Sunodon an Cristo Paagi sa Pagpaheling nin Dignidad
1. Paano an pinakatema kan kombension sa taon na ini konektado sa pagpaheling nin dignidad?
1 Ilinaladawan kan Biblia an Unibersal na Soberano, si Jehova, na nagugubingan nin dignidad. (Sal. 104:1) Si Jesus pirmeng nagtaram asin naggawe sa paagi na nagtaong onra sa saiyang Ama asin sa mga areglo kan saiyang Ama. (Juan 17:4) An kada saro sa sato magkakaigwa nin mga oportunidad na arogon si Jesus asin magtao nin kamurawayan ki Jehova durante kan satong nagdadangadang na “Sunodon an Cristo!” na mga Pandistritong Kombension.
2. Paano an pag-andam niato na magin presente sa kada sesyon nagtataong onra ki Jehova?
2 May Dignidad na Pagsamba: Matatawan niato nin onra si Jehova paagi sa pag-areglar na magin presente para sa espirituwal na bangkete na inaandam nia para sa sato. Kinaolay na daw nindo an saindong among asin inareglar an saindong mga aktibidad tanganing makaatender sa kada aldaw kan kombension, pati na sa Biernes? Nagplano na daw kamong umabot na may supisyenteng panahon tanganing makahanap nin matutukawan asin makikabtang sa pambukas na awit saka pamibi? Nagplano na daw kamo kan saindong pangudtohan tanganing makakakan kamo sa lugar kan kombension kaiba kan saindong mga tugang? Sa pagpoon kan kada sesyon, kun magalang na kitang imbitaran kan tsirman na tumukaw, maninigong taposon na tolos niato an satong orolay asin tumukaw na para sa pagpoon kan programa.
3. Paano an maingat na paghinanyog sa programa nagtatao nin dignidad sa satong pagsamba?
3 An maingat na paghinanyog sa programa nagtatao man nin onra sa satong langitnon na Ama. Pakatapos na maobserbaran an sarong lokal na pandistritong kombension, nagsurat an sarong reporter na an mga nagmamasid mapapahanga huli sa “arogan na gawe-gawe kan mga presente, mantang sinusubaybayan ninda an sinasabi sa magalang asin silensiong paagi patin may risang-risang pagpahalaga sa espirituwal na mga bagay.” Nagkomento man sia manongod sa “pambihirang bilang nin mga aki . . . , na an gabos toltol sa makangangalas na paagi o sibot pa ngani sa pagheling nin mga teksto sa Banal na Biblia.” Mantang may sesyon, bako iyan an panahon para sa dai kaipuhan na orolay, pagpadara nin mga text message, pagkakan, o paglakawlakaw sa mga pasilyo. Maninigong tumukaw an mga hoben kaiba kan saindang mga magurang tanganing matabangan sinda kan mga magurang na makinabang sa programa. (Deut. 31:12; Tal. 29:15) An siring na mga paghihingoa nagtatao nin paggalang sa iba asin pag-apresyar sa mahalagang marhay na espirituwal na kakanon na ipinepresentar.
4. Taano ta maninigong may dignidad an satong itsura mantang nasa kombension?
4 May Dignidad na Itsura: Dakol an nagpasalamat sa mga pagirumdom sa pahayag sa pandistritong kombension kan nakaaging taon na “Magpaheling nin Kristianong Dignidad sa Gabos na Panahon,” na nagdoon na an mga lingkod nin Dios maninigong magmaigot na magpaheling nin Kristianong dignidad sa saindang paggubing asin pagpakarhay sa sadiri. Sa taon na ini maninigo giraray niatong tawan nin seryosong atension an bagay na ini. An satong itsura nagpapabanaag kan satong mga saboot para ki Jehova asin para sa pribilehio nin pagigin saiyang mga Saksi. Maninigo na pirme kitang maggubing bilang mga ‘naghihingakong may dakulang paggalang sa Dios.’—1 Tim. 2:9, 10.
5. Paano niato mapapagdanay an may dignidad na itsura sa panahon nin paglilibang sa palibot kan lugar kan kombension?
5 Maninigo daw na magpaheling kita nin may dignidad na itsura kun nag-aatender sana sa programa? Girumdomon na dakol an mag-oobserbar sa satong mga badge sa kombension mantang nasa palibot kan lugar kan kombension. An satong itsura maninigong magparisa na kita napapalaen sa publiko sa pangkagabsan. Kun siring, dawa durante kan panahon nin paglilibang, arog baga kun minaluwas tanganing magkakan pakatapos kan programa, maninigo kitang maggubing na angay sa mga ministro na yaon sa lugar na iyan tanganing mag-atender sa Kristianong kombension asin maninigo na dai kita magsulot nin mga gubing na arog baga nin maong na pantalon, shorts, o T-shirt. Ini dakulaon nanggad na patotoo sa komunidad! Naoogma si Jehova kun an satong itsura nagpapabanaag kan satong pagigin mga ministro.
6. Ano an positibong mga resulta kan pagpaheling nin Kristianong dignidad?
6 Nakakakontentong mga Resulta: An pagpaheling nin Kristianong dignidad sa satong mga kombension nagreresulta sa mga oportunidad na makapagpatotoo sa impormal na paagi asin nagwawalat nin paborableng impresyon sa mga nagmamasid. Sa katapusan nin sarong kombension, nagkomento an sarong opisyal: “Dai pa kami noarin man nakaheling nin siring katoltol na mga tawo. An gawe nindo iyo an inaasahan nin Dios sa samo.” An pagigin may dignidad nagpapaheling nin paggalang asin pagkamoot sa lambang saro saka nagpapamuraway ki Jehova. (1 Ped. 2:12) Ipinapaheling kaiyan an satong diosnon na pagkatakot asin an satong pag-apresyar sa pribilehio nin pagigin natokdoan kan satong Ama. (Heb. 12:28) Logod na magmaigot kitang magpaheling nin dignidad mantang inaantisipar niato an “Sunodon an Cristo!” na Pandistritong Kombension sa taon na ini.
[Kahon sa pahina 5]
Mga Pagirumdom sa Pandistritong Kombension
◼ Mga Oras kan Programa: An programa mapoon alas 8:20 nin aga sa gabos na tolong aldaw. Kun magpoon na an pambukas na musikang pang-Kahadean, kita gabos maninigo nang tumukaw tanganing makapoon an programa sa paagi na may dignidad. An programa matatapos alas 4:05 nin hapon sa Biernes asin Sabado saka alas 4:10 nin hapon sa Domingo.
◼ Pagparada: Mantang sa parate limitado an paradahan, maninigong mag-areglo nin kagrupo na makakaiba sa lunadan sagkod sa mapupuede.
◼ Pagreserba nin Tukawan: Puedeng magreserba nin mga tukawan para sana sa mga kaiba nindo sa lunadan o kaibanan nindo sa harong.
◼ Pangudtohan: Magbalon tabi nin pangudtohan imbes na humale sa lugar kan kombension durante kan pahingalo sa udto tanganing bumakal nin pagkakan. Puedeng gumamit nin sadit na cooler na puedeng ibugtak sa irarom kan saindong tukawan. Dai itinotogot sa pasilidad kan kombension an darakulang picnic cooler, mga lalagan na napapasa, asin mga inomon na de alkohol.
◼ Mga Donasyon: Darudakulang gastos an kalabot sa pag-areglar nin pandistritong kombension. Ikakapaheling niato an satong pag-apresyar paagi sa boluntaryong pagdonar sa satong Kingdom Hall o sa kombension para sa pambilog na kinaban na gibohon. An ano man na tsekeng idodonar sa kombension maninigong gibohon na payable to “Watch Tower.”
◼ Rekording: An ano man na klaseng recorder dai maninigong ikonektar sa elektrisidad o sound system kan pasilidad asin puede sanang gamiton sa paagi na dai makakaistorbo sa iba.
◼ Mga Pormang Follow-Up: Maninigong gamiton an pormang Please Follow Up (S-43) tanganing itao an impormasyon mapadapit sa siisay man na nagpapaheling nin interes bilang resulta nin impormal na pagpapatotoo niato durante kan kombension. Maninigong magdara an mga parahayag nin saro o duwang pormang follow-up sa kombension. An mga pormang sinuratan nin hinahagad na impormasyon puedeng itao sa Book Room tanganing maasikaso o sa saindong sekretaryo kan kongregasyon pagbalik nindo dian.—Helingon an Pebrero 2005 na An Satong Ministeryo sa Kahadean, p. 6.