“Manarig ki Jehova” na Pandistritong Kombension sa 1987
1 An tema kan kombension sa 1987 tunay na naglaladawan sa mga saboot nin mga Saksi ni Jehova! An “Manarig ki Jehova” bako sanang tema para sa sato; iyan nagpaparisa kan satong mga paniniwala sa kairairaromi kan satong boot. An dakol na tawo sa kinaban nagsasarig sa kadonongan nin tawo; may kamangmangan na sinda nagkokompiar sa saindang sadiri. (Sal. 49:6, 7, 10; Tal. 18:11) Kabaliktaran, kita nagsasarig ki Jehova, an Supremong Saro sa uniberso, na otobon an saiyang mga panuga sa makinuyog na katawohan. Kombensido kita na itatao nia an gabos niatong pangangaipo asin iingatan kita na dai maano kun matapos na an palakaw ni Satanas. Dai daw kamo maoyon na an “Manarig ki Jehova” angay nanggad na tema para sa satong serye nin mga kombension sa 1987? Ikapaheheling niato na inaapresyar niato an espirituwal na probisyon na ini paagi sa pag-atender sa bilog na tolong aldaw na kombension.
2 Mantang an kombension sa 1987 tolong aldaw imbes na apat, an kada aldaw magkakaigwa nin panong iskedyul. An programa may kaibang mga pahayag, demonstrasyon, asin drama. Dai nin areglo para sa paglilingkod sa langtad sa kombension sa taon na ini.
3 Huling tolong aldaw an kombension, tibaad mas pasil para sa gabos an pag-atender. Nakiolay na daw kamo sa saindong among, kun kaipuhan, sa paghagad nin bakasyon tanganing makaatender kamo sa bilog na tolong aldaw? An bilog na programa, poon sa pambukas na musika sa enot na aldaw sa alas 9:10 n.a. sagkod sa pantapos na pamibi sa ikatolong aldaw sa mga alas 4:00 n.h., pano nin mayaman na praktikal na espirituwal na pagtotokdo asin pagpakosog na dai niato puwedeng palihison.
4 AN PROGRAMA: An kada aldaw magkakaigwa nin sadiring Makakasuratan na tema na konektado sa pankagabsan na tema na “Manarig ki Jehova.” May itataong impormasyon manongod sa pagpapayunir, pagpalakop kan maogmang bareta sa gabos na oportunidad, mga aki asin hobenes, asin maimbod na pagpasakop ki Jehova. Sa ikaduwang aldaw itatampok an halaga nin maigot na pag-adal asin nin satong paghihingoa sa ministeryo sa langtad. Siring man, an kamagurangan tatabangan paagi sa napapanahon na hatol.
5 BAUTISMO: An pahayag sa bautismo sa ikaduwang aldaw sa oras na alas 10:50 n.a. Mapakokosog kita na madangog an pahayag sa bautismo asin maheling an mga kandidato na ginigibo an saindang kapahayagan sa publiko na ngonyan sinda man lubos nang nagsasarig ki Jehova. Minsan ngani an pahayag sinadya espesyalmente para sa mga magpapabautismo, kita gabos puwedeng makinabang paagi sa maingat na paghinanyog asin paghorophorop sa satong relasyon ki Jehova, minsan pa gurano na kita kahaloy sa katotoohan.
6 An mga nagpaplanong magpabautismo sa saro sa mga pandistritong kombension maninigong siertohon na paaramon an nangengenot na paraataman bago pa an kombension tanganing magkaigwa nin igong panahon na repasohon an mga hapot sa librong Our Ministry. An Hunyo 1, 1985, Watchtower, pahina 30, (Disyembre 1, 1985 sa Tagalog) nagtao kan hatol na ini manongod sa tamang gubing kan mga magpapabautismo: “Tunay na maninigong may kabinian an klase nin bathing suit na gagamiton. Ini mahalaga ngonyan na an mga paradisenyo nin moda garo baga gustong ipagpasikat an seksuwalidad asin magibo an haros lubos na kahubaan. An saro pang bagay na dapat na konsideraron iyo na an ibang suit na garo baga mabini kun mara bako na kun basa. Mayo nin siisay man na nagpapabautismo na magugustong magin dahelan nin pagkaistorbo o pagkasingkog sa sarong okasyon na arog kaseryoso sa bautismo.” (Fil. 1:10) Ini aplikado sa mga tugang na lalaki saka babae.
7 An mga kandidato sa bautismo maninigong maghingoa na yaon na sa saindang tukawan sa itinagamang lugar bago pumoon an programa sa ikaduwang aldaw. Pagkatapos kan pahayag sa bautismo hahagadon saindo na tumindog sa pag-awit kan pantapos na awit. Pakaawita kan ikatolong berso, gigiyahan kan mga attendant an mga kandidato sa bautismo sa lugar nin pagbautismo o sa mga lunadan na magdadara sa sainda duman.
8 TINOKDOAN NI JEHOVA: Ihinula: “Asin an saimo gabos na aki magigin mga tawo na tinokdoan ni Jehova, asin magsosopay an katoninongan kan saimong mga aki.” (Isa. 54:13) An mga tataramon na iyan isinabi sa simbolikong agom ni Jehova, an saiyang langitnon na organisasyon. An mga “aki” kaini totokdoan na manarig ki Jehova. An pandistritong kombension saro sa mga paagi na ginagamit ni Jehova sa pagtotokdo sa sato ngonyan. Iyan daw an pagheling nindo dian? Tibaad listo kamong sumimbag, ‘Siyempre iyo.’ Alagad mantang yaon sa kombension, ginigibo daw nindo an gabos na mapupuwede tanganing masabotan an bilog na programa? Malinaw na para sa nagkapira bako ini an perming nangyayari. Ano daw an magigibo niato, bilang indibiduwal asin bilang pamilya, tanganing maseguro na makua niato an pinakadakulang pakinabang sa programa kan kombension?
9 Tibaad kaipuhan na kita maghingoa asin gumasto nin dakula tanganing makaatender sa kombension. Dugang pa, an Sosyedad asin an mga tugang sa mga lugar kan kombension nagtrabaho nin dakol na oras tanganing matawan kita kan pinakamarahay na pasilidad na mahihimo. Idugang digdi an rinibong oras na inubos kan Sosyedad asin kan mga espiker sa pag-andam kan programa, asin maliwanag na dakol kitang dapat na pasalamatan. An saindo daw na pag-apresyar mapahiro saindo na kuanon an pinakadakulang pakinabang sa bilog na kombension?
10 Mahalaga na magkaigwa nin bastanteng pahingalo barobanggi. Gusto niatong umabot sa kombension na mata an isip asin galagang dangogon an kada minuto kan programa. Kun maabot kamong pagal na, dai kamo mapapasilan na magdanay na mata asin atento, asin maiinaan na gayo an saindong abilidad na lubos na makinabang sa programa. Kaya, an pagduman sa kombension na nakapahingalo nin igo aroaldaw may dakulang ikakokontribuwir sa satong pag-ogma sa espirituwal na kapiyestahan.
11 Matatabangan kitang magkonsentrar kun ipagigirumdom niato sa satong sadiri kun taano kita ta nagduman sa kombension—tanganing ‘maghinanyog asin mag-ako nin dagdag na pakanood.’ (Tal. 1:5) Arog kan nasusurat sa Isaias 55:1, inagda ni Jehova an saiyang banwaan na makikabtang sa nagtataong-buhay na mga probisyon na iinoopresir nia nin daing bayad. Alagad tanganing maaprobetsaran iyan, kaipuhan sindang “maghinanyog nin odok.” Idinugang nia an sadol na ini: “Kilingan an saindong talinga asin dolok kamo sa sako. Paghinanyog kamo, asin an saindong kalag magdadanay na buhay.” (Isa. 55:2, 3) Kaagid kaini, maaako daw niato an matinaong alok ni Jehova na nakasusustenir sa buhay na espirituwal na kakanon sa modernong espirituwal na paraiso kun kita nagtutungka tanganing masabotan an sinasabi kan mga espiker? Malinaw na gusto niatong ipaheling an satong pag-apresyar paagi sa paggibo kan gabos niatong makakaya na magin andam sa mental asin pisikal tanganing dai mapalihis an arin man sa programa.
12 An sarong maogmang kabtang nin mga pandistritong kombension na gustong-gusto niato iyo an pakikiasosyar sa satong mga tugang. Hinahalathalat niato an maheling giraray an mga dating amigo, may mga bagong makamidbid, asin pag-inestoryahan nin mga eksperyensia. An iba nag-aareglo na songkoon an pamilya asin mga katood pagkatapos kan sesyon kan aldaw. An mga pag-iriba-iba liwat na ini puwedeng magin maogmahon asin nakapakokosog sa espirituwal. Alagad tabi siertohon na an siring na mga pagsongko dai magpadagos sagkod sa matangang banggi na dai na kamo makakua kan kinakaipuhan na pahingalo.
13 PAGKUA NIN NOTA: Apuwera sa saindong Biblia asin songbook, dai paglingawan na magdara nin susuratan asin nin pansurat. Tibaad dai niato nagin ugale an pagkua nin nota sa mga pagtiripon kan kongregasyon huli ta an kadaklan na pahayag kinua sa materyal na mababasa kan gabos sa kongregasyon. Laen man an pag-ako nin impormasyon sa pandistritong kombension. Minsan ngani an ibang pahayag pag-abot nin panahon maluwas sa mga publikasyon, an iba dai. Dawa kun an gabos na pahayag iimprentahon sa huri, igwa pa man giraray nin darakulang pakinabang kun kamo makua nin halipot, makahulogan na mga nota.
14 An pagkua nin nota nagseserbing pantabang sa pagkonsentrar. Kapot an saindong panurat asin susuratan, ilaen an pangenot na mga punto kan espiker asin an pangenot na mga teksto o bagong ideya na tibaad iatubang. Dangan isurat ini sa halipot. Parate na an saro o duwang sentence igo na para sa sarong pangenot na punto. Paagi sa pagsunod sa suhestion na ini, sierto na maoswag an saindong pagkonsentrar. Mas kadikit an posibilidad na pabayaan nindo an saindong isip na magbiyahe o maistorbo nin ano man na aktibidad sa palibot nindo. Masasangkapan man kamo na magpartisipar sa pagrepaso kan mga tampok na kabtang kan kombension kaiba an saindong kongregasyon sa masunod na semana.
15 May kaiba daw kamong mga aki o tin-edyer? Kun siring taano ta dai iareglo na sinda kumua man nin nota oyon sa saindang abilidad asin edad? Ipaaram sa pamilya na plano nindong repasohon an pirang pangenot na punto na pinalataw kan mga espiker pagpuli nindo sa saindong dadagusan o sa saindong pagbiyahe papuli. An saradit pang aki puwedeng dagkahon na isurat an gabos na tekstong binasa o risahon kun pirang beses nindang nadangog na isabi kan espiker an pangenot na mga tataramon o an tema kan saiyang pahayag. Sa paggibo kaini, mas dakula an makukua ninda sa mga pahayag. Marahay na an mga aki makanood na mag-atento sa Kristianong mga pagtiripon. Tinatabangan nindo sinda na magtogdok nin marigon na pundasyon para sa ngapit.—1 Tim. 6:19.
16 GAWE NA DAING KATATSARAN: Taon-taon pagkatapos kan satong mga pandistritong kombension, parate kitang nakareresibi nin marahay na mga komento manongod sa pagkaareglado asin marahay na gaweng naheling. An mga nagmamasid parateng nagkokomento manongod sa malinig na itsura pareho nin mga may edad na asin nin mga aki. An taon 1986 dai napalaen. Alagad taano ta nasasambitan niato ini? Huli ta nakapakokosog na maaraman na, kun kita nagtatao nin marahay na halimbawa, iyan namamasdan asin inaapresyar nin iba. (1 Cor. 4:9) Alagad, mas mahalaga, iyan nagtatao nin kaomawan sa Dios. Boot niatong tawan nin onra si Jehova sa tataramon asin gibo, asin mantang an mga tawo puwedeng husgaran an organisasyon basado sa satong gawe, boot niatong risahon an satong iginagawe.
17 An manedyer nin sarong motel nagsurat: “An gabos nindong delegado makiamigo nanggad asin magalang, asin kami gabos naogma na makaibanan sinda.” An sarong opisyal sa gobyerno na nag-iistar harani sa sarong istadyum na ginagamit nin mga Saksi ni Jehova nagsabi: “Bilang kataed masasabi ko na nagtutubod ako sa saindong asosasyon, sa paagi nin saindong paglinig sa istadyum. . . . Nagtutubod ako sa saindong disiplina.” An sarong pulis nagsabi: “Kamo talagang sararo asin maogma. Mayo nin problema sa katoninongan asin areglo kun yaon kamo digdi. An gabos toninong asin disiplinado.” An gabos tama an gawe. Kun kaiba ka ninda [kan mga Saksi ni Jehova] mayo ka nin dapat na ikahadit. Sinda talagang banal na mga parapatoninong. An kaisipan na ini mayo sa ibang grupo nin mga tawo
18 Alagad igwa pa nin nagkapirang bagay na kaipuhan na tawan niato nin atension tangani na kita lubos na magliwanag siring sa mga ilaw,’ nangorogna kun kita mayo sa lugar kan kombension. (Fil. 2:15) Alagad enot, kumusta an ginigibo niato sa pagerserba nin mga tukawan na dai man kaipuhan?
19 Narisa an pag-oswag sa bagay na ini, asin huli kaini tinatawan mi kamo nin komendasyon. Minsan siring, tabi girumdomon na AN MGA TUKAWAN PUWEDENG IRESERBA SANA PARA SA SAINDONG PAMILYA ASIN SA SIISAY MAN NA TIBAAD KAIBA NINDO SA PAGBIYAHE. Natural sana an magmawot na makataed an mga kaiba niato, asin linalaoman na an magpapamilya matukaw nin taraed. Alagad tabi dai magreserba nin tukawan para sa iba. Parate na an mga katood nagsasadiring maghanap nin tukawan, asin an mga ekstrang tukawan na irinereserba dai nagagamit. An pagsarig ki Jehova ikakapaheling paagi sa pagkuyog niato sa mga pagboot na ini.
20 Maninigo kitang gumawe sa marahay na paagi SA GABOS NA ORAS. An iba nagbabareta na may mga tugang na naghale sa kombension bago matapos an programa tanganing maenot sa pagsakay papuli. Ini makaiistorbo sa mga gustong magdangog sa bilog na programa. An iba man nag-aapretang magpuli tanganing makapag-aling-aling sa kinabanon na paagi. Ini nagdodoon kan pangangaipo na papagdanayon an gawe na daing katatsaran sa gabos na oras.—1 Ped. 2:12.
21 Pagkatapos kan programa sa kombension, an dakol naoogmang magtiripontipon para sa pagkakan asin asosasyon. Kun an oras ginagamit nin madonong, ini puwedeng makapakosog sa espirituwal mantang kita nagriribayan nin mga eksperyensia asin rinirepaso an mga tampok na kabtang kan kombension. An paggibo kaini dai matao nin dahelan sa pagreklamo, ta kita minagawe “sa paagi na angay sa maogmang bareta.”—Fil. 1:27.
22 Sa kombension mismo, itorohok niato an satong isip sa espirituwal na mga bagay. An iba kan mga nakaagi ginamit an kombension para sa materyal na pakinabang, na naggigibo nin mga bagay na ipababakal sa kombension. Boot ming ipagirumdom liwat sa gabos na dai totogotan an pagpabakal nin personal na mga bagay sa laog kan lugar kan kombension, asin mga bagay sana kan Sosyedad an totogotan sa bookroom o ibang departamento kan kombension.
23 Girumdomon man na an refreshment sirrado sa oras kan sesyon, kaya kaipuhan na kuanon na an kaipuhan nindo sa pag-oltanan nin mga sesyon tanganing dai nin istorbo sa oras kan programa.
24 Narisa sa nagkapirang kombension na, pagkahale kan mga nag-atender, kadakol na kapidasong papel, patos nin dulse, asin mga lalagan, na nawalat sa mga tukawan. Magwawarak daw kita nin siring na mga bagay sa satong Kingdom Hall? Kun siring bako daw na maninigo kitang magin malinig asin areglado, na pinupurot an satong basura asin iinaapon iyan sa tamang lalagan o ipuli iyan tanganing duman iapon? An mga magurang sinasadol na tokdoan nin tama an saindang mga aki na likayan an pag-apon nin ati sa istadyum o hall.
25 An ultimong maboot na pagirumdom may koneksion sa pag-orolay-olay sa oras kan mga sesyon. Kun nagpoon na an programa asin nagtutukaw na kamo alagad ta naheling nindo an sarong tugang na haloy na nindong dai naheling, ano an gigibohon nindo? Matindog daw kamo, mapaypay, asin aapodon an tugang, o kamo daw daing girong na magdadanay sa saindong tukawan asin hihingohaon na hanapon sia pagkatapos? Kun kaipuhan kamong humale sa saindong tukawan tanganing magduman sa kasilyas o darahon duman an saindong mga aki, an mamomoton na gibohon bumalik sa saindong tukawan sa pinakamadaling panahon na mapupuwede na dai na nakikipag-estoryahan sa iba sa pasilyo. Ipinagirumdom sato kaidto na an pag-atender sa kombension maninigo na dai nin kalaenan sa pag-atender sa satong lokal na Kingdom Hall.
26 MGA PANGANGAIPO SA PAGKAKAN: An mga probisyon para sa kakanon asin inomon kapareho kan yaon sa pandistritong mga kombension sa nakaaagi pa sanang mga taon. Magkakaigwa nin mga tiket sa kombension. Ngonyan na taon an kada tiket sa kombension may kantidad na ₱10.00, na binangabanga sa 25 sentimos. Mababakal nindo ini sa mga kahero poon sa enot na aldaw kan kombension.
27 PAGBOBOLUNTARYO: Minsan ngani mas kadikit na boluntaryo an kaipuhan ngonyan na magtrabaho huli sa paggibong simple sa mga prosedimiento sa kombension, kaipuhan pa man giraray an tabang nin mga boluntaryo para sa marahay na dalagan kan kombension. Puwede daw kamong makikabtang? An nagkokoordinar kan kombension sa saindong kongregasyon makareresibi nin impormasyon na ilinilista an mga departamento na nagkakaipo nin tabang, asin ipaaaram nia ini sa kongregasyon. Puwede kamong magboluntaryo paagi sa saiya. An mga aki na mayo pang 16 anyos an edad na magtatrabaho kaipuhan na perming may kaibang magurang o saro pang nasa edad na.
28 Kakaipuhanon an mga boluntaryo sa mismong panahon na kan kombension. Maghapot sa Volunteer Service Department pag-abot tolos nindo sa kombension. Dawa kun makapagtrabaho kamo sa saro sanang kabtang kan kombension, pasasalamatan an saindong paglilingkod.
29 KONKLUSYON: Harani na an panahon kan kombension. Linalaom mi na maheling kamo gabos duman. An Pamilyang Bethel galagang hinahalat na makaibanan kamo sa laen-laen na kombension. Inorganisar ni Jehova sa teokratikong paagi an saiyang banwaan, asin aram nia kun ano an kaipuhan niato sa huring mga aldaw na ini. Paagi sa mga kombension, pinakokosog asin pinaririgon kita ni Jehova tanganing maimbod na makatagal sagkod sa katapusan. Dangan kita bebendisyonan nin buhay sa saiyang bagong palakaw. (Isa. 40:29; 41:10; 1 Juan 5:14) Ini garantisado sagkod na kita padagos na ‘nagsasarig ki Jehova.’
[Kahon sa pahina 6]
Mga Pagirumdom sa Pandistritong Kombension
DADAGUSAN: Mapadara kami nin mga pormang Room Request sa kada kongregasyon. An mga nagkakaipo nin dadagusan maninigong magllenar sa saro sa mga pormang ini asin itao iyan sa nagkokoordinar kan kombension sa saindong kongregasyon. Ririsahon nia iyan asin pipirmahan, dangan ipadadara sa Watch Tower Convention sa saro sa mga direksion na nasa ibaba.
MGA ORAS NIN PROGRAMA: Sarong kadonongan asin pagpaheling nin pag-apresyar na kita yaon na sa satong mga tukawan sa pagpopoon kan programa. Iyan sa oras na alas 9:10 n.a. sa enot na aldaw asin mga alas 9 n.a. sa ibang aldaw. Magplano na dai maghale sagkod na dai natatapos an mga sesyon. An pantapos na awit asin pamibi ala 5:35 n.h. sa enot na aldaw, ala 5:00 n.h. sa ikaduwang aldaw, asin alas 4:00 n.h. sa ultimong aldaw.
ESPESYAL NA MGA MITING: May gigibohon na pakipagmiting sa gabos na regular asin espesyal payunir saka mga nagbibiyaheng paraataman sa alas 11:45 n.a. sa enot na aldaw, mantang an pakipagmiting sa gabos na kamagurangan gigibohon sa alas 11:45 n.a. sa ikaduwang aldaw. An lugar kan mga miting na ini ipaiisi sa plataporma.
PIONEER IDENTIFICATION: An gabos na regular asin espesyal payunir saka nagbibiyaheng mga paraataman kaipuhan na darahon sa kombension an saindang Identification and Assignment card (S-202). An mga nasa lista poon kan Hulyo 1, 1987 o bago kan petsang iyan puwedeng umako nin halagang ₱50.00 na tiket sa kombension basta ipresentar an saindang ID card sa sarong kombension na iyan sana. Ingatan an card na garo kuwarta. Dai iyan masasalidahan sa kombension. An ano man na regalong publikasyon o iba pang literatura sa halaga sa payunir makukua nin mga payunir sa bookroom, basta ipaheling an saindang ID card.
LAPEL CARDS: An mga card na ini itinatagama bilang paagi na ikapaisi an kombension patin gibohon na pasil an pakamidbid sa satong mga tugang na nag-atender. Sa katuyohan na ini, tabi gamiton an lapel card sa kombension patin kun nagbibiyahe pasiring asin papuli hale sa kombension. Ini maninigo nindong kuanon paagi sa saindong kongregasyon ta iyan dai makukua sa mga kombension. An lapel card 15¢ an saro asin an celluloid holder ₱1.00 an saro. (Pasabot sa sekretaryo: An lapel card maninigong pedidohon sa Special Order Blank for Forms. Kun ini dai nagibo, magpadara na ngonyan kan regular na S-14 na pedido para kaini.)
PATANID: Saen man kamo umatender, bantayan an saindong mga dara-dara sa gabos na oras. Kun kamo may kotse, seguradohon na iyan barat asin dai magwalat nin ano man na mahalaga sa napaparadang kotse. Saro pa, mag-ingat kamo sa mga parahabon asin mandurukot na perming yaon sa darakulang katiriponan. Kabale digdi an dai pagwalat nin ano man na may halaga sa mga tukawan sa kombension na mayo nin nagbabantay.