Sarong Okasyon na Magkakan sa Espirituwal Asin Maggayagaya
1. Paano ni Jehova inaasikaso an espirituwal na mga pangangaipo kan saiyang mga lingkod?
1 Mamomoton na inaasikaso ni Jehova an espirituwal na mga pangangaipo kan saiyang mga lingkod. Mantang gutom sa espirituwal an kinaban sa pangkagabsan, kita basog nanggad sa espirituwal. (Isa. 65:13) An sarong paagi ni Jehova sa pagpakakan sa sato sa espirituwal iyo an taonan na mga pandistritong kombension. Nag-aandam na daw kamo tanganing maatenderan an gabos na sesyon kan nagdadangadang na “Ginigiyahan kan Espiritu nin Dios” na Pandistritong Kombension? Masiram asin masustansiang espirituwal na bangkete an inareglo.
2. Ano an kalabot sa pagplano nin patienot para sa kombension?
2 Magplano nin Patienot: “An mga plano kan mahigos seguradong nagbubunga nin bentaha.” (Tal. 21:5) Kun siring, sa pag-areglar kan saindong mga plano na magin presente sa gabos na tolong aldaw kan kombension, kaolayon na ngonyan an saindong among dapit sa bakasyon nindo para sa pandistritong kombension. Kun kaipuhan nindo nin madadagosan sa banggi, ikinaareglar na daw ini? Gugustohon man nindo na planohon an saindong mga pangudtohan tanganing makakakan kamo kaiba kan saindong mga tugang sa lugar kan kombension. Gumibo nin mga areglo na mag-abot nin amay sa kombension kada aldaw tanganing makakua nin matutukawan asin makaiba sa pambukas na awit asin pamibi.
3. Anong klaseng gubing an maninigo niatong planohon na suloton?
3 Gusto niatong masierto na an gubing na satong susuloton mabini asin husay. (1 Tim. 2:9, 10) An mga pandistritong kombension nagtatao nin marahayon na oportunidad na makapagpatotoo kita sa komunidad. Paagi sa pagpapadanay nin may dignidad na itsura mantang nasa palibot kan lugar kan kombension asin paagi sa pagsulot kan satong pangkombension na badge, risang-risa an kalaenan niato sa mga daing pagtubod asin nakakatao kita nin paborableng impresyon sa mga nagmamasid.
4. Ano an makakatabang sa sato asin sa satong pamilya na makinabang nin lubos sa programa?
4 Maingat na Maghinanyog: Seguradong dai niato gusto na malipasan an ano man na kabtang nin pagtotokdo na ipinepresentar sa espirituwal na bangketeng ini! (Tal. 22:17, 18) Kun sinusundan niato sa satong Biblia an mga teksto mantang binabasa iyan asin kun nagsusurat kita nin haralipot na nota, makakatabang iyan sa sato na isentro an satong isip sa programa saka likayan an disturbo. Dangan sa banggi, puede niatong gamiton an satong mga nota tanganing ipakipag-olay sa iba an tampok na mga kabtang kan programa. Sa nakaagi pa sanang mga taon naobserbaran na an nagkapirang hoben nagtutukaw na magkairibanan sa kombension asin nag-eerestoryahan durante kan programa o nagpapadara nin mga text message paagi sa saindang mga cell phone. Kun igwa kita nin mga aki, kaiba an mga tinedyer, puedeng magin kapakipakinabang kun kita matukaw na magkairibanan saka mahinanyog sa programa bilang pamilya imbes na togotan an satong hoben na mga aki na tumukaw na harayo sa sato asin kaibanan nin iba pang hoben.
5. Paano niato puedeng paorogon an satong kaogmahan sa kombension?
5 Ikaogma an Pakikiasosyar: An masiram na kakanon mas nakakaogma kun iyan kinakakan kaiba nin mga katood. (Tal. 15:17) Kaagid kaiyan, an pakikiasosyar sa satong mga tugang nagpapaorog kan satong kaogmahan sa kombension. Kun siring, kun mayo nin sesyon, nakakagayagaya nanggad na mag-enot kita na makimidbidan sa ibang mga delegado asin ikaogma niato an pakikiasosyar! (Sal. 133:1) Kun magalang na kitang imbitaran kan tsirman na tumukaw bago magpoon an musika, maninigo na taposon na niato an satong orolay asin tumukaw na para sa pagpoon kan programa.
6. Magsaysay nin personal na eksperyensia na nagpapaheling kun paano kita puedeng makapagpatotoo sa mga tawo sa palibot kan lugar kan kombension.
6 Magin Alisto sa Pagpatotoo: An mga kombension sa parate nagtatao nin marahayon na mga oportunidad na makapagpatotoo. An dakol na kombensionista na nagduduman sa mga restawran pagkatapos nin programa hinahapot nin mga weyter asin nin iba pa manongod sa temang yaon sa pangkombension na badge. Nagresulta ini sa mga pag-orolay asin sa marahayon na pagpapatotoo sa katotoohan. An nagkapira na naghapot inimbitaran sa sesyon kan kombension asin nag-atender.
7. Taano ta maninigo kitang umatender sa nagdadangadang na pandistritong kombension?
7 Rinibong oras an ginamit sa pag-andam kan programa, pag-areglar sa mga pasilidad, pag-organisar sa mga departamento kan kombension, asin pag-andam kan mga pahayag. An gabos na mamomoton na pagpapagal sa pag-andam kan espirituwal na bangketeng ini nagpaparisa kan mamomoton na pag-asikaso ni Jehova sa saiyang banwaan. Logod na kita gabos magin presente asin maghingoang makanood nin dakol sagkod sa mapupuede! Kun gigibohon niato iyan, bakong arog kan kinaban, kita “magkukururahaw sa kagayagayahan huli sa marahay na kamugtakan kan puso.”—Isa. 65:14.
[Mga Hapot Para sa Pag-adal]
[Kahon sa pahina 5]
Mga Pagirumdom sa Pandistritong Kombension
◼ Mga Oras kan Programa: An programa mapoon alas 8:20 nin aga sa Biernes asin Sabado saka alas 8:50 nin aga sa Domingo. Kun magpoon na an pambukas na awit, kita gabos maninigo nang tumukaw tanganing makapoon an programa sa may dignidad na paagi. An programa matatapos alas 3:55 nin hapon sa Biernes asin Sabado saka alas 4:00 nin hapon sa Domingo.
◼ Pagparada: Sa gabos na lugar kan kombension na kita an may kontrol sa paradahan, puedeng pumarada na daing bayad, asin an enot na maarabot iyo an may prioridad na makaparada. An mga pangkombension na badge card an magseserbing midbidan para sa pagparada.
◼ Pagreserba nin Tukawan: Puedeng magreserba nin mga tukawan para sana sa mga kaiba nindo sa lunadan o kaibanan nindo sa harong.
◼ Pangudtohan: Magbalon tabi nin pangudtohan imbes na humale sa lugar kan kombension durante kan pahingalo sa udto tanganing bumakal nin kakanon. Puedeng gumamit nin sadit na cooler na puedeng ibugtak sa irarom kan saindong tukawan. Dai itinotogot sa pasilidad kan kombension an darakulang picnic cooler, mga lalagan na napapasa, asin mga inomon na de alkohol.
◼ Mga Donasyon: Ikakapaheling niato an satong pag-apresyar sa mga areglo kan kombension paagi sa boluntaryong pagdonar sa satong Kingdom Hall o sa kombension para sa pambilog na kinaban na gibohon. An ano man na tsekeng idodonar sa kombension maninigong gibohon na payable to “Watch Tower.”
◼ Mga Aksidente Asin Emerhensia: Kun may mangyaring medikal na emerhensia sa lugar kan kombension, kontakon tabi an kaharaning attendant, na iyo an tolos-tolos na mapaisi sa First Aid tanganing matantsar kan satong kualipikadong mga tugang sa First Aid an pagigin seryoso kan situwasyon asin makatao nin tabang. Kun kinakaipuhan, an satong mga tugang sa First Aid maapod sa kaharaning ospital.
◼ Rekording: An ano man na klaseng recorder dai maninigong ikonektar sa elektrisidad o sound system kan pasilidad asin puede sanang gamiton sa paagi na dai makakaistorbo sa iba.
◼ Pagretrato: Kun maretrato kamo durante kan mga sesyon, dai tabi maggamit nin flash.
◼ Mga Pager Asin Cell Phone: Maninigong iprograma an mga ini sa paagi na dai makakadisturbo durante kan mga sesyon sa kombension.
◼ Mga Pormang Follow-Up: Maninigong gamiton an pormang Please Follow Up (S-43) tanganing itao an impormasyon mapadapit sa siisay man na nagpapaheling nin interes bilang resulta nin impormal na pagpapatotoo niato durante kan kombension. Maninigong magdara an mga parahayag nin saro o duwang pormang follow-up sa kombension. An mga pormang sinuratan nin hinahagad na impormasyon puedeng itao sa Book Room tanganing maasikaso o sa saindong sekretaryo kan kongregasyon pagbalik nindo dian.—Helingon An Satong Ministeryo sa Kahadean na Pebrero 2005, p. 6.
◼ Mga Restawran: Tawan nin onra an ngaran ni Jehova paagi sa saindong marahay na paggawe sa mga restawran. Sa nagkapirang lugar, pinagkatodan na an pagtao nin 10 porsientong tip, depende sa serbisyo.
◼ Mga Badge Card: Gamiton tabi an saindong badge card mantang nasa kombension asin kun nagbibiahe pasiring asin hale sa lugar kan kombension. An mga badge card makukua sana sa saindong kongregasyon. Dai na maghalat nin ultimo ora tanganing kumua nin badge card para sa saimo asin sa saimong pamilya.
◼ Bautismo: An mga kandidato sa bautismo maninigong tumukaw na sa designadong mga tukawan bago magpoon an programa sa Sabadong aga kan kombension. An lambang saro maninigong magdara nin mabining gubing na pambasa asin tuwalya. Tanganing masierto na an gubing kan mga binabautismohan angay para sa okasyon, maninigong tokaron ini sa sainda kan kamagurangan na marepaso sa sainda kan mga hapot sa librong Organisado.