‘Tiripunon Mo an Banwaan’
1. Ano an mga pagkakaagid kan pangrehiyon na mga kumbensiyon asin kan importanteng marhay na pagtiripon kan mga Israelita dai nahaloy pakahali ninda sa Ehipto?
1 Dai nahaloy pakahali sa Ehipto, sinabihan ni Jehova si Moises na ‘tiripunon an banwaan’ sa Bukid nin Sinai para madangog an Saiyang mga sasabihon tanganing matakot sinda sa Saiya asin matukduan an saindang mga aki. (Deut. 4:10-13, NW) Sa masunod na mga bulan, matiripon an mga lingkod ni Jehova sa pangrehiyon na mga kumbensiyon para matukduan ni Jehova. Paano kita lubos na makikinabang?
2. Ano an kaipuhan tang gibuhon para magin andam sa satong kumbensiyon?
2 Magin Andam: Pinagbutan ni Jehova an mga Israelita kaidto na ‘mag-andam’ para sa makasaysayan na pagtiripon sa Bukid nin Sinai. (Ex. 19:10, 11) Kaipuhan man na mag-andam an gabos na maatender sa kumbensiyon. Halimbawa, kaipuhan kan dakul na magbakasyon sa trabaho. Tibaad an sitwasyon mo kapareho kan ki Nehemias. Gusto niyang magpaaram nguna ki Hading Artajerjes bilang kopero kaini para magpa-Jerusalem, pero aram niya na puwedeng dai siya tugutan. Namibi siya, dangan may kusog nin buot na sinabi an kahagadan niya. Tinugutan siya kan hadi asin nagtao pa ngani ini nin suporta sa saiyang pagbiyahe! (Neh. 2:1-9) Dugang pa, igwa ka na daw nin malulunadan asin madadagusan? Magplano para makaabot nin amay sa kada sesyon, asin magin andam na “magtao nin urog kisa dating atensiyon” sa mga madadangog mo.—Heb. 2:1, NW.
3. Ano an makakatabang sa sato na andamon an satong puso para sa programa?
3 Mahalaga man na andamon ta an satong puso, tanganing maghinanyog asin makanuod. (Esd. 7:10) An programa kan kumbensiyon patiinot na mahihiling sa Web site na jw.org, pati na an tema kan gabos na pahayag na may kaibang saro o duwang panginot na teksto kaiyan. Marahay na pag-ulayan ini sa Pampamilyang Pagsamba sa mga semana bago an satong kumbensiyon. May mga parahayag na nagpi-print kan programa para suratan nin halipot na mga nota durante kan kumbensiyon.
4. Paano magagamit kan mga magurang an kumbensiyon para matukduan an saindang mga aki?
4 ‘Tukduan an Saindong mga Aki’: An saro sa sinambit na katuyuhan kan pagtiripon kan mga Israelita duman sa Bukid nin Sinai iyo na tanganing “matukduan ninda an saindang mga aking lalaki.” (Deut. 4:10, NW) An kumbensiyon sarong marahayon na pagkakataon para magibo man iyan kan mga magurang ngunyan. Durante kan mga sesyon, maninigo na kataid ninda an saindang mga aki asin tinatabangan na maghinanyog. Pagkatapos kan sesyon kada aldaw asin sa panahon nin pampamilyang pagsamba, puwedeng iribang pag-ulayan kan pamilya an programa.
5. Paano kita makikinabang sa pag-atender sa maabot na pangrehiyon na kumbensiyon?
5 Sa tulong aldaw na kumbensiyon, garo kita nakaluwas sa maraot na kinaban ni Satanas asin nakakamati nin espirituwal na kaginhawahan saka napapakusog sa pakikiasosyar sa laog kan satong espirituwal na paraiso. (Isa. 35:7-9) Mantang nagdadangadang an aldaw ni Jehova, lugod na dai ta pagpabayaan an pagtiripon na arog kaini tanganing magpakinurusog-kusugan!—Heb. 10:24, 25.