“Mga Paradara nin Liwanag” na Pandistritong Kombension sa 1992
1 Sinabi ni Jesus na an saiyang mga parasunod magigin “ilaw kan kinaban.” (Mat. 5:14) Sa kabaliktaran, an espirituwal asin moral na kadikloman kan kinaban orog na naggagrabe sa kada aldaw na minaagi. (Isa. 60:2; Roma 1:21) An satong paninimbagan bilang mga paradara nin liwanag nagkakaigwa nin mas dakulang kahulogan mantang kita nagdadangadang sa katapusan kan palakaw na ini. Sa pagmidbid sa satong mahalagang kabtang, may galagang paghalat na satuyang tinatanaw an pag-atender sa “Mga Paradara nin Liwanag” na Pandistritong Kombension sa 1992. Mapoon an enot sa mga seryeng ini sa Biyernes, Disyembre 18.
2 Tolong Aldaw na Kombension: Ngonyan na taon nagplano kami nin 37 gabos na kombension sa Pilipinas. Mapoon an programa alas 8:40 n.a. sa Biyernes asin tatapuson nin awit asin pamibi poko mas o menus alas 4:15 n.h. sa Domingo. Bobooton kan gabos sa banwaan ni Jehova na umatender sa bilog na programa. Guminibo na daw kamo nin personal na desisyon na magin presente sa bilog na tolong aldaw? Siertohon na mamibi para sa bendisyon ni Jehova sa saindong mga pagmamaigot.
3 Poon sa pambukas na pahayag sa Biyernes nin aga sagkod sa pantapos na mga komento sa Domingong hapon, maninigong tawan niato nin lubos na atension an bilog na programa. Gigibohon asin itatao an nakapupukaw na impormasyon paagi sa mga pahayag, demonstrasyon, interbio, asin sarong drama. Iplano na nasa tukawan na bago pa magpoon an programa sa Biyernes. Sa parate, sa enot na aldaw mas dakol an panahon na kaipuhan tanganing magparada nin sakayan, maghanap nin mga tukawan, asin iba pa. Kaya tawan nin bastanteng panahon an saindong sadiri. Paagi sa pagdangog sa gabos na sesyon asin pagdadanay para sa pantapos na awit asin pamibi, makakamtan niato an lubos na pakinabang kan programa asin ikapaheheling an satong apresasyon sa satong pribilehiyo na maglingkod bilang mga paradara nin liwanag.
4 Togotan an Saindong Talinga na Magin Atentibo: Ipinahayag kan salmista: “Sa saimong mga pagirumdom padagos akong nagpapaheling na atentibo. Kanigoan an sakong pagkamoot sa saimong pagboot! Sa bilog na aldaw iyan sakong pinaghohorophorop.” (Sal. 119:95b, 97) Sa gabos na panahon na kita nagtitiripon tanganing tokdoan ni Jehova, igwa nin pangangaipo na magtao nin atension asin maghinanyog bako sanang paagi sa satong mga talinga kundi paagi man sa satong puso. Pero nangorognang kaipuhan ini kun nag-aatender sa darakulang pagtiripon arog baga kan pandistritong kombension. Kadakol kan maheheling nin mga mata asin madadangog nin mga talinga. Magigin personal na kapierdihan nanggad kun guminamit kita nin panahon asin kuwarta tanganing umatender sa kombension dangan pagpuli sa harong kakadikit sana an nagigirumdoman na marahay na mga punto kun paano kita mag-ooswag bilang mga paradara nin liwanag! Kaipuhan na gibohon niato an pinakamarahay na makakaya tanganing malabanan an ano man na mga distorbo kun boot niatong lubos na makinabang sa programa. Paano niato masisierto na an impormasyon ikatatanom nin hararom sa satong puso asin isip sa katapusan kan programa sa kombension?
5 An paghinanyog sarong abilidad na maninigong kultibaron asin praktison. An tataramon na “maghinanyog” nangangahulogan na “magdangog na igwa nin mapaghorophorop na atension.” Konsideraron ining nagkapirang suhestion: (1) Gibohon an gabos na paghihingoa na makaabot sa lugar nin kombension kada aga na nakapahingalo nin marhay. Ini mangangaipo nin pagpaplano asin kooperasyon nin pamilya. Kun kamo nanluluya huli ta kulang nin torog o gutom huli ta dai namahaw, o kun nagkaigwa kamo nin tension huli sa paghihidale, kakadikit kan makukua nindo sa programa. (2) Antisiparon kun paano ipahahayag an tema. Mga pirang semana bago kan kombension, bilang kabtang kan saindong pampamilyang pag-adal, taano ta dai pakomentohon an kada miembro kun ano an kahulogan para saiya kan pagigin paradara nin liwanag. Mantang nasa kombension, helingon nin patienot an kada kabtang para sa aldaw na iyan bago pumoon an programa. (3) Magbulos nin angay, asin dai magparakakan asin magparainom durante kan mga sesyon. May nagkapirang naobserbaran sa istadyum na nagkakakan o nagpaparainom durante kan programa. Ini daing paggalang, nakaiistorbo sa iba, asin nagpapaheling nin kadaihan nin pagpopogol sa sadiri. Kaoyon kaiyan, an gabos na refreshment stand sisirrahan durante kan mga sesyon sa kombension.
6 Mawot niatong tawan nin espesyal na atension an bagay dapit sa pagkua nin nota. Kun ginigibo nin tama, makatatabang iyan saindo na masundan an mga espiker nin mas maingat asin magirumdoman an saindong nadangog. Mantang apat na doble an rikas kan satong isip kisa sa satong pagtaram, an pinakamarahay na paagi tanganing maolang an pagbiyahe kan isip iyo an pagkua nin nota. Arog kan sinabi nin sarong parasurat, “An pagdangog sa sarong pahayag sa parate mas depisil kisa sa pagpahayag.” Tibaad nagigirumdoman nindo na an enot na mga Kristiano midbid sa pagdara sa mga pagtiripon nin mga pidaso nin pasang kuron asin pagsurat nin mga kasuratan sa mga iyan paagi sa tinta. Salamat sana, puwede na sato an medyo darudakulang notebook asin pansurat o lapis. An pagigin eksperto sa pagkua nin nota nangangahulogan na pagsurat sana kan kinakaipuhan tanganing makua an pangenot na ideya pero bakong nin kadakol na permi na sana kitang nagsusurat. Ini magigin sarungat sa satong katuyohan asin magreresulta na malihisan an mahahalagang punto na sinabi kan espiker. Isurat an pangenot na mga tataramon, asin gumamit nin pinahalipot na mga tataramon. An saindong mga nota magagamit nindo nin mas epektibo kun rerepasohon nindo iyan sa banggi dangan otrohon bago an pag-orolay kan kongregasyon manongod sa mga itinampok sa programa sa Pagtiripon sa Paglilingkod.
7 Odok sa Boot na Awit Asin Pamibi: Mahahalagang kabtang kan satong pagsamba an pag-awit nin mga pag-omaw ki Jehova asin magalang na pagdolok saiya sa pamibi. (2 Cron. 30:21, 27) Ini mahahalagang kabtang kan kombension kun saen an gabos sa sato puwedeng makipartisipar. Sa laog kan tolong aldaw na satong “Mga Paradara nin Liwanag” na Pandistritong Kombension, aawiton niato an 18 awit nin pag-omaw ki Jehova asin magkakasararo sa walong pamibi sa satong langitnon na Ama. An mga ini tunay nanggad na daing katimbang sa halagang mga pribilehiyo. Tinatawan kita ni Jehova nin labi pa sa 12 oras na espirituwal na edukasyon asin pagsasanay. Durante kan pirang minutos na itinagama para sa awit asin pamibi, pinasasalamatan niato si Jehova para sa saiyang bukas-palad na mga regalo asin inoomaw sia. Mantang bilang nagkakatiripon na kadaklan na kita minadolok ki Jehova sa pamibi, boot daw niato na mansayon nia kita bilang paslo asin mga ingrato huli ta kita dai nakiiba sa awit asin pamibi huli sana sa maluyang pagpaplano? Kaya mayo nin siisay man na kaipuhan na humale bago matapos an sesyon tanganing luminya para sa pagkakan o kumua nin literatura na enot sa iba.—Mat. 7:12; Roma 12:10; Fil. 2:1-4.
8 Gibohon an Gabos na Bagay Para sa Ikamumuraway nin Dios: Kada taon tinatawan kita nin maboot na mga pagirumdom dapit sa kahalagahan nin marahay na mga ugale asin tamang paggawe sa kombension. An kadaklan maninigong komendaran huli sa maimbod na paghinanyog sa mga pagirumdom na ini. Mientras na nagdadangadang sa katapusan an palakaw na ini, orog kitang napupuwersa sa pakiiiba sa mga tawo sa trabaho asin sa eskuwelahan na an mga paggawe arog kan ihinula sa 2 Timoteo 3:1-5. An asosasyon na ini puwedeng magkaigwa nin maraot na impluwensia sa sato kun kita dai magdadanay na nagbabantay. Nungka na boot niatong makatao sa siisay man nin dahelan na ‘magtaram kontra sa sato bilang paragibo nin maraot.’ (1 Ped. 2:12) Ini nangangaipo na kita magtao nin orog pa kisa dating atension sa satong Kristianong personalidad. An gabos kinakaipuhan na magmaan sa saindang paggawe sa kombension asin saen man sa publiko, arog baga kan mga motel asin restawran. Interesado an kamagurangan sa gabos nindang tugang. (Fil. 2:4) Maninigo na sinda magin matinabang asin komendaran an iba huli sa saindang marahay na paggawe. An mga magurang maninigo man na dai mag-alangan na magtao nin mamomoton na sadol kun iyan kinakaipuhan, minsan ngani dai ninda personal na kamidbid an tugang na lalaki o babae. Ano man na magabat na mga problema na narisa kaipuhan na ireport sa Administration Office sa kombension.
9 An bagong pagkatawo na sinambit sa Efeso 4:24 ikinokomparar sa sarong gubing na isinulot nin saro pakatapos na haleon an daan na pagkatawo. Maninigo man na ipaheling an pagkaliwat na ini sa pagkatawo sa satong literal na mga gubing. An nagkapira sa satong mga tugang na lalaki asin babae, partikularmente an mga hobenes, naobserbaran na sobra kakaswal sa paggugubing, na kun beses dai na nin kabinian. Nagduduman daw kita sa Kingdom Hall na arog kaini? Siring man, an iba sa mga kandidato sa bautismo nagsulot nin mga T-shirt na may kinabanon na mga sarabihon asin simbolo o inimprentang anunsio para sa laen-laen na produkto. Maninigong siertohon kan mga magurang na nagrerepaso kan mga hapot sa mga nag-aandam para sa bautismo na an mga babautismohan nasasabotan kun ano an ibinibilang na angay na gubing para sa okasyon.—Helingon an The Watchtower na Hunyo 1, 1985, pahina 30, asin an Abril 15, 1973, pahina 254-5.
10 Kadakol na kinabanon na tawo na nagkokomento sa kalinigan kan banwaan ni Jehova sa satong mga kombension. Siertong mawot niatong pagdanayon an halangkaw na pamantayan, na dai nag-aapon nin papel, mga patos nin dulse, o iba pang mga linagan, sa salog. Kita logod gabos makikooperar nin iriba asin puroton an satong basura asin magsalang iapon iyan sa tamang mga basurahan o ibugtak iyan sa plastik na supot tanganing darahon sa harong asin duman iyan iapon. Kun paanong kita dai nag-aapon nin papel sa salog kan satong Kingdom Hall, nagpapaheling man kita nin paggalang sa lugar kan satong asamblea mantang yaon kita dian.
11 Nag-aatender kita sa kombension tanganing kumakan nin espirituwal na pagkakan. Kaya magigin daing paggalang sa lamesa ni Jehova kun gagamiton niato an okasyon para sa personal na ganansia sa ano man na paagi, na inaaprobetsaran an dakulang mga kadaklan na nag-aatender. Sa liwat boot ming ipagirumdom sa gabos na dai itotogot an pagpabakal nin personal na mga bagay sa laog kan lugar nin kombension, asin an mga bagay sana kan Sosyedad an itotogot sa bookroom o sa iba pang departamento kan kombension.
12 Mga Kagamitan sa Pagrekord: Minsan ngani itinotogot an mga video camera, dinadagka mi an mga naggagamit kaiyan na magin makonsiderasyon sa iba, mapamili sa saindang irinirekord, asin magalang sa mga tibaad habong kuanan mantang nagkakakan, nagdadangog sa programa, o mantang namimibi. An siisay man na nagrerekord sa video o naggagamit nin mga cassette recorder kaipuhan na likayan na makaribok sa mga nagdadangog o magin dahelan nin distorbo. Mayo nin kustion sa pagrekord kan iba sa programa sa saindong tukawan. Pero durante kan mga sesyon, bakong angay sa siisay man na magparalakawlakaw sa mga pasilyo asin sa atubangan nin mga nagdadangog, na nagrerekord kan programa. Kun kinakaipuhan, maninigo na kaolayon kan mga attendant an mga dai nagpapaheling nin pagkamoot bilang magturugang sa bagay na ini. Tabi girumdomon na daing camera o mga kagamitan sa pagrekord an ikokonektar sa electrical o sound system sa kombension, ni ibubugtak an ano man na kagamitan sa mga pasilyo o sa mga agihan.
13 Para sa mga Magurang: Boot mi na idoon sa liwat an kahalagahan kan pagbantay nin mga magurang sa saindang mga aki sa gabos na panahon, baga man sa lugar kan kombension o sa saindang mga dinadagusan. (Tal. 29:15b; Luc. 2:48) Mantang nagpapadagos an programa, siertohon na an saindong mga aki nagdadangog asin nagkukua nin nota. Durante kan pagpahingalo may mga oportunidad na bumisita sa mga katood hale sa ibang kongregasyon.
14 Tanganing iilustrar an kahalagahan kan pag-aram kun yaon saen an saindong mga aki sa gabos na panahon, sarong drayber nin taksi sa sarong siudad nin kombension an nagreport sa sarong tugang na lalaki na naglunad saiya an duwang aking babae sa lugar nin kombension. Malinaw na plinano nindang humale sa bilog na hapon asin sinabihan an drayber na dai sinda hahanapon kan saindang ina sagkod sa alas 5:00 n.h. Nahadit an drayber na ini nin taksi kun dapit sa saindang kaligtasan, pero kumusta man an saindang ina? Gurano kamakamomondo nanggad kun may kalamidad na uminabot sa sainda, dai na baga sambiton pa an langhad sa ngaran asin banwaan nin Dios!
15 Inaapresyar an Saindong Bilog na Kooperasyon: Gurano kahalaga na an kada saro sa sato makikooperar sa instruksion kan Sosyedad manongod sa pag-atender sa kombension kun saen iinasignar an satong kongregasyon? An maingat na pagpaplano kan Sosyedad asin kan responsableng mga tugang sa kada siudad nin kombension kaiba sa pag-aandam para sa kombension. Kabale dian an pagkaigwa nin bastanteng tukawan, pagkakan, literatura, asin iba pa. Puwedeng magresulta nin mga kadepisilan kun kadakol na tugang an mag-atender sa mga kombension kun saen bako man sindang asignado. Daing duwa-duwa, kadikit an magkakaigwa nin kamugtakan na mangangaipong pumaduman sinda sa ibang kombension. An ibang lugar nin kombension tibaad mas magayon huli sa laen-laen na dahelan, alagad kun an dakulang porsiento kan mga tugang maduman sa lugar na pinili ninda, an resulta magigin nakararaot na gayo.
16 Hinahagad an saindong pakikikooperar dapit sa pagreserba nin mga tukawan. Tabi girumdomon na AN MGA TUKAWAN IKARIRESERBA SANA PARA SA MGA MIEMBRO KAN SAINDONG PAMILYA ASIN SA SIISAY MAN NA KAIBA NINDO SA BIYAHE.
17 Isinusuherir na limitaran nindo an ano man na personal na mga bagay na dadarahon sa kombension. Kun dai magkakaigo an gamit sa sirong kan saindong tukawan, mas marahay pang iwalat na sana iyan sa harong.
18 Inaapresyar kan banwaan ni Jehova an pagkakatiripon tanganing makinabang sa inandam na espirituwal na programa. Inaapresyar man niato an kadakol na paglilingkod asin kagianan na itinatao sa siring na mga katiriponan. May dakulang pag-iingat asin sa darudakulang gastos kan Sosyedad, guminibo nin mga areglo para sa bastanteng tukawan, pag-instalar nin mamahalon na mga sound system, pagpadalagan kan Food Service Department, asin nagkapirang paglilingkod na minagibo sa pag-atender sa kombension na makaoogma asin nakarerepresko sa espirituwal. An mga ginastos na ini nababayadan kan saindong boluntaryong mga kontribusyon sa pagsuportar sa pankinaban na gibohon kan Sosyedad. Inaapresyar na marhay an gabos na kontribusyon, asin boot kan Sosyedad na pasalamatan kamo nin patienot para sa saindong matinaong pagsuportar sa intereses kan Kahadean sa paaging ini. Maheheling an mga kahon nin kontribusyon sa laen-laen na lugar sa palibot kan istadyum para magamit nindo.
19 Umatender sa “Mga Paradara nin Liwanag” na Pandistritong Kombension: Paagi sa pag-atender sa “Mga Paradara nin Liwanag” na Pandistritong Kombension, maoogma kitang madangog kun taano ta an pagigin mga paradara nin liwanag sarong dakulang onra asin pribilehiyo. Pagigirumdomon kita na iyan man sarong magabat na paninimbagan. Paagi sa pagtao nin orog kisa dating atension sa mga bagay na nadangog sa kombension, mag-ooswag kita kapwa sa satong kakayahan asin satong apresasyon sa satong kabtang bilang mga paradara nin liwanag. Gumibo na kamo nin mga plano ngonyan tanganing magin presente sa gabos na sesyon, poon sa pambukas na awit sa Biyernes sagkod sa pantapos na pamibi sa Domingong hapon.
[Kahon sa pahina 6]
Mga Pagirumdom sa Pandistritong Kombension
Dadagusan: Mapadara kami nin suplay nin mga pormang Room Request sa kada kongregasyon. An mga nagkakaipo nin dadagusan maninigong pumirma sa saro sa mga pormang ini asin itao iyan sa sekretaryo kan saindong kongregasyon. Iyan ririsahon asin pipirmahan nia, dangan ipadadara sa Watch Tower Convention sa saro kan mga adres na nasa ibaba.
Bautismo: An mga kandidato sa bautismo maninigong nagtutukaw na sa sinabing lugar bago pumoon an programa sa Sabadong aga. An mabining pankarigos asin tuwalya maninigong darahon kan kada saro na nagpaplanong pabautismo. Pakatapos kan pahayag sa bautismo asin pamibi kan espiker, an tsirman kan sesyon matao nin halipot na instruksion sa mga kandidato sa bautismo dangan mapakanta. Pakatapos kan ultimong berso, gigiyahan kan mga attendant an mga kandidato sa bautismo sa lugar nin pagbautismo o sa mga lunadan na magdadara sa sainda duman. Mantang an bautismo bilang simbolo nin pagdusay sarong dayupot asin personal na bagay sa pag-oltanan kan indibiduwal asin ni Jehova, mayo nin probisyon para sa inaapod na magkaparehang mga bautismo kun saen an duwa o mas dakol pang kandidato sa bautismo magkukurugusan o magkakaraputan nin kamot mantang binabautismohan.
Espesyal na mga Miting: May gigibohon na pakipagmiting sa gabos na regular asin espesyal payunir saka mga nagbibiyaheng paraataman sa alas 11:15 n.a. sa Biyernes, mantang an pakipagmiting sa gabos na kamagurangan asin ministeryal na mga lingkod gigibohon sa alas 11:15 n.a. sa Sabado. An mga lugar kan mga miting na ini ipaiisi sa plataporma.
Pioneer Identification: An gabos na regular asin espesyal payunir saka nagbibiyaheng mga paraataman kaipuhan na darahon sa kombension an saindang Identification and Assignment card (S-202). An mga payunir na nasa lista poon kan Hulyo 1, 1992 o bago pa kan petsang iyan puwedeng umako nin halagang ₱80.00 na tiket sa kombension basta ipresentar an saindang ID card sa sarong kombension na iyan sana. Ingatan an card na garo kuwarta. Dai iyan masasalidahan sa kombension.
Pagboboluntaryo: An tabang nin mga boluntaryo kaipuhan para sa pulidong pag-andar kan pandistritong kombension. Minsan kun puwede kamong magtrabaho sa saro sanang kabtang kan kombension, an saindong paglilingkod pasasalamatan. Kun puwede kamong makatabang, tabi magreport sa Volunteer Service Department pag-abot nindo sa kombension. An kaakian na dai pang 16 anyos an edad puwede man na makakontribuwir sa kapangganahan kan kombension, alagad hinahagad na sinda magtrabaho kaiba nin magurang o iba pang responsableng adulto.
Lapel Cards: Tabi isulot an may espesyal na disenyong lapel card sa kombension asin mantang nagbibiyahe paduman asin hale sa lugar kan kombension. Parateng ginigibo kaining posible sa sato na magtao nin marahay na patotoo mantang nagbibiyahe. An lapel cards maninigong kuanon paagi sa kongregasyon, mantang an mga ini dai makukua sa mga kombension. (Pasabot sa sekretaryo: An mga lapel card maninigong pedidohon sa Special Order Blank for Forms. Kun ini dai nagibo, magpadara na ngonyan kan regular na S-14 na pedido para kaini.)
Patanid: Saen man kamo umatender, bantayan an saindong mga dara-dara sa gabos na oras. Kun kamo may kotse, seguradohon na iyan barat asin dai magwalat nin ano man na mahalaga sa napaparadang kotse. Siring man, mag-ingat kamo sa mga parahabon asin mandurukot na perming yaon sa darakulang katiriponan. Kabale digdi an dai pagwalat nin ano man na may halaga sa mga tukawan sa kombension na mayo nin nagbabantay. Tabi mag-ingat.