Andam Na daw Kamo sa Espirituwal na Bangkete?
1. Anong klaseng pag-andam an kalabot sa sarong bangkete?
1 An sarong bangkete nangangaipo nin dakol na pag-andam. Kaipuhan na magkaigwa nin mga kakanon, andamon iyan nin masiram, dangan iserbi iyan. An pagserbi kan kakanon kaipuhan na magin organisado. Dugang pa, dapat na andamon an lugar kun saen iyan kakakanon. An mga bisita dapat na mag-andam man, nangorogna kun sinda mabiahe nin harayo tanganing makaduman. Minsan ngani dakol na trabaho an kalabot, bawi man an gabos na iyan huli sa masiram asin masustansiang pagkakan kaiba nin mga katood asin kapamilya. Dai na mahahaloy, an Mga Saksi ni Jehova sa Pilipinas matiripon bilang darakula asin saradit na grupo tanganing ikaogma an inaantisipar na marhay na espirituwal na bangkete—an “Magdanay Kamong Mapagbantay!” na Pandistritong Kombension. Dakol na an ginibo bilang pag-andam sa programa asin sa kinakaipuhan na mga bagay. Kita gabos iniimbitaran. Tanganing makaatender asin makinabang nin lubos, kita dapat man na personal na mag-andam.—Tal. 21:5.
2. Ano an kaipuhan tanganing magin presente sa bilog na espirituwal na bangkete niato?
2 Makinabang nin Lubos: Kompleto na daw an saindong mga plano tanganing kamo magin presente sa bilog na espirituwal na bangketeng ini? Kun kaipuhan, makipag-olay sa saindong among tanganing ipaaram sa saiya na maatender kamo sa gabos na sesyon kan saindong kombension, kaiba an enot na aldaw. Kompleto na daw an saindong mga areglo para sa transportasyon asin dadagosan? Maninigong siertohon kan kamagurangan na may maasikaso sa mga gurang na asin maluya an hawak saka sa iba pa na tibaad nangangaipo nin tabang.—Jer. 23:4; Gal. 6:10.
3. Taano ta dinadagka kitang mag-atender sa pandistritong kombension na dian iinasignar an satong kongregasyon?
3 Girumdomon na may espesipikong mga kongregasyon na iinasignar sa lambang pandistritong kombension. Sa paggibo kan mga areglong ini, maingat na kinalkulo kan sangang opisina kun pira an iimbitaran, na kinokonsiderar an bilang nin mga tukawan sa mga lugar nin kombension. Tibaad magkaigwa nin pagsurusoan kun an mga parahayag maatender sa kombension na dian dai iinasignar an saindang kongregasyon.
4. Anong mga pagirumdom an matabang sa sato na magin andam para sa pagpopoon kan programa kada aldaw?
4 Mag-andam na umabot nin amay sa kombension kada aldaw tanganing makakua nin tukawan bago magpoon an programa. Helingon an imprentadong programa pirang minuto bago magpoon an sesyon. Matabang ini sa saindo na andamon an saindong puso para sa impormasyon na ipepresentar. (Esd. 7:10) Kun sabihon kan tsirman kan sesyon na mapoon na an musika, ikaogma an pagdangog nindo kaiyan dangan magin andam na makikabtang sa pambukas na awit asin pamibi.
5. Paano puedeng makinabang nin lubos an satong pamilya sa programa?
5 Kun an mga miembro kan pamilya matukaw na magkataraed durante kan kombension, masesegurado kan mga magurang na an saindang mga aki maingat na mahinanyog sa programa. (Deut. 31:12) Dinadagka an gabos na sumubaybay sa saindang Biblia kun binabasa an mga teksto. An pagkua nin halipot na nota puedeng makatabang sa saindo na maghinanyog nin maingat. Paghaloyhaloy, an saindong mga nota matabang sa saindo na magirumdoman an pangenot na mga punto kan mga pahayag. Labanan an tendensia na makipag-olay na dai man kaipuhan durante kan sesyon o maghale sa saindong tukawan. Kun igwa kamo nin cell phone, dai pagtogotan na makadisturbo iyan sa saindo o sa iba durante kan programa. Pagkatapos kan mga sesyon kan kada aldaw, taano ta dai nindo ipakipag-olay sa iba an napahalagahan nindo sa programa?
6. Ano an sarong marahayon na aspekto kan satong mga kombension, asin paano niato iyan puedeng ikaogma nin lubos?
6 Sa pandistritong kombension, igwa kita nin oportunidad na ikaogma an daing kaagid na dayupot na relasyon sa satong mga tugang na dai naeeksperyensiahan sa kinaban. (Sal. 133:1-3; Mar. 10:29, 30) Taano ta dai siertohon na magpamidbid sa mga nakatukaw harani sa saindo asin makipag-olay sa sainda durante kan pahingalo sa udto? Saro ini sa mga bentaha nin pagbalon nin dikit sanang pangudtohan asin pagdanay sa lugar nin kombension imbes na magluwas pasiring sa sarong restawran. Siertohon na dai mapalampas an siring na oportunidad na magparinigonan nin boot.—Roma 1:11, 12.
7. Anong mga pag-andam an maninigo niatong gibohon dapit sa gubing na isusulot niato?
7 Paggubing: Mahalagang mangnohon na pinagbotan ni Jehova an mga Israelita na gumibo nin mga kabingkabing sa gayad kan saindang mga gubing, na may asul na bogkos sa itaas kan mga kabingkabing. (Bil. 15:37-41) Ini naheheling na pagirumdom na sinda sarong banwaan na itinagama sa pagsamba ki Jehova. Ngonyan, an satong may dignidad asin mabining gubing kun nasa kombension ilinalaen kita sa kinaban. Nagseserbi iyan na mapuersang patotoo sa mga nagmamasid dawa kun kita tibaad minaluwas tanganing magkakan pagkatapos kan programa. Kun siring, maingat na pag-isipan an gubing na isusulot nindo.
8. Paano kita puedeng magpatotoo sa iba mantang nasa palibot kan lugar kan kombension?
8 Magpatotoo: Paagi sa kadikit na pagplano, puede kitang makapagpatotoo sa mga tawo mantang nasa palibot kan lugar kan kombension. An sarong tugang na lalaki na nagpasiring sa sarong restawran kaiba an saiyang agom pagkatapos kan programa itinokdo sana an saiyang badge sa kombension asin hinapot an waiter: “Nakaheling ka nin dakol na tawo na may badge na arog kaini?” Nagresulta ini sa pag-orolay, asin inimbitaran kan tugang an waiter na mag-atender sa kombension.
9. Paano niato ikakapaheling an pag-apresyar niato sa satong Kag-imbitar, si Jehova?
9 Minsan ngani an satong mga tugang an mapresentar kan gabos na pahayag, interbio, asin demonstrasyon, an satong langitnon na Ama, si Jehova, an mamomoton na Paratao kan taonan na espirituwal na bangketeng ini. (Isa. 65:13, 14) Ipinapaheling niato an satong pag-apresyar sa satong Kag-imbitar paagi sa pagigin presente sa lambang aldaw asin pagkakan kan lambang kabtang kan espirituwal na kakanon na isineserbi. Kompleto na daw an saindong mga pag-andam na gibohon iyan?
[Kahon sa pahina 5]
Mga Pagirumdom sa Pandistritong Kombension
◼ Mga Oras kan Programa: An programa mapoon alas 8:20 nin aga sa Biernes asin Sabado saka alas 8:50 nin aga sa Domingo. Kun ipaisi na mapoon na an pambukas na musika, kita gabos maninigo nang tumukaw tanganing makapoon an programa sa may dignidad na paagi. An programa matatapos alas 3:55 nin hapon sa Biernes asin Sabado saka alas 4:00 nin hapon sa Domingo.
◼ Pagparada: Sa gabos na lugar kan kombension an enot na maarabot iyo an may prioridad na makaparada. Huling sa parate limitado an paradahan, maninigong mag-iribanan sa sarong lunadan sagkod sa mapupuede.
◼ Pagreserba nin Tukawan: Puedeng magreserba nin mga tukawan para sana sa mga kaiba nindo sa lunadan o kaibanan nindo sa harong.
◼ Pangudtohan: Magbalon tabi nin pangudtohan imbes na humale sa lugar kan kombension durante kan pahingalo sa udto tanganing bumakal nin kakanon. Puedeng gumamit nin sadit na cooler na puedeng ibugtak sa irarom nin tukawan. Dai itinotogot sa pasilidad kan kombension an darakulang picnic cooler asin mga lalagan na napapasa.
◼ Mga Donasyon: Ikakapaheling niato an satong pag-apresyar sa mga areglo kan kombension paagi sa boluntaryong pagdonar sa satong Kingdom Hall o sa kombension para sa pambilog na kinaban na gibohon. An ano man na tsekeng idodonar sa kombension maninigong gibohon na payable to “Watch Tower.”
◼ Mga Aksidente Asin Emerhensia: Kun may mangyaring medikal na emerhensia sa lugar kan kombension, kontakon tabi an kaharaning attendant, na iyo an tolos-tolos na mapaisi sa First Aid tanganing matantsar kan satong kualipikadong mga tugang sa First Aid an pagigin seryoso kan situwasyon asin makatao nin tabang. Kun kinakaipuhan, an satong mga tugang sa First Aid maapod sa pinakaharaning ospital.
◼ May Diperensia sa Pagdangog: Sa nagkapirang kombension, an programa ibobrodkast sa FM radiofrequency. Tanganing magamit an probisyon na ini, kaipuhan na magdara kamo nin sadit asin de bateryang FM receiver na may earphone.
◼ Rekording: An mga recorder dai maninigong ikonektar sa elektrisidad o sound system kan pasilidad asin puede sanang gamiton sa paagi na dai makakadisturbo sa iba.
◼ Pagretrato: Kun maretrato kamo durante kan mga sesyon, dai tabi maggamit nin flash o lipodan an iba na naghihinanyog sa programa.
◼ Mga Pager Asin Cell Phone: Maninigong iprograma an mga ini sa paagi na dai makakadisturbo durante kan mga sesyon sa kombension.
◼ Mga Pormang Follow-Up: Maninigong gamiton an pormang Please Follow Up (S-43) tanganing itao an impormasyon mapadapit sa siisay man na nagpaheling nin interes bilang resulta nin impormal na pagpapatotoo niato durante kan kombension. Maninigong magdara an mga parahayag nin saro o duwang pormang follow-up sa kombension. An mga pormang sinuratan nin hinahagad na impormasyon puedeng itao sa Book Room tanganing maasikaso o sa saindong sekretaryo kan kongregasyon pagbalik nindo dian.—Helingon An Satong Ministeryo sa Kahadean na Pebrero 2005, p. 6.
◼ Mga Restawran: Tawan nin onra an ngaran ni Jehova paagi sa saindong marahay na paggawe sa mga restawran. Sa nagkapirang lugar, pinagkatodan na an pagtao nin 10 porsientong tip, depende sa serbisyo.
◼ Mga Badge Card: Gamiton tabi an saindong badge card mantang nasa kombension asin kun nagbibiahe pasiring asin hale sa lugar kan kombension. An mga badge card makukua sana sa saindong kongregasyon. Dai na maghalat nin ultimo ora tanganing kumua nin badge card para sa saimo asin sa saimong pamilya.
◼ Bautismo: An mga kandidato sa bautismo maninigong tumukaw na sa designadong mga tukawan bago magpoon an programa sa Sabadong aga kan kombension. An lambang saro maninigong magdara nin mabining gubing na pambasa asin tuwalya. Tanganing masierto na an gubing kan mga binabautismohan angay para sa okasyon, maninigong tokaron ini sa sainda kan kamagurangan na marepaso sa sainda kan mga hapot sa librong Organisado.
◼ Paggawe na Nagpapamuraway sa Dios: Kun ipinapaheling niato an bunga kan espiritu, na nagtatao nin partikular na atension sa satong pagtaram asin paghiro kun tinatratar an mga nakakamidbid niato sa mga restawran, hotel, o mantang nagbibiahe, dinudugangan niato an marahay na reputasyon kan banwaan ni Jehova asin linilikayan na makapasingkog sa iba. (1 Cor. 10:31; 2 Cor. 6:3, 4) Logod na an saindong pag-atender asin paggawe magpamuraway sa Dios sa siring na mga paagi ngonyan na 2009 Pandistritong Kombension!—1 Ped. 2:12.