Sinasanay Kita ni Jehova Para sa Gibohon na Ini
1. Kun tinatawan ni Jehova nin asignasyon an mga tawo, ano man an ginigibo nia?
1 Kun tinatawan ni Jehova nin asignasyon an mga tawo, tinatawan man nia sinda nin tabang na kaipuhan tanganing magibo iyan. Halimbawa, kan sabihan ni Jehova si Noe na maggibo nin arka, sarong bagay na nungka pang nagibo ni Noe, sinabi man Nia kun paano iyan gigibohon. (Gen. 6:14-16) Kan an mahoyong pastor na si Moises asignaran na makipag-olay sa kamagurangan na lalaki kan Israel asin ki Faraon, sinierto sa saiya ni Jehova: “Ako iyaon sa saimong gñoso, asin totokdoan taka kan saimong itataram.” (Ex. 4:12) Kun dapit sa asignasyon sa sato na maghulit kan maogmang bareta, dai kita pinapabayaan ni Jehova. Sinasanay nia kita para sa gibohon na ini paagi sa Teokratikong Paadalan sa Pagmiministro asin Pagtiripon sa Paglilingkod. Paano kita makikinabang sa pagsasanay na ini?
2. Paano kita makikinabang sa Teokratikong Paadalan sa Pagmiministro?
2 An Teokratikong Paadalan sa Pagmiministro: Bago mag-atender sa kada pagtiripon, pag-adalan an nakaiskedyul na mga reperensia. Dangan mantang naheheling nindo kun paano iyan ginagamit kan mga estudyante sa saindang kabtang, padagos kamong makakanood kun paano magtokdo. (Tal. 27:17) Darahon sa pagtiripon an saindong libro na Paadalan sa Pagmiministro tanganing gamiton bilang workbook. Kun may tinotokar dian an paraataman kan paadalan pagkatapos kan kada kabtang kan estudyante, kuritan an pangenot na mga puntong gusto nindong iaplikar, asin gamiton an espasyo sa mga gilid para sa mga nota. Minsan siring, an pagpartisipar an pinakamarahay na paagi na makinabang sa paadalan na ini. Nakapalista ka na daw? Kun tinawan ka nin kabtang, mag-andam na marhay asin iaplikar an itataong konseho. Kun nasa ministeryo, gamiton an nanodan mo.
3. Ano an makakatabang sa sato tanganing makinabang sa Pagtiripon sa Paglilingkod?
3 An Pagtiripon sa Paglilingkod: Mas magigirumdoman niato an mga suhestion na itinatao sa pagtiripon na ini paagi sa patienot na pagbasa kan mga gagamiton dian asin pag-andam tanganing makapagkomento. Kun halipot sana an komento niato, mas dakol an makakapartisipar. Tawan nin maingat na atension an mga demonstrasyon, asin gamiton an ano man na mga suhestion na para sa saindo makakatabang na magin mas epektibo kamo sa ministeryo. Ingatan an pangenot na mga artikulo kan An Satong Ministeryo sa Kahadean tanganing magamit kun kaipuhan.
4. Taano ta maninigo tang iaplikar an teokratikong pagsasanay?
4 Arog kan asignasyon ki Noe asin Moises, depisil an sugo sa sato na maghulit kan maogmang bareta sa bilog na ineerokan na daga. (Mat. 24:14) Magigin mapanggana kita kun magsasarig kita ki Jehova, an Kaharohalangkaweng Paratokdo niato, asin kun iaaplikar niato an pagsasanay nia sa sato.—Isa. 30:20.