Mga Pandistritong Kombension—Panahon Para sa Magayagayang Pagsamba
1. Paanong an mga kapiestahan kaidto sa Israel kapareho kan satong mga pandistritong kombension ngonyan?
1 Si Jose, Maria, an mga aki ninda, asin an iba pa regular na nagtutukad pa-Jerusalem tanganing mag-atender sa taonan na mga kapiestahan. Sa mga okasyon na ini, sinda asin an ibang nagsasamba dai nguna iniisip an saindang mga problema sa aroaldaw kundi nagkokonsentrar sa mas importanteng espirituwal na mga aspekto kan saindang buhay. An mga kapiestahan nagtatao sa sainda nin panahon na maghorophorop asin makipag-olay manongod sa karahayan ni Jehova asin pag-isipan an saiyang Ley. An satong nagdadangadang na mga pandistritong kombension matao sa sato nin kaparehong mga oportunidad para sa magayagayang pagsamba ki Jehova.
2. Ano an maninigo niatong gibohon bilang pag-andam para sa nagdadangadang na pandistritong kombension?
2 Kaipuhan an Pag-andam: Hale sa Nazaret sagkod pabalik, an pamilya ni Jesus kinaipuhan na maglakaw nin mga 200 kilometros. Minsan ngani dai niato aram kun pira an tugang ni Jesus, maiimahinar niato an pagplano asin paghihingoa na kinaipuhan ni Jose asin Maria. Nagibo na daw nindo an kinakaipuhan na mga pag-andam tanganing makaatender sa bilog na tolong aldaw kan nagdadangadang na pandistritong kombension? Tibaad kaipuhan na magbakasyon sa trabaho o makipag-olay sa saindong among o sa maestra kan saindong aki tanganing maghagad nin bakasyon. Puede daw kamong magsadiring boot na tabangan na makaatender sa kombension an sarong tugang sa kongregasyon na may espesyal na pangangaipo?—1 Juan 3:17, 18.
3. Paano an mga kapiestahan sa Israel nagin oportunidad para sa nakakaparigon na pakikiasosyar?
3 Nakakaparigon na Pakikiasosyar: An Judiong mga kapiestahan nagin marahayon na oportunidad para sa nakakaparigon na pakikiasosyar sa mga kapwa nagsasamba! Daing duwa-duwa na inantisipar kan pamilya ni Jesus na makaibanan giraray an haloy nang mga katood. Ikinaogma man ninda an mga oportunidad na magkaigwa nin bagong mga katood sa mga kaburunyogan nin mga Judio asin proselito na magigin presente o nagbibiahe pasiring asin hale sa Jerusalem.
4. Paano niato puedeng ipaheling na dai niato binabaliwala an satong nagkakasararong asosasyon nin Kristianong magturugang?
4 An sarong dahelan kun taano ta inareglar kan maimbod asin mapagmansay na oripon na kita magtiripon tanganing maghinanyog sa mga pahayag sa mga pandistritong kombension imbes na ipresentar an kaparehong impormasyon sa mga inimprentang babasahon iyo na tanganing kita makapagparinigonan nin boot. (Heb. 10:24, 25) Kun siring, magplanong umabot sa kombension nin amay kada aldaw tanganing makiasosyar sa iba bago iintrodusir kan tsirman kan sesyon an musika, na nagsesenyal na oras nang tumukaw. Imbes na maghale sa pasilidad sa udto tanganing magbakal nin kakanon, dinadagka kita na magbalon nin dikit sanang pangudtohan asin magdanay sa kombension tanganing makamidbid asin makaolay an mga nasa palibot niato. An satong nagkakasararong asosasyon nin Kristianong magturugang sarong regalo hale ki Jehova na dai niato noarin man maninigong pagbaliwalaon.—Miq. 2:12.
5. Ano an makakatabang sa sato na makinabang nin lubos sa programa?
5 Panahon na Makanood: Poon sa pagkaaki, inaprobetsaran ni Jesus an mga kapiestahan tanganing makanood manongod sa saiyang langitnon na Ama. (Luc. 2:41-49) Ano an makakatabang sa sato asin sa satong pamilya na makinabang nin lubos sa mga kabtang na ipepresentar? Durante kan mga sesyon, magdanay na nakatukaw asin likayan an dai kinakaipuhan na pagparataram. Dai pagtogotan na makadisturbo sa saindo asin sa iba an saindong cell phone o iba pang kaparehong kagamitan. Ipokus an saindong mata sa ispiker, asin magkua nin halipot na mga nota. Magtukaw na magkairibanan bilang sarong pamilya tanganing masierto na an saindong mga aki naghihinanyog man. Sa banggi, magtao nin panahon na iribang pag-olayan an mga punto na nagustohan nindo.
6. Ano an maninigo niatong girumdomon mapadapit sa satong paggubing asin pagpakarhay sa sadiri?
6 Paggubing Asin Pagpakarhay sa Sadiri: Madaling mamidbid kan mga dayong negosyante an pamilya ni Jesus asin an iba pang Judiong parasamba na nagbibiahe pasiring asin hale sa mga kapiestahan huli sa mga kabingkabing sa gayad kan saindang gubing asin sa asul na bogkos sa itaas kan mga kabingkabing. (Bil. 15:37-41) Minsan ngani dai kita nagsusulot nin napapalaen na gubing, midbid kita sa mabining paggubing asin pagigin husay saka malinig. Maninigong tawan niato nin partikular na atension an satong itsura kun nagbibiahe pasiring asin hale sa kombension saka mantang nasa lugar kan kombension. Dawa kun nagsangli na kita nin gubing pagkatapos kan programa, maninigo niatong papagdanayon an itsura na may dignidad asin isulot an badge sa kombension. Sa paaging ini, kita mapapalaen sa mga bakong Saksi asin makakatao nin marahay na impresyon sa mga nagmamasid.
7. Taano ta maninigo niatong pag-isipan na magboluntaryo sa gibohon sa kombension?
7 Kaipuhan an mga Boluntaryo: Kaipuhan an dakol na boluntaryo tanganing magin areglado an dalagan kan kombension. Puede daw kamong magboluntaryo na tumabang? (Sal. 110:3) An mga gibohon sa mga kombension kabtang kan satong sagradong paglilingkod asin nagtatao nin marahay na patotoo. An manedyer sa sarong pasilidad nin kombension napahangang marhay sa mga boluntaryo na naglinig kan edipisyo kaya isinurat nia ini: “Gusto kong pasalamatan kamo huli sa pinakamakangangalas na pangyayari na naeksperyensiahan ko kasuarin man. Pirme ko nang nadadangog na an mga Saksi ni Jehova espesyal na mga tawo na may haloy nang reputasyon na pirmeng binabayaan na mas malinig an inarkilang pasilidad kisa kan inabotan ninda iyan. Huli sa saindo asin sa saindong organisasyon, an pasilidad na ini nagin mas marahay na lugar para sa komunidad asin ginibo nindo iyan paagi sa pinakamaboot na grupo nin mga tawo na ikinaogma ming makamidbid kasuarin man.”
8. Igwa nin anong mga oportunidad na makapagpatotoo mantang nasa lugar kan kombension?
8 Mga Oportunidad na Magpatotoo: Dakol na nasa lugar kan kombension an makakarisa sa naka-badge na mga bisitang marahay an bolos saka disente, asin tibaad makapukaw ini kan saindang interes, na nagtatao nin oportunidad sa sato na sabihon sa sainda an manongod sa kombension. Sarong kuatro anyos na aking lalaki an nagdara sa restawran kan saiyang kopya kan bagong iluwas na babasahon pagkatapos kan programa asin ipinaheling iyan sa serbidora. Ini an nagin dahelan na an babae maimbitaran sa kombension kan mga magurang kan aki.
9. Paano niato maaarog an pagpahalaga kan pamilya ni Jesus sa espirituwal na mga probisyon ni Jehova?
9 An suanoy na mga kapiestahan magayagayang mga okasyon na inaantisipar kan mga Judio na espirituwal an kaisipan. (Deut. 16:15) An pamilya ni Jesus maogma sa paggibo nin ano man na sakripisyo tanganing makaatender asin makinabang nin lubos. Igwa kita nin kaparehong pagpahalaga sa satong mga pandistritong kombension asin minamansay niato iyan bilang regalo hale sa satong mamomoton na langitnon na Ama. (Sant. 1:17) Ngonyan na an panahon na mag-andam para sa taonan na oportunidad na ini para sa magayagayang pagsamba ki Jehova!
[Kahon sa pahina 5]
Mga Pagirumdom sa Pandistritong Kombension
◼ Mga Oras kan Programa: An programa mapoon nin alas 8:20 nin aga sa Biernes asin Sabado saka alas 8:50 nin aga sa Domingo. Kun ipaisi na mapoon na an pambukas na musika, kita gabos maninigo nang tumukaw tanganing makapoon an programa sa may dignidad na paagi. An programa matatapos nin alas 3:55 nin hapon sa Biernes asin Sabado saka alas 3:15 nin hapon sa Domingo.
◼ Pagparada: Sa gabos na lugar kan kombension an enot na maarabot iyo an may prioridad na makaparada. Huling sa parate limitado an paradahan, maninigong mag-iribanan sa sarong lunadan sagkod sa mapupuede.
◼ Pagreserba nin Tukawan: Puedeng magreserba nin mga tukawan para sana sa mga kaiba nindo sa lunadan o kaibanan nindo sa harong, saka sa mga inaadalan nindo sa Biblia sa presente.
◼ Pangudtohan: Magbalon tabi nin pangudtohan imbes na humale sa lugar kan kombension durante kan pahingalo sa udto tanganing bumakal nin kakanon. Puedeng gumamit nin sadit na cooler na puedeng ibugtak sa irarom nin tukawan. Dai itinotogot sa pasilidad kan kombension an darakulang picnic cooler asin mga lalagan na napapasa.
◼ Mga Donasyon: Ikakapaheling niato an satong pag-apresyar sa mga areglo kan kombension paagi sa boluntaryong pagdonar sa satong Kingdom Hall o sa kombension para sa pambilog na kinaban na gibohon. An ano man na tsekeng idodonar sa kombension maninigong gibohon na payable to “Watch Tower.”
◼ Mga Aksidente Asin Emerhensia: Kun may mangyaring medikal na emerhensia sa lugar kan kombension, kontakon tabi an kaharaning attendant, na iyo an tolos-tolos na mapaisi sa First Aid tanganing matantsar kan satong kualipikadong mga boluntaryo sa First Aid an pagigin seryoso kan situwasyon asin makatao nin tabang. Kun kinakaipuhan, maapod sa pinakaharaning ospital an satong mga boluntaryo sa First Aid.
◼ May Diperensia sa Pagdangog: Sa nagkapirang kombension, an programa ibobrodkast sa FM radio frequency. Tanganing magamit an probisyon na ini, kaipuhan na magdara kamo nin sadit asin de bateryang FM receiver na may earphone.
◼ Pagrekord: An mga recorder dai maninigong ikonektar sa elektrisidad o sound system kan pasilidad asin puede sanang gamiton sa paagi na dai makakadisturbo sa iba.
◼ Pagretrato: Kun maretrato kamo durante kan mga sesyon, dai tabi maggamit nin flash o lipodan an iba na naghihinanyog sa programa.
◼ Mga Pormang Follow-Up: Maninigong gamiton an pormang Please Follow Up (S-43) tanganing itao an impormasyon mapadapit sa siisay man na nagpaheling nin interes bilang resulta nin impormal na pagpapatotoo niato durante kan kombension. Maninigong magdara an mga parahayag nin saro o duwang pormang follow-up sa kombension. An mga pormang sinuratan nin hinahagad na impormasyon puedeng itao sa Book Room tanganing maasikaso o sa sekretaryo kan saindong kongregasyon pagbalik nindo dian.—Helingon An Satong Ministeryo sa Kahadean na Nobyembre 2009, p. 4.
◼ Mga Restawran: Tawan nin onra an ngaran ni Jehova paagi sa saindong marahay na paggawe sa mga restawran. Sa nagkapirang lugar, pinagkatodan na an pagtao nin 10 porsientong tip, depende sa serbisyo.
◼ Mga Badge Card: Gamiton tabi an saindong badge card mantang nasa kombension asin kun nagbibiahe pasiring asin hale sa lugar kan kombension. An mga badge card makukua sana sa saindong kongregasyon. Dai na maghalat nin ultimo ora tanganing kumua nin badge card para sa saimo asin sa saimong pamilya.
◼ Bautismo: An mga kandidato sa bautismo maninigong tumukaw na sa designadong mga tukawan bago magpoon an programa sa Sabadong aga kan kombension. An lambang saro maninigong magdara nin mabining gubing na pambasa asin tuwalya. Tanganing masierto na an gubing kan mga binabautismohan angay para sa okasyon, maninigong tokaron ini sa sainda kan kamagurangan na marepaso sa sainda kan mga hapot sa librong Organisado.
◼ Volunteer Service: An kaogmahan niato sa pag-atender sa kombension mas maorog pa kun kita maboluntaryo na tumabang sa kinakaipuhan na gibohon. (Gibo 20:35) An siisay man na gustong magboluntaryo maninigong magreport sa Volunteer Service Department sa kombension. An mga aki na mayo pang 16 anyos puede man na magboluntaryo kaiba nin sarong magurang o nag-aataman o ibang adulto na inaprobaran kan siisay man sa sainda.