Pamurawayon si Jehova sa Dakulang Kongregasyon
1, 2. Anong oportunidad an itinatao sa sato kan pandistritong kombension, asin ano an sarong paagi na magigibo niato ini?
1 An satong mga pandistritong kombension kada taon nagtatao sa sato nin marahayon na oportunidad na pamurawayon si Jehova. An saboot niato arog kan ki David, na nag-awit: “Papamurawayon taka sa dakulang kongregasyon; sa tahaw kan dakulang banwaan oomawon taka.” (Sal. 35:18) Sa maabot na “Diosnon na Pagkuyog” na Pandistritong Kombension, paano kita makakasierto na bilang sararong banwaan, kita nagtataong kaomawan ki Jehova?
2 An sarong paagi na magigibo niato ini iyo an satong paggawe. An administrasyon nin sarong pasilidad kan kombension nagsabi: “Basado sa saindong mga kombension, sinabihan mi an ibang relihiosong mga grupo na gustong mag-arkila kan pasilidad na dumigdi asin helingon kun paano iinaareglo kan mga Saksi ni Jehova an sarong kombension, huling an mga ini igwa nin sangkap na areglo.” Paagi sa satong itsura, sa satong kooperasyon, asin sa satong paggawe, an lambang saro sa sato nakakakontribwir sa siring na entusiastikong mga kapahayagan nin pag-omaw, na tama sanang para sa satong Dios.—1 Ped. 2:12.
3, 4. Paano makakatabang sa sato an kabinian na maggubing sa paagi na angay para sa Kristianong mga ministro, sa kombension sagkod pagkatapos kan mga sesyon?
3 Personal na Itsura: Nagkakaipo nin kabinian tangani na kita maggubing asin mag-alinyar sa paagi na nagtataong kaomawan ki Jehova. (1 Tim. 2:9) An librong Paadalan sa Pagmiministro, pahina 132, nagsasabi: “An tawong mabini interesado na dai makapaanggot sa iba na dai man kuta kaipuhan asin dai makaapod nin sobrang atension sa sadiri.” Sa dakol na nasyon, ordinaryo na sana an bakong mabining gubing. Minsan siring, inaapresyar ni Jehova an paghihingoa niato na irepresentar sia sa tamang paagi. (Gibo 15:14) Minsan ngani tibaad gibohon an kombension sa sarong pasilidad para sa mga isport o pag-aling-aling, an pagtiripon na iyan nagigin “dakulang kongregasyon” niato durante kan tolong aldaw kan kombension. Huli kaini, mantang kita nagtitiripon sa atubangan ni Jehova, maninigo kitang maggubing na may dignidad na angay para sa pinakahalangkaw na Personahe sa uniberso.—1 Cron. 29:11.
4 Kaipuhan man niatong tawan nin atension an satong itsura pakatapos kan pantapos na sesyon kada aldaw. Minsan ngani gusto niatong magsulot nin mas komportableng gubing durante nin oras nin pagrelaks o kun nagkakakan sa sarong restawran, importante na an satong gubing asin pag-alinyar angay pa man giraray para sa mga ‘naghihingakong may reberensia sa Dios.’ (1 Tim. 2:10) An akseptableng gubing dai dinedeterminaran paagi sa kun ano an popular sa kinaban. (1 Juan 2:16, 17) An satong Kristianong mga publikasyon nagtatao nin nakakatabang na mga ilustrasyon nin mabini, aregladong marhay na gubing nin mga lalaki asin babae sa manlaenlaen na kamugtakan. An pagsulot kan satong badge card mantang nasa lugar kan kombension magseserbing sarong pagirumdom na kita Kristianong mga ministro sa gabos na panahon.—2 Cor. 6:3, 4.
5. Anong marahay na halimbawa an itinao kan banwaan kan kaaldawan ni Esdras?
5 Igalang an Lamesa ni Jehova: Kan kaaldawan ni Esdras kan nag-aandam siang magbasa sa Kasuratan, ‘nagtirindog an banwaan’ bilang paggalang asin pag-antisipar sa instruksion na aakoon ninda. Mantang padagos na nagbabasa si Esdras, “an bilog na banwaan atentibo sa pagdangog.” (Neh. 8:3, 5, 6) Rinerekonoser ninda na si Jehova an nakikipag-olay sa sainda, asin ini an nagpahiro sainda na maghimate nin atentibo na may paggalang. Kita daw maghihimate man durante kan satong mga kombension?
6, 7. Paano kita makakapaheling nin paggalang sa espirituwal na lamesa ni Jehova?
6 An Soberanong Kagurangnan kan uniberso nagpuesto sa atubangan niato nin sarong bangkete. (Isa. 25:6; 1 Cor. 10:21) Kun pinapahalagahan niato nin labi-labi an pagkakan niato sa espirituwal na lamesa ni Jehova, an pasohan niato iyo na umatender sa bilog na tolong aldaw kan kombension. Nakapag-areglo na daw kamo para sa mga dadagosan, transportasyon, asin bakasyon sa sekular na trabaho? Nagtagama na daw kamo nin supisyenteng panahon para sa pag-andam asin pagbiahe tanganing makaabot kamo nin mas amay sa lugar kan kombension sa paghanap nin mga tukawan, pakikiasosyar sa saindong mga tugang, asin pakiayon sainda sa pagtaong kaomawan ki Jehova sa pambukas na awit asin pamibi?—Sal. 147:1.
7 An paggalang sa lamesa ni Jehova an mapahiro sa sato na mag-atentong marhay sa programa asin likayan an dai kinakaipuhan na pakikipag-olay sa iba, pagkakan, o paglakawlakaw sa mga pasilyo mantang may programa. Paagi sa maimbod asin mapagmansay na grupong oripon, itinatao ni Jehova an espirituwal na kakanon na kaipuhan niato ngonyan mismo. (Mat. 24:45) Maninigo na mayo ni saro sa sato na malipasan an ano man na kabtang kaiyan. An mga magurang maninigong tumukaw kataed kan saindang mga aki asin tabangan an mga ini na makinabang nin lubos.—Deut. 31:12.
8. Ano an hinahagad na gibohon niato para sa pangudtohan, asin taano?
8 Hinahagad na magdara kita nin pangudtohan imbes na humale sa lugar kan kombension durante kan pahingalo sa udto tanganing bumakal nin pagkakan. Kaomaw-omaw na an kadaklan na delegado maingat na sinunod an instruksion na ini sa kombension kan nakaaging taon. Kanigoan karahay kun gigibohon iyan kan gabos ngonyan na taon! (Heb. 13:17) An areglong ini nagtatao nin marahayon na oportunidad na makamtan an nakakaparigon na pakikiiba sa satong mga tugang asin nakakakontribwir sa pagkaigwa nin pagkasararo asin katoninongan na nagtataong onra ki Jehova.—Sal. 133:1.
9, 10. Anong dugang na oportunidad an itinatao sa sato kan kombension tangani na omawon si Jehova?
9 Pagpapatotoo nin Impormal: Mantang nagbibiahe pasiring asin hale sa lugar kan kombension, dakol kitang oportunidad na omawon si Jehova paagi sa satong mga ngabil. (Heb. 13:15) Baga man kita nagkakakan sa sarong restawran o nakikipag-olay sa mga tawohan nin otel, humanap kita nin mga oportunidad na makapatotoo. An satong isip asin puso mapapano nin espirituwal na kayamanan. Isabi niato an mararahay na bagay na ini sa mga nakakaolay niato nin impormal.—1 Ped. 3:15.
10 Inaantisipar niatong marhay an oportunidad na ini na omawon si Jehova “sa tahaw kan nagkakasararong mga kadaklan.” (Sal. 26:12) Logod na sararo niatong pamurawayon si Jehova sa “Diosnon na Pagkuyog” na Pandistritong Kombension.
[Kahon sa pahina 5]
Mga Pagirumdom sa Pandistritong Kombension
◼ Mga Oras kan Programa: An programa mapoon alas 8:30 nin aga sa Biernes asin Sabado, asin alas 9:00 nin aga sa Domingo. Nagkapirang minuto bago magpoon an sesyon, matukaw na an tsirman sa plataporma mientras na pinapatugtog an pambukas na musikang pan-Kahadean. Kita gabos maninigo nang tumukaw sa panahon na iyan tanganing makapoon an programa sa paagi na may dignidad. An programa matatapos alas 4:35 nin hapon sa Biernes asin Sabado saka alas 4:10 nin hapon sa Domingo.
◼ Paradahan: Sa gabos na lugar kan kombension hihingoahon niamong gumibo nin mga areglo para sa paradahan. An gabos na may lunadan maninigong sunodon an mga instruksion kan mga attendant sa paradahan tanganing magin mas pasil para sa iba an mga bagay-bagay. Mantang sa parate limitado an paradahan sa satong mga assembly hall, maninigong mag-areglo nin kagrupo na makakaiba sa lunadan sagkod sa mapupuede imbes na may saro o duwa sanang tawo an kada lunadan.
◼ Pagreserba nin mga Tukawan: Puedeng magreserba nin mga tukawan para sana sa mga kaibanan nindo sa lunadan o kaibanan nindo sa harong.
◼ Mga donasyon: Darudakulang gastos an kalabot sa pag-areglar nin pandistritong kombension. Ikakapaheling niato an satong pag-apresyar paagi sa boluntaryong pagdonar sa satong Kingdom Hall o sa kombension para sa pambilog na kinaban na gibohon. An ano man na tsekeng idodonar sa kombension maninigong bayadan sa “Watch Tower.”
◼ Pangudtohan: Magdara tabi nin pangudtohan imbes na humale sa lugar kan kombension durante kan pahingalo sa udto tanganing bumakal nin pagkakan sa sarong restawran o sa mga paratinda sa kalye. Puedeng gumamit nin sadit na cooler na puedeng ibugtak sa irarom kan tukawan. Dai itinotogot sa pasilidad kan kombension an darakulang picnic cooler, mga lalagan na napapasa, asin mga inomon na de alkohol.
◼ Recording: An ano man na klaseng recorder dai maninigong ikonektar sa electrical o sound system kan pasilidad asin puede sanang gamiton sa paagi na dai makakadisturbo sa iba.
◼ Bautismo: An mga kandidato sa bautismo maninigong tumukaw na sa designadong mga tukawan bago magpoon an programa sa Sabadong aga. An lambang saro maninigong magdara nin mabining gubing na pambasa asin sarong tuwalya. Tangani na masegurado na angay an gubing ninda para sa okasyon na iyan, an kamagurangan na marepaso sa mga kandidato sa bautismo kan mga hapot sa librong Organisado maninigong iiba ini sa saindang pag-orolay.
◼ Badge Card: Isulot tabi an badge card sa gabos na panahon mantang nasa kombension asin mantang nagbibiahe pasiring asin hale duman. Puede ining kuanon paagi sa saindong kongregasyon. Dai na maghalat na humagad nin mga card para sa saindo asin sa saindong pamilya sagkod na pira na sanang aldaw bago an kombension.
◼ Pagretrato: Kun maretrato kamo, dai maninigong gumamit nin flash durante kan mga sesyon.
◼ Pager Asin Cell Phone: Maninigo ining iprograma sa paagi na dai makakaistorbo.
◼ Mga Aksidente Asin Emerhensia: Kun may mangyaring medikal na emerhensia sa lugar kan kombension, kontakon tabi an sarong kaharaning attendant, na iyo an tolos-tolos na mapaisi sa Departamento nin First Aid tanganing matantsar kan satong kualipikadong mga tawohan sa first aid kan kombension an pagigin seryoso kan situwasyon asin makatao nin tabang.