Maghinanyog Asin Makanuod
1. Taano ta kaipuhan an dugang na paghihinguwa para makapaghinanyog asin makanuod sa pandistritong kumbensiyon?
1 Harani na an 2013 na pandistritong kumbensiyon. Dakul an ginibo para iandam an programa na matukar sa mga pangangaipo ngunyan kan mga tugang sa bilog na kinaban. Naggibo ka na daw nin mga preparasyon tangani na makaatender sa bilog na tulong aldaw kan kumbensiyon? Sa darakulang kumbensiyon dakul an disturbo, kaya kaipuhan an dugang na paghihinguwa para atentibong makapaghinanyog sa programa. Huling mas halawig an mga sesyon kisa sa mga pagtiripon sa kongregasyon, kaipuhan ta man an mas halawig na pagkonsentrar. Saro pa, nakakapagal an pagbiyahe asin an iba pang bagay. Ano an makakatabang sa sato na atentibong makapaghinanyog asin makanuod?—Deut. 31:12.
2. Paano niyato aandamon an satong puso para sa programa kan kumbensiyon?
2 Bago Magpuon an Kumbensiyon: Nasa opisyal tang Web site na www.jw.org an programa kan kumbensiyon. Mahihiling diyan an mga titulo kan gabos na pahayag asin an saro o duwang panginot na teksto kaiyan. Kun may access kamo sa Internet, an patiinot na pagbasa sa impormasyon na ini makakatabang na andamon an saindong puso para sa programa. (Esd. 7:10) Sa saindong Pampamilyang Pagsamba, puwede daw nindong pag-ulayan an programa kan kumbensiyon tanganing maantisipar na nindo iyan?
3. Ano an makakatabang sa sato na atentibong makapaghinanyog?
3 Durante kan Programa: Kun posible, mag-CR na nguna bago magpuon an sesyon. I-off an saindong cellphone para dai kamo madisturbo kan mga apod o text o matentaran na mag-text durante kan programa. Kun kaipuhan talaga na naka-on an saindong cellphone, i-adjust iyan sa setting na dai makakadisturbo sa iba kun enkaso may mag-apod. Kun magamit kamo nin tablet durante kan programa, siguraduhon na dai iyan makakadisturbo sa iba. Likayan an pagkakan o pag-inom durante kan programa. (Par. 3:1) Papagdanayon na nakaturuhok an saindong mga mata sa ispiker. Kun may binabasang teksto, sundan iyan sa saindong Bibliya. Kumua nin haralipot na nota.
4. Paano matatabangan kan mga magurang an saindang mga aki na maghinanyog asin makanuod?
4 Gusto man niyato na maghinanyog asin makanuod an satong mga aki. An Talinhaga 29:15 (NW) nagsasabi: “An aki na pinapabayaan sana magdadara nin kasusupgan sa saiyang ina.” Kaya, marahay kun taraid na magtukaw an pamilya tanganing masigurado kan mga magurang na atentibong naghihinanyog sa programa an saindang mga aki imbes na makipag-istoryahan, magpara-text, o magparalakaw-lakaw. Dawa ngani akion pa sinda para masabutan an gabos na tinutukar sa programa, puwede na sindang sanayon na tuninong na magtukaw asin dai magturog.
5. Taano ta marahay na repasuhon an mga tinukar sa programa, asin paano ta ini magigibo?
5 Pagkatapos kan Programa Kada Aldaw: Dai magpamatanga. Magturog nin amay para makapahingalo. Kun rerepasuhon mo an saimong mga nadangog, mas magigirumduman mo iyan. Kaya bilang pamilya, mas marahay kun matagama kamo nin pirang minuto para pag-ulayan kada banggi an mga tinukar sa programa. Kun maparestawran ka kaiba kan mga katuod mo, taano ta dai darahon an saimong nota asin ihiras an saro o duwang punto na nagustuhan mong marhay sa programa? Pagkatapos kan kumbensiyon, puwede nindong pag-ulayan sa Pampamilyang Pagsamba kun paano iaaplikar bilang pamilya an mga impormasyon na nadangog nindo. Puwede man kamong magtagama nin panahon kada semana tanganing repasuhon an sarong kabtang kan ano man na bagong luwas na publikasyon.
6. Igo na daw an pag-atender sana sa kumbensiyon? Ipaliwanag.
6 Makikinabang sana kita sa sarong handaan kun makakan kita. Arog man kaiyan sa espirituwal na bangkete sa pandistritong kumbensiyon. Lugod na lubos kitang makinabang paagi sa pag-atender sa gabos na sesyon, atentibong paghinanyog, asin pag-aplikar kan satong nanudan.
[Box sa pahina 3]
Mga Pagirumdom sa 2013 na Pandistritong Kumbensiyon
◼ Oras kan Programa: An programa mapuon nin alas 8:20 nin aga sa bilog na tulong aldaw. Sa oras na iyan, an gabos maninigo nang tumukaw tanganing an programa makapuon sa aregladong paagi. Matatapos an programa paagi sa sarong kanta asin pamibi sa oras na alas 3:50 nin hapon sa Biyernes asin Sabado saka alas 2:35 nin hapon sa Domingo.
◼ Pagreserba nin Tukawan: An mga tukawan puwede sanang ireserba para sa mga kaibanan nindo sa harong, sa lunadan, o tinutukduan nindo ngunyan sa Bibliya.—1 Cor. 13:5.
◼ Pangudtuhan: Magbalon tabi nin dikit sanang pangudtuhan imbes na magkakan sa luwas o magbakal kaiyan durante kan pahingalo sa udto. Puwedeng gumamit nin sadit na cooler na ikakabugtak sa irarom nin tukawan. Dai itinutugot an darakulang picnic cooler asin mga lalagan na mapapasaon.
◼ Donasyon: Ikakapahiling niyato an satong pag-apresyar sa mga areglo kan kumbensiyon paagi sa boluntaryong pagdonar sa lugar nin kumbensiyon para sa pambilog na kinaban na gibuhon. An ano man na tsekeng idodonar maninigong gibuhon na payable to “Watch Tower.”
◼ Aksidente Asin Emerhensiya: Kun may mangyaring medikal na emerhensiya sa lugar kan kumbensiyon, ipaaram tabi sa pinakaharaning attendant, na iyo an mapaisi tulos-tulos sa First Aid tanganing matantsar kan satong kuwalipikadong mga boluntaryo diyan kun gurano kaseryoso an sitwasyon. Kun kaipuhan, maapod sinda sa pinakaharaning ospital.
◼ Bulong: Kun may tinutumar kamong bulong na reseta nin doktor, siyertuhon tabi na magdara nin supisyente, huling mayo kaiyan sa kumbensiyon.
◼ Please Follow Up (S-43) Form: Maninigong gamiton ini para sa mga nagpahiling nin interes sa impormal na pagpapatotoo niyato durante kan kumbensiyon. An filled-out form puwedeng itao sa Book Room o sa sekretaryo kan kongregasyon nindo.
◼ Restawran: Tawan nin onra an ngaran ni Jehova paagi sa marahay na paggawi nindo kun nasa restawran. Magbado sa paagi na angay sa sarong Kristiyanong ministro. Magtao nin tip kun pinagkatudan ini sa saindong lugar.
◼ Volunteer Service: An siisay man na gustong magboluntaryo maninigong magduman sa Volunteer Service Department. An mga aki na mayo pang 16 anyos puwede man na magboluntaryo basta kaiba kan saindang magurang, nag-aataman, o ibang adulto na aprubado ninda.