Paggawi na Nagpapamuraway sa Diyos
1. Taano ta madaling marisa an mga Saksi ni Jehova kun nag-aatender sa mga pandistritong kumbensiyon?
1 Kun nag-aatender sa mga kumbensiyon, madali kitang marisa nin iba. Nakasulot kita nin badge card asin iribang nagbibiyahe kada aldaw. An minasunod iyo an nagkapirang mga pagirumdom na makakatabang sa sato para mapamuraway an Diyos paagi sa satong marahay na paggawi sa lugar kan kumbensiyon.—1 Ped. 2:12.
2. Paano ta mapapamuraway an Diyos paagi sa satong mabining pagbado sa lugar kan kumbensiyon?
2 Magbado nin Mabini: Sa parati napapahanga an mga nagmamasid sa mabini tang pagbado pag nag-aatender kita nin kumbensiyon. Pero, an istilo kan satong pagbado pag nagkakakan kita sa mga restawran o pag nagsa-shopping puwedeng magwalat nin mas hararom na impresyon. Sa siring na mga pagkakataon dapat na an satong pagbado mabini asin bakong sobra kaimpormal. Dapat na mahiling kan mga nagmamasid an kalainan ta sa mga dai nagtutubod. (Roma 12:2) Dapat ta man isulot an satong badge card para ipaisi sa iba an satong kumbensiyon, magbukas nin oportunidad na makapagpatotoo, asin madali kitang mabisto kan ibang mga delegado.
3. Paano kita makakapahiling nin pasensiya asin paggalang?
3 Magin Mapasensiya Asin Magalang: Sa panahon ta ngunyan na dakul an makasadiri, nakakarepresko nanggad para sa mga nagmamasid an satong pagigin mapasensiya asin magalang! (2 Tim. 3:1-5) Pag nagrereserba nin mga tukawan o nagpipila para kumua nin bagong luwas na publikasyon, dapat tang inuton an kapakanan kan iba, bako an satong sadiri. (1 Cor. 10:23, 24) Pagkatapos kan inot na pag-atender nin kumbensiyon, sinabi nin sarong interesadong lalaki, “Mayo akong nagirumduman sa arin man na pahayag kan aldaw na idto, pero an paggawi kan mga Saksi an nagtadom sa isip ko.”
4. Taano ta dapat tang pag-isipan na magboluntaryo sa kumbensiyon kun itinutugot kan kamugtakan ta?
4 Magboluntaryo: An espiritu nin pagboboluntaryo hiling-hiling sa tunay na mga Kristiyano. (Sal. 110:3) Sa sarong kumbensiyon, mga 600 na tugang an nagboluntaryo para maglinig sa pasilidad bago an kumbensiyon. An sarong staff duman nagsabi: “Hangang-hanga kami sa nahiling mi! Dai kami makatubod na gabos sinda boluntaryo.” Inaantisipar ta nang marhay an 2013 na kumbensiyon asin an oportunidad na mapamuraway an Diyos paagi sa satong paggawi.