Mga Pagirumdom Para sa Kumbensiyon
Oras kan Programa: Bubuksan an pasilidad nin alas 7:00 nin aga. An pambukas na musika mapuon nin alas 8:20 nin aga sa bilog na tulong aldaw. Sa oras na iyan, kita gabos maninigo nang tumukaw tanganing an programa makapuon na may dignidad. Matatapos iyan paagi sa awit asin pamibi sa oras na alas 3:50 nin hapon sa Biyernes pati Sabado asin alas 2:45 nin hapon sa Domingo.
‘Umawon si Jehova Paagi sa Awit’: An mga lingkod nin Diyos kan suanoy na mga panahon inuumaw si Jehova paagi sa awit, asin an musika sarong importanteng kabtang pa man giraray kan tunay na pagsamba ngunyan. (Sal. 28:7) Nagpupuon an kada sesyon kan satong pangrehiyon na kumbensiyon sa pagpapatugtog nin musika. Bako sana iyan na background music kundi ginibo iyan tanganing andamon kitang makanuod manungod ki Jehova asin sambahon siya. Kaya, pag ipinaisi na kan tsirman na mapuon na an musika, iyan na an panahon na magtukaw para dangugon asin apresyaron an musika. Paagi kaiyan, ipinapahiling niyato na pinapahalagahan ta an paghihinguwa kan mga miyembro kan Watchtower orchestra. Duwang beses kada taon sindang nagpapasiring sa Patterson, New York, sa sadiri nindang gastos, tanganing magtugtog nin mga musika para sa sato. Pagkatapos niyatong magdangog kan musika, an gabos maninigong umiba sa pag-umaw ki Jehova paagi sa pagkanta kan mga awit na pang-Kahadian.
Parking: Sa mga kumbensiyon na kita an nag-aasikaso sa parking, first-come first-served an pagparada. Huling sa parati limitado an paradahan, mag-iribanan na sana tabi sa lunadan sagkod sa mapupuwede imbes na darahon an kanya-kanyang lunadan. Dapat na siguraduhon nin responsableng mga brother na an mga lunadan sanang may sakay na disabled an tutugutan na magparada sa paradahan na nakareserba para sa mga disabled.
Pagreserba nin Tukawan: Sa pagbukas kan pasilidad kada aga, dai tabi maghidali pasiring sa mga tukawan na garo nakikipag-inutan sa iba. Magin makonsiderasyon tabi sa iba, na nagsasakripisyo pa ngani para sa kapakanan kan satong mga tugang. An ugaling iyan an nagpapamidbid sa sato bilang tunay na mga Kristiyano asin nagpapahiro sa mga nagmamasid na umawon an Diyos. (Juan 13:34, 35; 1 Cor. 13:5; 1 Ped. 2:12) An mga tukawan puwede sanang ireserba para sa mga kaibanan nindo sa lunadan, sa harong, o tinutukduan nindo ngunyan sa Bibliya. Dai tabi maglaag nin gamit sa mga tukawan na dai man nindo irinereserba. Makakatabang iyan na maaraman kan iba na mayo pang nakatukaw duman. May irineserbang tukawan para sa mga may edad na asin maluya an hawak. Huling limitado an tukawan na ini, saro o duwa sanang nag-aalalay an puwedeng magtaid sa sainda.
Mabining Pagbado: Sa panahon nin kumbensiyon, an satong pagbado dapat na angay asin mabini, bakong arog kan sobrang mga istilo na uso sa kinaban. (1 Tim. 2:9) Dawa kun paduman o hali sa satong mga dinadagusan asin kun namamasyar bago asin pakatapos kan mga sesyon, linilikayan ta na magin sobra kakaswal o bakong husay an itsura. Kaya dai kita masusupog na isulot an satong badge asin na magpatotoo pag may oportunidad. An satong itsura asin marahay na paggawi sa panahon kan maabot na kumbensiyon bako sanang makakaakit sa mga tawong sadiyosan an puso na akuon an nagliligtas buhay na mensahe kan Bibliya kundi makakapaugma man iyan ki Jehova.—Sof. 3:17.
Marahay na Paggawi May Koneksiyon sa mga Gadyet: Pagpahiling nin marahay na paggawi kun ia-adjust niyato an satong mga cell phone o iba pang gadyet sa setting na dai makakaisturbo sa iba. Kun magamit nin kamera, video recorder, tablet, o iba pang gadyet, hinguwahon niyatong magin makonsiderasyon na dai naiisturbo o nalilipudan an iba. Pagpahiling man nin marahay na paggawi kun dai kita magtetext o mag-e-email na dai man kaipuhan sa panahon nin sesyon.
Pangudtuhan: Magbalon tabi nin pangudtuhan imbes na magbakal o magkakan sa luwas durante kan intermisyon sa udto. Puwedeng gumamit nin sadit na cooler na ikakabugtak sa irarom nin tukawan. Dai itinutugot an darakulang picnic cooler asin mga lalagan na mapapasaon sa lugar kan kumbensiyon.
Donasyon: Ikakapahiling niyato an satong pag-apresyar sa mga areglo kan kumbensiyon paagi sa boluntaryong pagdonar sa lugar kan kumbensiyon para sa pambilog na kinaban na gibuhon. An ano man na tsekeng idodonar maninigong gibuhon na payable to “Watch Tower.” Puwede man magdonar paagi sa debit o credit card.
Bulong: Kun may tinutumar kamong irinesetang bulong, siyertuhon tabi na magdara nin supisyente, huling mayo kaiyan sa kumbensiyon. An mga pang-ineksiyon na ginamit nin mga diyabetiko kaipuhan na iapon sa basurahan nin hazardous waste, bako sa ibang basurahan sa kumbensiyon o hotel.
Mga Pag-iingat: Magin maingat tabi para malikayan an mga aksidenteng arog kan pagkadarinas asin pagkabaliko. Kada taon, dakul an naaaksidente huli sa sulot na sapatos, lalo na idtong haralangkaw an takon. Pinakamarahay na magsulot nin simple asin komportableng sapatos tanganing pasil kamong makalakaw sa mga rampa, hagyan, asin iba pa.
May Diperensiya sa Pagdangog: Sa nagkapirang kumbensiyon, madadangog an programa sa FM radio frequency. Para madangog iyan, kaipuhan nindong magdara nin sadit na de-bateriyang FM receiver na may earphone.
Please Follow Up (S-43) Form: Maninigong gamiton ini para isurat an impormasyon dapit sa siisay man na nagpahiling nin interes sa impormal na pagpatotoo durante kan kumbensiyon. Puwedeng itao iyan sa Book Room o sa sekretaryo kan kongregasyon nindo.
Restawran: Tawan nin onra an ngaran ni Jehova paagi sa marahay na paggawi kun nasa restawran. Magbado na angay sa sarong Kristiyanong ministro. Magtao nin tip kun pinagkatudan ini sa saindong lugar.
Volunteer Service: An siisay man na gustong magboluntaryo maninigong magduman sa Volunteer Service Department. An mga aki na mayo pang 16 anyos puwede man magboluntaryo basta kaiba an magurang, guardian, o iba pang adulto na pinagtiwalaan kan magurang o guardian.