Tolong Aldaw nin Espirituwal na Karepreskohan
1. Ano an inaasahan tang akoon sa pandistritong kombension para sa taon na ini?
1 Sa kinaban na ini ni Satanas na alang sa espirituwal, padagos na rinerepreskohan ni Jehova an mga lingkod nia. (Isa. 58:11) An sarong probisyon na ginagamit ni Jehova tanganing paginhawahon kita iyo an taonan na pandistritong kombension. Mantang nagdadangadang an kombension para sa taon na ini, paano kita maandam tanganing mag-ako asin magtao nin espirituwal na karepreskohan?—Tal. 21:5.
2. Anong mga preparasyon an kaipuhan na niatong gibohon?
2 Kun dai pa nindo nagibo iyan, iareglo na ngonyan an saindong iskedyul sa personal asin sekular na trabaho tanganing magin presente sa bilog na tolong aldaw kan kombension. Kinarkulo na daw nindo an oras na kaipuhan nindo kada aldaw sa pagpasiring sa kombension tanganing amay na makaabot asin makakua nin tukawan bago magpoon an programa? Siertong habo tang malipasan an ano man na nakakaginhawang espirituwal na kakanon na iinandam ni Jehova para sa sato! (Isa. 65:13, 14) Nakapag-areglo na daw kamo nin dadagosan asin transportasyon?
3. Anong mga suhestion an makakatabang sa sato asin sa pamilya niato na lubos na makinabang sa programa?
3 Ano an makakatabang sa saindo na dai maglagawlagaw an isip mantang may sesyon? Kun posible, magkaigwa nin supisyenteng torog kada banggi durante kan kombension. Ipokus an saindong mata sa ispiker. Subaybayan an kada tekstong sasabihon nia. Magsurat nin haralipot na nota. Marahay kun an magkakapamilya magkataraed sa tukawan tanganing matabangan nin mga magurang an saindang mga aki na maingat na maghinanyog. (Tal. 29:15) Puede nindong pag-olayan kada banggi bilang pamilya an tampok na mga kabtang kan programa. Tanganing padagos na marepreskohan an saindong pamilya dawa pagkatapos kan kombension, puede man nindong pag-olayan durante kan Pampamilyang Pagsamba an espesipikong mga punto na ikakaaplikar nindo bilang pamilya.
4. Paano kita makakatabang sa iba sa kongregasyon niato na marepreskohan sa espirituwal?
4 Tabangan an Iba na Marepreskohan: Gusto niato na an iba marepreskohan man sa espirituwal. Igwa daw nin may edad nang mga parahayag o iba pa sa kongregasyon na nangangaipo nin tabang tanganing makaatender sa kombension? Nasa kamugtakan daw kamong tabangan sinda? (1 Juan 3:17, 18) Maninigong siertohon kan kamagurangan, nangorogna kan mga paraataman nin grupo, na matabangan an siring na mga parahayag.
5. Paano niato ididistribwir an mga imbitasyon para sa kombension? (Helingon man an kahon sa ibaba.)
5 Arog kan nakaagi, tolong semana bago kan kombension niato, makikikabtang kita sa kampanya na mag-imbitar sa iba na umatender. Maninigo na magin pasohan kan mga kongregasyon na ikadistribwir an mga imbitasyon na ipinadara sa sainda asin makobrehan an pinakadakol sa teritoryo ninda sagkod sa mapupuede. An natadang mga imbitasyon kan saindong pamilya sa katapusan kan kampanya maninigong darahon sa kombension tanganing magamit nindo sa impormal na pagpatotoo. May itatao pang impormasyon dapit digdi durante kan programa sa Biernes. An mga imbitasyon na dai na magagamit kan saindong pamilya mantang nasa kombension, maninigong itao sa attendant paglaog nindo sa pasilidad. Magtada tabi nin tigsararong kopya, huling kakaipuhanon nindo iyan sa huring pahayag sa Domingo.
6. Paano kita makakapaheling nin magayon na ugale sa kombension?
6 Nakakarepresko an Magayon na Ugale: Sa panahon na an dakol na tawo “mamomoton sa sainda man sana” asin mayo nin pagpahalaga sa namamatean nin iba, nakakarepresko nanggad na makaibanan nin mga kapwa Kristiano na nagmamaigot na magpaheling nin magayon na ugale! (2 Tim. 3:2) Nagpapaheling kita nin magayon na ugale paagi sa toninong asin aregladong pag-abot sa pasilidad kada aldaw asin pagreserba nin tukawan para sana sa kairiba niato sa harong o lunadan, asin mga inaadalan niato sa Biblia sa presente. Sinusunod niato an tsirman kun sabihon na nia na kita tumukaw na tanganing magdangog kan musika bago kan kada sesyon. Magayon man na ugale kun ilalaag sa silent mode an satong cellphone tanganing dai makadisturbo durante kan programa. Ipinapaheling man niato an magayon na ugale durante kan programa paagi sa dai pakikipag-olay, pag-text, pagkakan, o paglakawlakaw sa mga pasilyo kun dai man kaipuhan.
7. Paano kita marerepreskohan asin makakarepresko sa mga tugang niato mantang nakikiasosyar sa sainda?
7 Nakakarepreskong Asosasyon: An mga kombension nagtatao sa sato nin dagdag na mga oportunidad na ikaogma an satong nakakarepreskong pagkasararo asin pagigin magturugang bilang mga Kristiano. (Sal. 133:1-3) Taano ta dai mangenot sa ‘pagpahiwas’ asin sa pakipagmidbidan sa mga tugang hale sa ibang kongregasyon? (2 Cor. 6:13) Puede nindong magin pasohan kada aldaw na may makamidbid kisiera sarong tugang o pamilya. An pahingalo sa udto marahay na oportunidad na gibohon ini. Kaya magbalon nin simpleng pangudtohan asin ikaogma an pagkakan kaibanan nin iba saka pakikiasosyar sa sainda imbes na magbakal nin kakanon sa luwas o magkakan sa kaharaning restawran. Puede ining magbunga nin bendisyon na arog nin bago asin nagdadanay na pakikipagkatood.
8. Taano ta maninigo kitang magboluntaryo sa kombension, asin paano niato magigibo iyan?
8 Nakakarepresko nanggad na magtrabaho kaiba kan mga kapwa parasamba sa sagradong paglilingkod! Puede daw kamong magboluntaryo sa sarong departamento o magtabang sa asignasyon kan kongregasyon nindo na paglinig? (Sal. 110:3, NW) Kun mayo pa kamong asignasyon, magduman tabi sa Departamento sa Pagboluntaryo sa kombension. Kun dakol an maboluntaryo, magigin magayagaya asin magian an mga gibohon dian.
9. Taano ta maninigo tang tawan nin partikular na atension an satong paggawe asin itsura durante kan kombension?
9 An Paggawe Niato Nakakarepresko sa mga Nagmamasid: Kita mga delegado durante kan bilog na tolong aldaw kan kombension, bako sanang durante kan programa. Maninigo tang ipaheling sa mga nagmamasid sa sato an nakakarepreskong kalaenan niato sa mga bakong Saksi mantang kita nasa lugar kan kombension. (1 Ped. 2:12) Maninigong magtao nin onra ki Jehova an pagbado asin pagpakarhay niato kan satong sadiri, kita man nasa kombension, dinadagosan, o restawran. (1 Tim. 2:9, 10) Kun ginagamit niato an satong badge card, mamimidbid kita kan mga nagmamasid bilang Mga Saksi ni Jehova. Puede ining magtao sa sato nin oportunidad na sabihon sa sainda an manongod sa kombension niato asin orog pang makapagpatotoo.
10. Paano niato masisierto na magkakaigwa nin positibong pagmansay sa kombension niato an mga nagtatrabaho sa hotel asin restawran?
10 An nagkapira sa sato tibaad magdagos sa hotel durante kan kombension. Paano kita makikikooperar sa mga nagtatrabaho sa hotel asin restawran? Maninigo tang sunodon an mga reglamento kaiyan dapit sa kun pirang tawo sana an puede sa kada kuarto. Maninigo man na dai kita magribok tanganing dai makadisturbo sa iba. Kun sibot an hotel sa panahon na kita ma-check in o ma-check out, maninigo kitang magin mapasensia asin maboot. (Col. 4:6) Maninigo kitang magtao nin tip sa mga waiter sa restawran, kun napagkatodan ini, asin sa mga tawohan sa hotel na nagdadara kan mga gamit niato, naglilinig kan kuarto niato, saka nagtatao nin iba pang serbisyo.
11. Anong mga eksperyensia an nagpapaheling na nagreresulta sa marahay na patotoo an satong Kristianong paggawe?
11 Ano an nagigin impresyon nin iba huli sa marahay na paggawe niato sa kombension? Segun sa sarong artikulo sa diaryo, an manedyer nin sarong pasilidad na ginagamit para sa mga kombension nagsabi: “Magalang na marhay an mga tawong iyan. Naoogma kami sa pagdigdi ninda kada taon.” Kan nakaaging taon, an sarong bakong Saksi nawaran nin pitaka sa sarong hotel na dinagosan kan mga delegado sa kombension. Kan ibalik sa manedyer kan hotel an pitaka na kompleto an laog, sinabihan kan manedyer an kagsadiri kaiyan: “Marahay sana ta may kombension an Mga Saksi ni Jehova sa lugar mi, kaya napano ninda an hotel na ini. Ta kun bakong sinda, dai na kutana nakabalik saimo an pitaka mo.”
12. Mantang harani na an kombension, ano an maninigong pagmaigotan niato, asin taano?
12 Harani na an mga kombension para sa taon na ini. Dakol na panahon asin dakulang paghihingoa an kalabot tanganing magin nakakarepresko an programa asin an lugar kan kombension. Pagmaigotan nindo na magin presente sa bilog na tolong aldaw, asin magin andam para sa iinareglo ni Jehova asin kan organisasyon nia para sa saindo. Magin determinado na marepreskohan an iba paagi sa saindong magayon na ugale, magayagayang pakikiasosyar, asin marahay na paggawe. Huli kaini, mamamatean man nindo asin kan iba an arog kan isinurat nin saro sa mga delegado kan nakaaging taon, “Mayo na akong nagigirumdoman na mas nakakakontentong eksperyensia!”
[Blurb sa pahina 3]
Arog kan nakaagi, tolong semana bago kan kombension niato, makikikabtang kita sa kampanya na mag-imbitar sa iba na umatender
[Blurb sa pahina 4]
Maninigong magtao nin onra ki Jehova an pagbado asin pagpakarhay niato kan satong sadiri, kita man nasa kombension, dinadagosan, o restawran
[Blurb sa pahina 4]
Magin determinado na marepreskohan an iba paagi sa saindong magayon na ugale, magayagayang pakikiasosyar, asin marahay na paggawe
[Kahon sa pahina 5]
Mga Pagirumdom sa 2011 Pandistritong Kombension
◼ Oras kan Programa: An programa mapoon nin alas 8:20 sa Biernes asin Sabadong aga saka alas 8:50 sa Domingong aga. Kun ipaisi na mapoon na an pambukas na musika, kita gabos maninigo nang tumukaw tanganing an programa makapoon na may dignidad. An programa matatapos nin alas 4:00 sa Biernes asin Sabadong hapon saka alas 3:15 sa Domingong hapon.
◼ Paradahan: Sa gabos na lugar kan kombension, an enot na maarabot iyo an may prioridad na magparada. Huling sa parate limitado an paradahan, sagkod sa mapupuede mag-iribanan na sana sa sarong lunadan imbes na darahon an kanya-kanyang lunadan.
◼ Pagreserba nin Tukawan: Puedeng magreserba nin tukawan para sana sa kairiba niato sa harong o lunadan, asin mga inaadalan niato sa Biblia sa presente.—1 Cor. 13:5.
◼ Pangudtohan: Magbalon tabi nin pangudtohan imbes na magkakan sa luwas o magbakal kaiyan durante kan pahingalo sa udto. Puedeng gumamit nin sadit na cooler na ikakabugtak sa irarom nin tukawan. Dai itinotogot an darakulang picnic cooler asin mga lalagan na napapasa.
◼ Donasyon: Ikakapaheling niato an satong pag-apresyar sa mga areglo kan kombension paagi sa boluntaryong pagdonar sa satong Kingdom Hall o sa kombension para sa pambilog na kinaban na gibohon. An ano man na tsekeng idodonar maninigong gibohon na payable to “Watch Tower.”
◼ Aksidente Asin Emerhensia: Kun may mangyaring medikal na emerhensia sa lugar kan kombension, ipaaram tabi sa pinakaharaning attendant, na iyo an mapaisi tolos-tolos sa First Aid tanganing matantsar kan satong kualipikadong mga boluntaryo dian kun gurano kaseryoso kan situwasyon asin makatao nin tabang. Kun kinakaipuhan, maapod sa pinakaharaning ospital an satong mga boluntaryo sa First Aid.
◼ Bolong: Kun may tinotomar kamong bolong na reseta sa saindo, siertohon tabi na magdara kamo nin supisyente, huling mayo kaiyan sa kombension.
◼ Sapatos: Kada taon, dakol an nadadanyaran huli sa sulot nindang sapatos. Pinakamarahay na magsulot nin tama sana asin komportableng sapatos tanganing pasil kamong makalakaw sa mga rampa, hagyan, gratings, asin iba pa.
◼ Pagrekord: An mga recorder dai dapat ikonektar sa elektrisidad o sound system kan pasilidad asin puede sanang gamiton sa paagi na dai makakadisturbo sa iba.
◼ Pagretrato: Kun maretrato kamo durante kan mga sesyon, dai tabi maggamit nin flash o dai paglipodan an mga nag-aatender.
◼ Pormang Please Follow Up (S-43): Maninigong gamiton an pormang iyan para sa mga nagpaheling nin interes sa impormal na pagpapatotoo niato durante kan kombension. Maninigong magdara an mga parahayag nin saro o duwa kaiyan. An mga pormang iyan na sinuratan nin impormasyon puedeng itao sa Book Room o sa sekretaryo kan kongregasyon nindo.—Helingon An Satong Ministeryo sa Kahadean na Nobyembre 2009, pahina 4.
◼ Restawran: Tawan nin onra an ngaran ni Jehova paagi sa marahay na paggawe nindo kun nasa restawran. Magtao nin tip kun pinagkatodan ini sa saindong lugar.
◼ Badge Card: Gamiton tabi nindo iyan mantang nasa kombension asin kun nagbibiahe pasiring asin hale sa lugar kan kombension. Makukua sana iyan sa kongregasyon nindo. Dai na maghalat nin ultimo ora tanganing kumua kaiyan para sa saimo asin sa mga kapamilya mo.
◼ Bautismo: An mga kandidato sa bautismo maninigong tumukaw na sa designadong mga tukawan bago magpoon an programa sa Sabadong aga. An lambang saro maninigong magdara nin mabining isusulot asin tuwalya. Tanganing masierto na an isusulot kan mga babautismohan angay para sa okasyon, maninigong ipakipag-olay ini sa sainda kan kamagurangan na marepaso kan mga hapot sa librong Organisado.
◼ Pagboluntaryo: Magigin orog pa ngani an kaogmahan niato sa pag-atender kun kita maboluntaryo sa mga gibohon sa kombension. (Gui. 20:35) An siisay man na gustong magboluntaryo maninigong magduman sa Departamento sa Pagboluntaryo. An mga aki na mayo pang 16 anyos puede man magboluntaryo basta kaiba kan saindang magurang o nag-aataman o ibang adulto na aprobadong magbantay sa sainda.
[Kahon sa pahina 3]
Paano Niato Itatao an Imbitasyon?
Tanganing makobrehan an bilog na teritoryo niato, maninigo na halipot sana an pakikipag-olay niato. Puede tang sabihon: “Kumusta. Nakikikabtang kami sa pambilog na kinaban na pagdistribwir kan imbitasyon na ini. Uni an kopya nindo. Dakol pang detalye dian an maheheling nindo.” Nakakapukaw nin interes an atubangan na pahina kaiyan, kaya itao iyan sa kagharong na nakaatubang an pahinang iyan. Magin entusiastiko. Kun nagdidistribwir sa katapusan kan mga semana, maninigo man na ialok an mga magasin kun angay.