‘Maghinanyog Asin Maglaog sa Isip nin Dagdag na Tokdo’
1 Ilinaladawan kan libro nin Talinhaga an kadonongan na nangangapodan: “Maghinanyog kamo, huli ta manongod sa pangenot na mga bagay na ako nagtataram, asin an pagbuka kan sakong mga ngabil manongod sa pagigin tanos. Igwa ako nin hatol asin praktikal na kadonongan. . . . Paghinanyog kamo sa sako; iyo, maogma an mga nag-ootob kan sakuya mismong mga dalan. Huli ta an nakakakua sa sako tunay na makakakua nin buhay, asin magkakamit nin marahay na boot hale ki Jehova.” (Tal. 8:6, 14, 32, 35) Marahay an pagkaladawan kan mga tataramon na iyan sa pagtotokdo na naghahalat sa sato sa “Mga Paratokdo kan Tataramon nin Dios” na Pandistritong Kombension.
2 Inanalisar an mga pangangaipo kan kasararoan nin magturugang sa bilog na kinaban, asin iinandam an programa kan kombension tangani na matawan nin atension an mga pangangaipong iyan. An itataong espirituwal na pagtotokdo asin praktikal na mga suhestion, kun iaaplikar, makakatabang sa sato na magin maogma, mapagdanay an marahay na relasyon ki Jehova, asin magdanay sa dalan pasiring sa buhay na daing katapusan. Tunay nanggad na may marahay kitang dahelan na ‘maghinanyog asin maglaog sa isip nin dagdag na tokdo.’—Tal. 1:5.
3 Bago an Programa: Tangani na lubos na makinabang sa ipinepresentar, kaipuhan na kita nakatukaw na asin nasa tamang kamugtakan nin isip pagpoon kan programa. Ini nagkakaipo nin marahay na personal na organisasyon. An importanteng marhay iyo an pagpoon nin amay. Magtorog nin amay sa banggi bago kaiyan. Magmata nin amay tangani na matawan nin panahon an gabos sa grupo nindo na mag-andam asin magpreparar nin makakakan. Umabot nin amay sa lugar nin kombension tangani na makakua kamo nin tukawan asin maasikaso an mga bagay na kaipuhan bago pumoon an programa.
4 Mantang an pangenot na katuyohan nin pagtiripon iyo na omawon si Jehova “sa tahaw kan nagkakasararong mga kadaklan,” an kada sesyon maninigong ponan sa paagi na nagbabantog kan kadakulaan kan satong Dios. (Sal. 26:12) Sa katuyohan na iyan, ineenkaminar an gabos na tumukaw na bago ianunsiar an pambukas na awit. Ini kaoyon kan konseho sa Kasuratan: “Pabayaan na an gabos na bagay mangyari sa disente asin aregladong paagi.” (1 Cor. 14:40) Ano daw an kahulogan kaiyan para sa lambang saro sa sato? Kun maheling nindo an tsirman na nakatukaw na sa plataporma durante kan introduksion na musika, tumukaw na kamo tolos-tolos. Pangyayarihon kaini na kamo makapakikabtang nin bilog na puso sa pag-awit na nagbubukas kan kada sesyon, na nagpapahayag nin pag-omaw ki Jehova.—Sal. 149:1.
5 Durante kan Programa: ‘Inandam ni Esdras an saiyang puso na konsultahon an ley ni Jehova asin gibohon iyan.’ (Esd. 7:10) Paano niato aandamon an satong puso na mag-ako nin pagtotokdo na itinatao ni Jehova? Mantang rinerepaso nindo an mga titulo kan manlaenlaen na kabtang na nakalista sa imprentadong programa, hapota an sadiri nindo, ‘Ano daw an sinasabi sa sako ni Jehova paagi sa programang ini? Paano ko magagamit an impormasyon tangani na makinabang ako mismo asin an sakong pamilya?’ (Isa. 30:21; Efe. 5:17) Padagos na ihapot iyan sa bilog na kombension. Gumibo nin nota kan mga punto na plano nindong gamiton. Magtao nin panahon na ipakipag-olay iyan sa katapusan kan mga sesyon sa kada aldaw. Tatabangan kamo kaini na matandaan asin ikaaplikar an impormasyon.
6 An pagkonsentrar nin nagkapirang oras sa laog nin sarong panahon puedeng magin angat. Ano daw an makakatabang sa sato na labanan an tendensia na maglagawlagaw an isip? Aprobetsaran an kakayahan kan mata. Sa dakulang kabtang, an tinuturuhokan niato kan satong mata iyo an nakakukua kan satong atension. (Mat. 6:22) Kun siring, labanan an tendensia na magsalingoy sa lambang ribok o paghiro. Ipokus an mga mata nindo sa nagpapahayag. Sundan sa kopya nindo kan Biblia kun may binabasang teksto, asin papagdanayon na nakabukas an Biblia nindo mantang tinotokar an teksto.
7 Pahihiroon kita kan Kristianong pagkamoot na likayan na madisturbo an iba mientras na may programa. (1 Cor. 13:5) Ini “panahon na dai maggirong” asin maghinanyog. (Ecl. 3:7) Kun siring, likayan an dai kaipuhan na pakikipag-olay asin pagparalibot. Inaan an pagparaduman sa kasilyas paagi sa pagplano nin patienot. Dai magkakan o mag-inom sagkod sa itinalaan na oras, apuera sana kun igwa nin seryosong problema sa salud. An mga may darang cellular phone, pager, camcorder, asin kamera maninigo na dai ini paggamiton sa paagi na nakadidisturbo sa iba. Maninigong iareglo nin mga magurang na an bilog nindang pamilya—kabale an mga tinedyer—tumukaw nin taraed tanganing mabantayan ninda nin tama an saindang mga aki.—Tal. 29:15.
8 Kan nakaaging taon an sarong magurang sa kongregasyon na dakol nang dekadang nag-aatender nin mga kombension nagkomento: “Naniniwala ako na marahayon an kombension na ini huli sa saro pang dahelan. Haros gabos na nag-aatender nagkukua nin mga nota, kabale an sadit na mga aki. Dakulang kaogmahan na maheling iyan. Nagagamit nin marahay an mga Biblia kun hinahagad kan mga nagpapahayag na buksan iyan sa nagkapirang teksto.” An siring kaatentong paghinanyog talagang kaomaw-omaw. Iyan bako sanang nagtatao nin mga pakinabang sa sato asin sa satong mga kapwa delegado sa kombension kundi orog sa gabos nagpapamuraway sa satong Kaharohalangkaweng Paratokdo, si Jehova Dios.—Isa. 30:20.