an aram na niato. Makakatabang ini sa sato na masabotan asin matandaan an materyales. Kun rinerepaso an satong mga nota, kaipuhan na gibohon niato iyan sa katuyohan na iaplikar an materyales. Marahay na ihapot kan lambang saro sa sato: ‘Paano kaini naaapektaran an sakong relasyon ki Jehova? Anong mga pagliliwat an kaipuhan kong gibohon sa sakong buhay? Paano ko ikaaaplikar an impormasyon na ini sa sakong relasyon sa iba? Paano ko magagamit iyan sa sakong ministeryo?’ Ipakipag-olay sa iba an mga punto na nangorognang nagustohan niato. An paggibo kan mga bagay na ini makakatabang sa sato sa pagrimpos kan mga sinasabi ni Jehova ‘sa tahaw kan satong puso.’—Tal. 4:20, 21.
5 Iaplikar Niato an Nanonodan Niato: Pakaatender sa sarong pandistritong kombension, an sarong delegado nagsabi: “An programa personal na marhay, na minomotibar an saro na siyasaton an kamugtakan kan puso nia asin kan sa saiyang pamilya, patin magtao nin mamomoton na tabang sono sa Kasuratan kun kaipuhan. Orog na ipinarealisar kaiyan sako an sakong obligasyon na tumao nin orog pang tabang sa kongregasyon.” Posibleng marhay na an dakol sa sato arog man kaiyan an namatean. Alagad bakong igo na kita magpuli na sana na naparigon asin narepreskohan. Si Jesus nagsabi: “Kun aram nindo an mga bagay na ini, maogma kamo kun gibohon nindo iyan.” (Juan 13:17) Dapat na mahigos niatong gibohon an mga punto na aplikado sa sato personalmente. (Fil. 4:9) Ini an pinakasolusyon tangani na lubos na mapanigoan an satong espirituwal na pangangaipo.
[Kahon sa pahina 5]
Horophoropon an Saindong Nadadangog:
■ Paano kaiyan naaapektaran an sakong relasyon ki Jehova?
■ Paano kaiyan naiimpluwensiahan an sakong relasyon sa iba?
■ Paano ko iyan ikaaaplikar sa sakong buhay asin sa sakong ministeryo?