Magdanay na Nag-aantisipar ki Jehova

1. Ano an tema kan kombension, asin taano ta napapanahon iyan?

¹ “Si Jehova Dios nin paghokom,” an isinurat ni Isaias. “Maogma an gabos na nagdadanay na nag-aantisipar sa saiya.” (Isa. 30:18b) Dakol an pagkasaysay sa Biblia manongod sa paghokom nin Dios sa saiyang mga kaiwal asin pagliligtas sa saiyang maimbod na mga lingkod. Anong mga leksion an itinotokdo kan siring na mga pagkasaysay sa mga parasamba ki Jehova ngonyan? Ano an magigibo niato ngonyan tanganing mag-andam para sa “dakula asin makangingirhat na aldaw ni Jehova”? (Joel 2:31, 32) An satong nagdadangadang na “Harani Na an Kaligtasan!” na Pandistritong Kombension magpapahiro sa sato na pensaron an mga hapot na iyan asin gumibo nin pagsiyasat sa sadiri. Makakatabang iyan sa sato na magdanay na nag-aantisipar ki Jehova.

2. Paano niato ikakapaheling an pag-apresyar para sa satong pandistritong kombension?

² Nakagibo na daw kamo nin mga areglo tanganing makinabang sa gabos na tolong aldaw kan kombension? Halimbawa, kinaolay na daw nindo an saindong among manongod sa paghagad nindo nin bakasyon tanganing makaatender? Dai magsaboot na bahala na. Ipamibi an bagay na iyan. Dangan hagadon nindo iyan. (Neh. 2:4, 5) Kaagid kaiyan, dai niato maninigong idigson an pag-areglar sa mga plano para sa transportasyon, dadagosan, asin iba pang mahahalagang bagay. An siring na marahay na pagplano nagpapabanaag kan satong hararom na pag-apresyar para sa programa ni Jehova nin espirituwal na pagpakakan. Maninigong magin listo an kamagurangan na tabangan an mga nangangaipo nin asistensia sa saindang mga areglo sa kombension, nangorogna an mga mas may edad na sa kongregasyon.—⁠Gal. 6:10.

3. Anong mga kualidad an maninigong ipaheling kan banwaan ni Jehova sa lugar nin kombension?

³ An Marahay na Paggawe Nagtatao nin Onra sa Dios: Kun kita nagkakaigwa nin darakulang pagtiripon sa mga kombension, an satong marahay na paggawe nagseserbing patotoo sa komunidad. Ano an hinahagad kaini sa sato? Kun kita nasa mga restawran asin iba pang lugar nin negosyo sa lugar nin kombension, an mga nakakaibaiba niato maninigong mare­preskohan kan satong Kristianong mga kualidad, siring kan pakatios, kahoyoan, pagpupugol sa sadiri, asin pagkarasonable. (Gal. 5:22, 23; Fil. 4:5) An gabos sa sato maninigong magpabanaag kan klase nin pagkamoot na “dai minagawe nin bakong disente, dai naghahanap kan saiyang sadiring kapakanan, dai napapaanggot.” Dawa kun maglataw an mga problema o kadepisilan, gugustohon niato na “gibohon an gabos na bagay sa ikakamuraway nin Dios.”—⁠1 Cor. 10:31; 13:5.

4. Paano matatabangan kan mga magurang an saindang mga aki na gumawe sa paagi na magtatao nin kaomawan ki Jehova?

⁴ Pakatapos nin sarong kombension, an sarong manedyer nin hotel napahanga na marhay sa gawe-gawe asin itsura kan satong mga hoben kaya ipinahayag nia an saiyang kamawotan na “pirmeng magin mga bisita sa saiyang hotel an mga Saksi ni Jehova.” Saro nanggad ining dahelan nin paggayagaya! Ini sarong kredito sa pagsasanay asin pagdirehir na ginibo nindo mga magurang. Bakong madonong para sa mga magurang na togotan an saindang mga aki na magdanay sa sarong kuarto nin hotel na mayo nin pagdirehir. An mga aki maninigong pirmeng direhiran nin tama. (Tal. 29:15) Logod na an saindang marahay na paggawe magtao nin kaomawan ki Jehova asin magpagayagaya sa saiyang puso!—⁠Tal. 27:11.

5. Paano niato matatawan nin onra si Jehova paagi sa satong paggubing asin pag-alinyar?

⁵ Mabining Paggubing Asin Pag-alinyar: An lambang saro sa sato makakakontribwir sa pangkagabsan na impresyon sa kombension paagi sa paglikay sa mga estilo nin gubing asin pag-alinyar na sunod na marhay sa moda, sobra, bakong mabini, o grabe kaimpormal. Ini minaaplikar kun nagbibiahe pasiring asin hale sa lugar nin kombension, mantang nagtatabang sa pag-andam kan lugar nin kombension, asin mantang nag-aatender kan mga sesyon. Bilang mga lingkod nin Dios, an pinakaimportante sa sato iyo an ngaran asin reputasyon ni Jehova, bakong an satong personal na mga gusto o kaginhawahan. May paninimbagan an mga payo nin pamilya na seguradohon na an itsura kan mga miembro kan saindang pamilya nagpapabanaag nin kabinian asin toltol na isip sa gabos na panahon.—⁠1 Tim. 2:9.

6. Taano ta maninigo niatong papagdanayon an may dignidad na itsura sa panahon nin paglilibang kapareho kan satong ipinapaheling sa panahon nin mga sesyon kan kombension?

⁶ Siring man, mahalaga na papagdanayon an may dignidad na itsura sa panahon nin paglilibang sa mga pamakalan asin restawran. Angay na an pangkombension na gubing an sulot niato kun kita makakan sa luwas pakatapos kan mga sesyon. An pagsulot kan satong pangkombension na badge card nagbubukas nin mga oportunidad para sa sato na magpatotoo nin impormal.—⁠2 Cor. 6:3, 4.

7. Paano kita makakakontribwir sa pagigin areglado asin kagayagayahan kan kombension? (Helingon an “Mga Pagirumdom sa Pandistritong Kombension.”)

⁷ Si Isaias naghula: “Si Jehova magdadanay na nag-aantisipar na pahelingan kamo nin pabor, asin kun siring sia matindog sa pagpaheling sa saindo nin pagkaherak.” (Isa. 30:18a) An pagpasalamat huli sa pagkaherak asin dai na kutana maninigong kabootan ni Jehova maninigong magpahiro sa sato na tawan sia nin onra paagi sa satong paggawe asin itsura mantang kita nagtitiripon sa satong mga kombension. Logod na an “Harani Na an Kaligtasan!” na Pandistritong Kombension magpamuraway sa satong Dios asin magtabang sa sato na magdanay na nag-aantisipar sa saiya!

[Kahon sa pahina 5]

Mga Pagirumdom sa Pandistritong Kombension

◼ Mga Oras kan Programa: An programa mapoon alas 8:30 nin aga sa gabos na tolong aldaw. Nagkapirang minuto bago magpoon an sesyon, matukaw na an tsirman sa plataporma mientras na pinapatugtog an pambukas na musikang pang-Kahadean. Kita gabos maninigo nang tumukaw sa panahon na iyan tanganing makapoon an programa sa paagi na may dignidad. An programa matatapos alas 4:15 nin hapon sa Biernes, alas 4:05 nin hapon sa Sabado, asin alas 4:10 nin hapon sa Domingo.

◼ Pagparada: Sa gabos na lugar kan kombension hihingoahon niamong gumibo nin mga areglo para sa paradahan. An gabos na may lunadan maninigong sunodon an mga instruksion kan mga attendant sa paradahan tanganing magin mas pasil sa iba an mga bagay-bagay. Mantang sa parate limitado an paradahan sa satong mga assembly hall, maninigong mag-areglo nin kagrupo na makakaiba sa lunadan sagkod sa mapupuede imbes na may saro o duwa sanang tawo an kada lunadan.

◼ Pagreserba nin Tukawan: Puedeng magreserba nin mga tukawan para sana sa mga kaiba nindo sa lunadan o kaibanan nindo sa harong.

◼ Pangudtohan: Magdara tabi nin pangudtohan imbes na humale sa lugar kan kombension durante kan pahingalo sa udto tanganing bumakal nin pagkakan sa sarong restawran o sa mga paratinda sa kalye. Puedeng gumamit nin sadit na cooler na puedeng ibugtak sa irarom kan tukawan. Dai itinotogot sa pasilidad kan kombension an darakulang picnic cooler, mga lalagan na napapasa, asin mga inomon na de alkohol.

◼ Mga Donasyon: Darudakulang gastos an kalabot sa pag-areglar nin pandistritong kombension. Ikakapaheling niato an satong pag-apresyar paagi sa boluntaryong pagdonar sa satong Kingdom Hall o sa kombension para sa pambilog na kinaban na gibohon. An ano man na tsekeng idodonar sa kombension maninigong bayadan sa “Watch Tower.”

◼ Mga Aksidente Asin Emerhensia: Kun may mangyaring medikal na emerhensia sa lugar kan kombension, kontakon tabi an sarong kaharaning attendant, na iyo an tolos-tolos na mapaisi sa Departamento nin First Aid tanganing matantsar kan satong kualipikadong mga tawohan sa first aid an pagigin seryoso kan situwasyon asin makatao nin tabang.

◼ Rekording: An ano man na klaseng record­er dai maninigong ikonektar sa sound system o sa elektrisidad kan pasilidad asin puede sanang gamiton sa paagi na dai makakaistorbo sa iba.

◼ Pagretrato: Kun maretrato kamo durante kan mga sesyon, dai tabi maggamit nin flash.

◼ Mga Pager Asin Cell Phone: Maninigong iprograma an mga ini sa paagi na dai makakadisturbo.

◼ Mga Pormang Follow-Up: Maninigong gamiton an pormang Please Follow Up ­(S-43) tanganing itao an impormasyon mapadapit sa siisay man na nagpapaheling nin interes bilang resulta nin impormal na pagpapatotoo durante kan kombension. Maninigong magdara an mga parahayag nin saro o duwang porma nin follow-up sa kombension. Puedeng itao an nallenaran na mga porma sa Book Room para sa pag-asikaso o sa saindong sekretaryo kan kongregasyon pagbalik nindo sa saindong kongregasyon.—⁠Helingon an Pebrero 2005 na An Satong Ministeryo sa Kahadean, p. 6.

◼ Mga Badge Card: Gamiton tabi an badge card sa gabos na panahon mantang nasa kombension asin mantang nagbibiahe pasiring asin hale duman. Puede ining kuanon paagi sa saindong kongregasyon. Dai na maghalat na humagad nin mga card para saindo asin sa saindong pamilya sagkod na pira na sanang aldaw bago an kombension.

◼ Bautismo: An mga kandidato sa bautismo maninigong tumukaw na sa designadong mga tukawan bago magpoon an programa sa Sabadong aga. An lambang saro maninigong magdara nin mabining gubing na pambasa asin sarong tuwalya. Tangani na masegurado na angay an gubing ninda para sa okasyon, an kamagurangan na marepaso sa mga kandidato sa bautismo kan mga hapot sa librong Organisado maninigong iiba ini sa saindang pag-orolay.